काठमाडौ– मंसिर ४ गतेको प्रतिनिधि सभाको निर्वाचनको नतिजा अन्तिमतिर पुगेसँगै सत्ता निर्माणको चर्चा परिचर्चा शुरु भएको छ। यही मेसोमा पहिलो दल बन्ने क्रममा रहेको नेपाली काग्रेसका महामन्त्रीद्धयले भेट गरेका छन्।
झापा–१ वाट निर्वाचित भएका काग्रेसका महामन्त्री विश्वप्रकाश शर्मा अर्का महामन्त्री गगन थापालाई भेट्न उनको निवास नै पुगेका थिए। झापावाट निर्वाचित भएपछि पहिलो भेटका लागि काठमाडौं–४ वाट निर्वाचित थापा निवास उनी पुगेका हुन्। भेटपछि दुवै महामन्त्रीले एक अर्कालाई प्रतिनिधि सभामा निर्वाचित भएकोमा वधाई दिए। थापालाई भेटमा शर्माले आफूले प्रधानमन्त्रीको रुपमा प्रस्तावक बन्ने वचन दिएका छन्।
मंगलबार काठमाडौंस्थित महामन्त्री रातोपुलस्थित थापा निवासमा घरमा बधाई ज्ञापन गर्न पुगेका उनले थापालाई प्रधानमन्त्री बनाउने अभियान शुरु गर्ने वचन दिएका हुन्।
झापा क्षेत्र नम्बर १ बाट प्रतिनिधि सभा सदस्यमा निर्वाचित भएपछि काठमाडौं आएका शर्मा विमानस्थलबाट सिधै थापा निवास रातोपुल पुगेर बधाई तथा प्रधानमन्त्री बन्ने शभकामना व्यक्त गर्दै उनले उक्त वचन दिएका हुन्।
थापालाई सांसद भएकोमा बधाई दिनका लागि मात्रै नआएको भन्दै प्रधानमन्त्री बनाउने अभियान शुरु गर्नका लागि आएको उनले बताए।
उनले महामन्त्री थापा पटक—पटक सांसद भइसकेको र मन्त्री भएर अनुभवपनि हासिल गरिसकेको भन्दै अब देशको आवश्यकतालाई बुझेर प्रधानमन्त्री पदको लागि नेतृत्व गर्नेगरी अगाडी बढ्नुपर्ने बताए।
‘हामीले यो बेलामा त्यो आवाजलाई प्रतिनिधित्व गर्नुपर्छ जुन आवाज देशले बोलिरहेको छ । कहीँ बोलेको सुनिन्छ, कहीँ बोल्न चाहिरहेको बुझिन्छ। कहीँ मानिसहरूको हृदयमा त्यो शब्द बन्न खोजिरहेको छ’, शर्माले भने ‘ एउटा लोकतान्त्रिक दलले सदैव प्रतिनिधित्व जनताको जनभावनाको गर्नुपर्छ । त्यसकारण अहिले म यहाँनिर महामन्त्री गगन थापालाई काठमाडौं– ४ बाट निर्वाचित हुनुभयो तपाईं सांसद बन्नुभयो भनेर बधाई दिन आएको होइन। सांसद पहिल्यै भइसक्नु भएको हो पटक–पटक। मन्त्री भएर अनुभव पनि हाँसिल गरिसक्नुभएको छ।’
अब देशको आवाज के हो ? देशको आवश्यकता के हो ? त्यो आवश्यकतालाई बुझेर नेतृत्व गर्ने ढंगले तपाईं अब प्रधानमन्त्री पदका लागि नेतृत्व गर्ने ढंगले अगाडि बढ्नुस् भन्नका लागि आफू थापालाई बधाई दिन आएको शर्माले बताए।
त्यो भन्ने कुरा मात्रै नभई त्यसको अभियानलाई शुरु गर्नलाई पनि आफू आएको उनको भनाइ थियो।
‘अब हामी दुई, तीन दिनभित्रमा देशभरीका साथीहरू, मतदाताहरूलाई सम्मान गर्ने, आभार प्रकट गर्ने कार्य सकेर काठमाडौं उपस्थित हुन्छौँ’, उनले भने, ‘उपस्थित भइसकेपछि यसलाई विधिवत, व्यवस्थित रुपमा परिणाममा पुर्याउने ढंगले सबै नेतृत्व पंक्तिलाई हामीले भनेर अघि वढ्छौ।’
सबै पाका नेताहरू जो हुनुहुन्छ सबैले देशका लागि योगदान गरेको र लोकतन्त्रका लागि योगदान गरेको कुरालाई कदर गर्दै उनीहरू सबैको विश्वास र सर्मथन लिएर साथै कसैलाई पनि अपमान गरे भन्ने महसुस नगराइकन नेतृत्व थापाकोमा ल्याउन आफू लाग्ने उनले बताए।
महामन्त्री शर्माले थापालाई संसदीय दलको नेता बनाउन पार्टीभित्रका शीर्ष नेताहरू र सांसदहरूसँग छलफल अगाडि बढाउने जानकारी दिए।
उनले थापालाई संसदीय दलको नेताका लागि पार्टी सभापति शेरबहादुर देउवा र वरिष्ठ नेता रामचन्द्र पौडेल लगायतको समर्थन जुटाउनु आफ्नो जिम्मेवारी र कर्तव्य भएको पनि बताए।
शीर्ष नेताहरूलाई थापाको प्रस्तावक बनाउन नसकेमा आफैँ प्रस्तावक बनेर भएपनि अगाडि बढाउने उनको भनाइ थियो।
‘मेरो प्रयत्न के रहन्छ भने प्रस्तावकको रुपमा शेरबहादुर देउवाको नाम लेख्नसक्ने परिस्थिति बनाउनु चाहिँ मेरो जिम्मेवारी हुन्छ। रामचन्द्र पौडेलको नाम लेख्ने बनाउनु हामी युवाहरूको कर्तव्य हुन्छ,’ उनले भने, ‘कतिपयले बहुमत पुग्छन् भनेर मलाई भन्नुहुन्छ। बहुमत भन्नेकुरा प्राविधिक कुरा हुनसक्छ। विवेक भन्ने कुरा समयलाई बुझेर विश्लेषण गर्नुपर्ने कुरा हुन्छ। त्यो विकेकले के भन्छ अहिले भन्दैगर्दा अब नेतृत्वलाई परिवर्तन गरेर जाउ, नेतृत्वलाई अब अगाडि सारेर जाउ।’
सबै सांसदलाई सोधेर छलफल गरेर थापाको प्रस्तावक अग्रज नेता बस्ने कुरामै लाग्ने उनले बताए । उनले सर्वसम्वत रुपमा त्यसमा पुग्न सकिने आफूलाई विश्वास रहेकोसमेत दाबी गरे।
‘मेरो विश्वास हो। सर्वसहमतिमा पु¥याउन सकिन्छ,’ उनले भने, ‘प्रस्तावक लेख्नुपर्दै गर्दा, उभिनुपर्दा म आफैँ प्रस्तावक बस्नेकुरा स्वभाविक छ। त्यो म गरेर उभिन्छु।’
भेटमा महामन्त्री थापाले पनि शर्मालाई बधाई तथा शुभकामना दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
