जनकपुर– मधेस प्रदेशमा मधेसी दलमध्ये सबभन्दा लोकप्रिय पार्टी सीके राउत नेतृत्वको जनमत पार्टी भएको छ। निर्वाचन आयोगले सार्वजनिक गरेको समानुपातिकतर्फको हालसम्मको मतपरिणाम अनुसार जनमत पार्टीले मधेस प्रदेशमा तेस्रो स्थान ल्याएको छ।
पहिलो स्थानमा नेपाली कांग्रेसले चार लाख १४४ मत ल्याएको छ भने एमालेले तीन लाख ७६८ मत ल्याएको छ। त्यसपछि जनमत पार्टीले तीन लाख २९ हजार १७७ मत ल्याएको छ।
जसपा नेपालले दुई लाख ९८ हजार ७७४ मत पाएको छ। जनमतले जसपाभन्दा ३० हजार ४०३ मत बढी ल्याएको छ।
यसअघिको चुनावमा मधेसमा लोकप्रिय रहेको जसपा र लोसपाले सो लोकप्रियता यसपटक गुमाएका छन्। लोकतान्त्रिक समाजवादी पार्टीले एक लाख १३ हजार ३६४ मत मात्र ल्याएको छ।
मधेस प्रदेशमा प्रतिनिधि सभातर्फ सीके राउतले एउटा मात्र सिट जितेका छन् भने प्रदेश सभातर्फत ६ वटा सिट जितेका छन्। उपेन्द्र यादव नेतृत्वको जसपाले प्रतिनिधि सभातर्फ ६ वटा र प्रदेश सभातर्फ नौ सिट जितेको छ।
त्यस्तै, महन्थ ठाकुर नेतृत्वको लोसपाले प्रतिनिधि सभातर्फ तीनवटा र प्रदेश सभातर्फ सातवट सिट प्रत्यक्षमा जितेको छ। अन्य मधेशवादी दलले न प्रतिनिधि सभातर्फ जितेको छन् न प्रदेश सभातर्फ।
नेपाल संघीय समाजवादी पार्टीले ५० हजार १८८, नागरिक उन्मुक्ति पार्टीले ४९ हजार ७०५, बहुजन एकता पार्टी नेपालले २० हजार ३२४, नेपाल लोकतान्त्रिक पार्टीले आठ हजार २८७, पिछडावर्ग निषाद दलित जनजाति पार्टीले सात हजार १०४, बुहजन शक्ति पार्टीले छ हजार ६८६, नेपाल जनता पार्टीले पाँच हजार ४६१, तराई मधेस लोकतान्त्रिक पार्टीले पाँच हजार ३६७, जनता प्रगतिशिल पार्टी, नेपालले पाँच हजार ३४०, नेपाल सद्भावना पार्टीले चार हजार ८१७, नेपाली जनता दलले तीन हजार ६७९ मत ल्याएका छन्।
मधेस प्रदेशको समानुपातिकतर्फ जनमत पार्टीले सबभन्दा बढी मत सप्तरीमा नै ल्याएको छ। सीके राउत पनि सप्तरी २ बाट निर्वाचित भएका हुन्।
मधेस प्रदेशको समानुपातिकतर्फ जनमतले सप्तरीबाट ८६ हजार ७०७, सिरहाबाट ५४ हजार ६५४, सर्लाहीबाट ४४ हजार ४९९, धनुषाबाट ४३ हजार ५२६, महोत्तरीबाट ३७ हजार १९३, रौतहटबाट ३० हजार ९९०, बाराबाट २४ हजार ३१३ र पर्साबाट सात हजार २५४ मत ल्याएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
