काठमाडौं– गत ४ मंसिरमा सम्पन्न प्रतिनिधि तथा प्रदेश सभा चुनावको अधिकांश मतपरिणाम आइसकेको छ।
सम्पन्न निर्वाचनमा उम्मेदवार बनेका अधिकांश उम्मेदवार पराजित भए। केही कलाकारको जमानतकै जफत हुने मत प्राप्त भयो। केहीको भने विजयी उम्मेदवारलाई टक्कर दिने थियो।
निर्वाचनको बेला चर्चामा रहेका कलाकार, जसको चुनावी परिणाम र त्यसपछिकका गतिविधिबारे उल्लेख गरेका छौं।
विजयी कलाकार राजनीतिक भेटघाटमा
रोज राणा
कलाकार रोज राणा प्यूठान प्रदेशसभा ‘२’ बाट विजयी भए। नेपाली कांग्रेसबाट उम्मेदवार बनेका उनी १ हजार ७ सय १२ मतान्तरले विजयी बनेका थिए।
२२ हजार ५ सय १८ मत ल्याएका राणाका निकटतम् प्रतिद्वन्दी एमालेका हरि रिजालले २० हजार ८ सय ७ मत पाएका थिए। उनले ‘दागिरी,’ ‘डन’, ‘खलनायक’, ‘टक्कर दुई मुटुको’, ‘म छु नि तिम्रो’ लगायतका आधा दर्जन भन्दा बढी फिल्म बनाएका छन्।
चुनाव जितेसँगै उनले दलहरूका शीर्ष नेताहरूसँग भेटघाट बढाएका छन्। उनले केही दिनअघि प्रधानमन्त्री तथा नेपाली कांग्रेसका सभापति शेर बहादुर देउवासँग भेटघाट गरेका थिए। देउवा भेटेलगत्तै उनले नेकपा माओवादी केन्द्रका अध्यक्ष पुष्पकमल दाहाल प्रचन्डसँग भेट गरेका थिए।
शुक्रबार मात्र उनले प्रधानमन्त्री देउवा पत्नी आरजु राणासँग पनि भेट गरेका छन्। निर्वाचन जितेपछि राणाले मतदातालाई धन्यवाद दिँदै भनेका थिए, 'आजका दिनबाट यहाँहरूको सल्लाह सुझाब र मेरो पार्टीको घोषणापत्र र मेरो सोच र भिजनबमोजिम मेरा आफ्ना कार्यक्रमहरू तय गरी आगडि बढ़ने प्रतिबद्दता गर्दछु।'
मदुकुमार श्रेष्ठ
अभिनेता मदुकुमार श्रेष्ठ पनि प्रदेश सभा सांसदमा विजयी भए।
नेपाली कांग्रेसबाट उम्मेदवार बनेका उनी धादिङ–१ को प्रदेश (१) बाट निर्वाचित भएका हुन्।
उनले एमाले उम्मेदवार रमेश आचार्यलाई पराजित गर्दै १७ हजार ८ सय ३२ मत प्राप्त गरेका थिए।
पराजित कलाकार फर्कँदै लयमा
रेखा थापा
अभिनेत्री रेखा थापा मोरङ–३बाट प्रतिनिधि सभामा उम्मेदवार बनेकी थिइन्। राप्रपाकी उम्मेदवार थापा कांग्रेसका सुनिल कुमार शर्मासँग पराजित बनिन्। रेखाले १० हजार ९ सय ८९ मत प्राप्त गरेकी थिइन्।
निर्वाचनमा पराजित भएपछि उनले विजयीलाई धन्यवाद दिँदै आफू उक्त भेगका जनताको सुख दुखमा साथ दिने विश्वास व्यक्त गरेकी थिइन्। ‘निर्वाचनका क्रममा अनेकौँ अनुभव हासिल गरेको छु । उम्मेदवार हुँदै गर्दा जित्नुपर्छ भन्ने लाग्नु अस्वभाविक होइन। तर निर्वाचित हुने एक जना मात्र हो। राजनीति लामो समयको यात्रा हो। यसमा जित्नु वा हार्नुको मात्र अर्थ रहँदैन पनि। सांसद मात्र बन्ने चाहना हुँदो हो त म प्रत्यक्ष निर्वाचन नलडी सांसद बन्न सक्ने धेरै सजिलो अवसर मेरा सामु थियो। मैले त्यो अवसरको लोभ नगरि प्रत्यक्ष उम्मेदवार बनेको थिएँ। यसका धेरै अर्थ थिए र छन् भन्ने लाग्छ, 'उनले फेसबुकमा लामो स्टाटस लेखेकी थिइन्, 'खैर, बाँकी कुरा गर्दै जाउँला। निर्वाचनबाट पराजित हुँदैमा म अब तपाईँहरुबाट टाढा हुने नसोच्नु होला। मेरो निर्वाचन क्षेत्रका हरेक सुख दुख बाँड्न म सँधै सँगै हुनेछु। यो निर्वाचनबाट निर्वाचित सुनिल शर्माजीका राम्रा काममा काँधमा काँध मिलाउनेछु तर बाटो बिराए बिना हिच्किचाहट खबरदारी गर्नेछु।'
रेखा पछिल्लो समय पारिवारिक भेटघाटमा देखिएकी छन्।
कोमल वली
नेकपा एमालेबाट दाङ निर्वाचन क्षेत्र नम्बर ३ बाट प्रतिनिधि सभामा उम्मेदवार बनेकी गायिका कोमल वली कांग्रेसका दीपक गिरीसँग पराजित भइन्। उनले विजयी बनेका गिरीलाई बधाई दिँदै समृद्ध दाङ बनाउने आफूले लिएको सपना पूरा गर्ने अभिभारा लिन आग्रह गरिन्। वलीलाई ७ हजार आठ सय १० मतले हराउँदै गिरी विजयी भएका थिए।
उनले ३६ हजार आठ सय ४२ मत ल्याए भने वलीले २९ हजार ३२ मत प्राप्त गरिन्। कोमल वली हाल दाङका सांस्कृतिक कार्यक्रम तथा पारिवारिक भेटघाटमा व्यस्त छिन्।
मनोज पण्डित
फिल्म निर्देशक मनोज पण्डित काभ्रे–२बाट प्रतिनिधि सभाका स्वतन्त्र उम्मेदवार थिए। चुनावअघि चर्चामा रहेका उनी चुनावी मैदानमा भने खरो उत्रन सकेनन्।
मनोजले १ सय ७३ मत प्राप्त गरे। उनको क्षेत्रमा पूर्व मन्त्री गोकूल प्रसाद बास्कोटा विजयी बनेका थिए। पण्डितले चुनावमा पराजित भएसँगै नयाँ फिल्मको स्क्रिप्टमा आफू लागिसकेको बताएका छन्।
उनले नयाँ फिल्म निर्माणका लागि कलाकार तथा निर्माताहरूसँग भेटघाट बढाइरहेका छन्। उनले आफूले पाएको भोटको सम्मान गर्दै फेसबुकमा लेखेका थिए, 'म यसको सम्मान गर्छु र महत्त्व स्थापित गर्नेछु । मेरो उम्मेदवारी दण्डहीनता विरुद्ध थियो र सामाजिक व्यवस्थापनको लागि यो आवाज सधैं उठाइरहनेछु।' उनले निर्वाचित बास्कोटालाई व्यंग्य गर्दै थप लेखेका थिए, '४५ हजार ३ सय ४५ मतले माननीयको अपराध ढाक्न सक्दैन। अपराध भैसकेपछि त्यसको परिणति भोग्नैपर्छ। हो चुनौती बढ्यो भन्ने मात्र हो। राम्रो कामको लागि पुरस्कार र गलत कामको लागि दण्ड हुने प्रणालीलाई अझ लोकतान्त्रिक, मानवीय र शक्तिशाली बनाउनुछ।'
मुरलीधर
गायक तथा कलाकार मुरलीधर प्रतिनिधि सभा निर्वाचनमा(राप्रपा)बाट सिरहा–२ मा उम्मेदवार बनेका थिए।
चुनावअघि उनी पनि चर्चामा थिए। तर चर्चा भएजसस्तो मत ल्याउन उनले पनि सकेनन्। मुरलीधरले ७ सय २८ मत ल्याए। उक्त क्षेत्रमा जनता समाजवादी पार्टीका राजकिशोर यादव २४ हजार १ सय ७८ मतका साथ निर्वाचित भए। मुरलीधर गत असोजमा मात्रै राप्रपा प्रवेश गरेका थिए।
हिमेश पन्त
धादिङ–१बाट प्रतिनिधि सभाको उम्मेदवार बनेका कमेडियन हिमेश पन्त ले चर्चाअनुसारकै भोट पाए। तर विजयी हुन सकेनन्। राष्ट्रिय स्वतन्त्र पार्टीका उम्मेदवार उनले १२ हजार ४ सय ७५ मत ल्याए। गठबन्धनका तर्फबाट बागमती प्रदेशका मुख्य मन्त्री राजेन्द्र पाण्डे उक्त क्षेत्रमा विजयी बने। उनले मतदाताहरूलाई धन्यवाद दिँदै राजनीतिक यात्रालाई अगाडि बढाउने संकेत गरेका छन्।
‘राष्ट्रिय स्वतन्त्र पार्टी, जसले देशव्यापी रुपमा परिवर्तनको आँधीबेरी ल्याउँदैछ। त्यसको महसुस एकदिन धादिङले पनि गर्नेछ। जित्नु मात्र ठूलो कुरा हैन, हारबाट प्राप्त भएको अनुभव र सिकाइले भविष्यमा मजबुत नेतृत्व तयार पार्दछ। देश बनाउने परिकल्पना बोकेर हिँडेका हामी कत्ति पनि विचलित हुने छैनौँ। धादिङमा घन्टी राम्रैसॅग बजेको छ तर अर्को पटक अझ सशक्त ढङ्गले घन्टी बजाउने प्रण गर्दछौ,' उनले फेसबुकमा लेखे।
त्यस्तै हास्य टेलिशृंखला ‘सक्किगोनी’मा ‘सीते बा’ नामले परिचित कलाकार मधुसुदन पाठक पनि चुनावमा उम्मेदवार बनेका थिए। उनको क्षेत्र काठमाडौं–५ मा नेपाली कांग्रेसका उम्मेदवार प्रदीप पौडेल विजयी भए।
काठमाडौं–६ बाट स्वतन्त्र उम्मेदवारी दिएका सञ्जय श्रेष्ठ पनि पराजित भए। उनको क्षेत्रमा राष्ट्रिय स्वतन्त्र पार्टीका उम्मेदवार शिशिर खनाल विजयी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791448938.png)
-1786602170.png)
-1791388337.png)
