कांग्रेसका यी ४ सहमहामन्त्री, जसले भोगे पराजय

निर्वाचन विशेष

नेपाल लाइभ मंगलबार, मंसिर १३, २०७९ १६:२०

काठमाडौं– मंसिर ४ मा भएको प्रतिनिधि सभा र प्रदेश सभाको निर्वाचनको नतिजा आउनेक्रम अन्तिम चरणमा पुगेको छ। हालसम्म नेपाली कांग्रेसले ५३, नेकपा (एमाले)ले ४३ नेकपा (माओवादी केन्द्र)ले १७, नेकपा (एकीकृत समाजवादी)ले १०, जनता समाजवादी पार्टी (जसपा), राष्ट्रिय प्रजातन्त्र पार्टी (राप्रपा) र राष्ट्रिय स्वतन्त्र पार्टीले ७–७ सिट जितेका छन्। अन्य दल र स्वतन्त्रले १५ सिटमा जित हात पारेका छन्।

हालसम्म १५९ स्थानको नतिजा आएको छ भने ३ स्थानमा मतगणना चलिरहेको छ। स्याङ्गजा र बाजुरामा मतगणना गर्ने कि मतदान गर्ने भन्ने विषयमा आयोगले निर्णय गर्न सकेको छैन भने दोलखाको १० स्थानमा निर्वाचन हुँदैछ।

समानुपातिक तर्फको मतगणना पनि चलिरहेको छ। हालसम्म प्रत्यक्ष तर्फको मतगणनामा कांग्रेस पहिलो दल भएको छ। कांग्रेस महाधिवेशन सम्पन्न गर्दै निर्वाचनमा होमिएको थियो। यो निर्वाचनमा कांग्रेसका केही प्रभावशाली पदाधिकारी पराजित भएका छन्। यस पटकको निर्वाचनमा कांग्रेसका महामन्त्रीद्वय गगन थापा र विश्वप्रकाश शर्माले प्रष्ट बहुमतका साथ सांसद जिते भने ४ सहमहामन्त्रीले पराजय भोगे।

यी हुन् ती ४ सहमहामन्त्री:

महेन्द्र यादव
कांग्रेसका सहमहामन्त्री महेन्द्र यादवले मधेस प्रदेशको धनुषा–४ मा यसपटक अन्तिम समयमा पराजय भोगे। उनी एमालेका सचिव रघुवीर महासेटसँग पराजित भएका हुन्। सहमहामन्त्री यादव १२४ मतले पराजित भए। महासेठले उक्त क्षेत्रबाट ३२ हजार २३६ मत पाए भने यादवले ३२ हजार ११२ मत ल्याए। मधेस प्रदेशबाट प्रभावशाली सहमहामन्त्री यादव सोमबार बेलुकासम्म अग्रता कायम गरिरहेका थिए।

तर मंगलबार बिहानको गणनामा उनी पछि परे। क्षरेश्वर नगरपालिका, मिथिला नगरपालिकासम्म यादव अघि नै थिए। तर सोमबार रातिदेखि मिथिला नगरपालिकावाट वडा नम्बर ११ बाट पछि परेका थिए। अन्ततः उक्त वडाले महासेठलाई जित दियो भने यादवले पराजय भोगे। यादव पराजित हुनुमा कांग्रेसभित्रको आन्तरिक कलहले पनि साथ दिएको देखिन्छ।

महालक्ष्मी उपाध्याय ‘डिना’
कांग्रेसकी महिला सहमहामन्त्री महालक्ष्मी उपाध्याय ‘डिना’ पनि यस पटक ‘सरप्राइज’ रुपमा पराजित भइन्। सत्ता गठबन्धनमा आबद्ध माओवादी केन्द्र र एकीकृत समाजवादीजस्ता पार्टीले साथ दिँदासमेत उनी पराजित भइन्। कांग्रेसको महाधिवेशनको समयमा नै उनले आफू समानुपातिकमा नबस्ने र प्रत्यक्ष लड्ने भन्दै आएकी थिइन्। उनी टिकट वितरणदेखि नै अडानमा रहिन्। उनकै लागि सत्ता गठबन्धनले मकवनापुरमा क्षेत्र नै साटफेट गरियो। मकवनापुर– १ डिनालाई दिँदै २ मा एकीकृत समाजवादीले उम्मेदवार उठाएको थियो।

एकीकृत समाजवादीले पूर्वस्वास्थ्यमन्त्री विरोध खतिवडालाई उम्मेदवार बनाएको थियो। डिनालाई सत्ता गठबन्धनको साथ भएकाले सहजै जित निकाल्ने आकलन गरिएको थियो। उक्त आकलनअनुसार मत गणनाको प्रारम्भिक दिनमा उनले अग्रता कायम गर्दै गइन्। जब अन्तिम दिन उनको मतगणना हेटौँडा उपमहानगरपालिको वडामा सुरु भयो त्यहाँ उनी पछि परिन्।

राप्रपाका उम्मेदवार दीपकबहादुर सिंहले उनलाई पछि पारे। उक्त क्षेत्रमा राप्रपा नेपालका अध्यक्ष कमल थापा पनि उम्मेदवार भएका थिए। थापाले आफू तेस्रो नम्बरमा पुगेपछि हार स्वीकार गरे। एमालेको सूर्य चिह्न लिएर चुनावको मैदानमा उत्रेका राप्रपा नेपालका अध्यक्ष थापाले हार स्वीकार गर्दा डिनालाई सरप्राइज दिँदै राप्रपाका सिंह निर्वाचित भए। राप्रपाका सिंहले २७ हजार ८ सय १६ मत पाए भने डिनाले २५ हजार ४ सय ३४ मत पाइन्। राप्रपा नेपालका थापाले २४ हजार ४ सय २० मतमात्र ल्याए। सिंहसँग सहमहामन्त्री डिनाले २ हजार ३ सय ८२ मतले पराजय भोगिन्।

उमाकान्त चौधरी
मधेस प्रदेशमा अर्का कांग्रेसका सहमहामन्त्री एवं खानेपानीमन्त्री उमाकान्त चौधरी पनि पराजित भए। प्रभावशाली नेता रहेका उनी वहालवाला मन्त्रीको रुपमा समेत निर्वाचनको मैदानमा रहेका उनी एमालेका उम्मेदवारसँग पराजित भएका हुन्।

बारा–१ वाट प्रतिनिधि सभामा उम्मेदवार भएका उनी एमालेका अच्युतप्रसाद मैनालीसँग पराजित भए। मैनालीले ३९ हजार १ सय ९५ मत पाए भने चौधरीले ४० हजार ५६ मत ल्याए। चौधरी मैनालीसँग ९ हजार १ सय ३९ मतान्तरले पराजित भए। फराकिलो मतान्तरले पराजित हुने उनी एक्लो सहमहामन्त्री हुन्।

भीष्मराज आङ्देम्बे
यो निर्वाचनमा थोरै मतान्तरले पराजय भोग्ने नेपाली कांग्रेसका अर्का सहमहामन्त्री हुन् भीष्मराज आङ्देम्बे। उनी २०७० को निर्वाचनमा पाँचथर–२ बाट निर्वाचित भएका थिए। २०७४ को प्रतिनिधि सभा निर्वाचनमा उनी एउटै क्षेत्र रहेको पाँचथरबाटै उम्मेदवार भए। तर, एमाले उम्मेदवार वसन्तकुमार नेम्वाङसँग पराजित हुन पुगे। यसपटक उनी आफ्नो पुरानै प्रतिस्पर्धीसँग बदला लिन मैदानमा थिए। अघिल्लो पटकको पराजय बिर्साउने गरी उनले निर्वाचनको तयारी पनि गरेका थिए। यसपटक उनलाई सत्ता गठबन्धनभित्र रहेका माओवादी केन्द्र, एकीकृत समाजवादीको साथ पनि थियो।

तर हालसम्म सार्वजनिक भएको मत परिणाम हेर्दा उनी झिनो मतान्तरले पराजित हुने देखिन्छ। निर्वाचन आयोगले हालसम्म उक्त क्षेत्रको अन्तिम मतपरिणाम भने सार्वजनिक गरेको छैन। हालसम्म सार्वजनिक भएको मत परिणामअनुसार आङदेम्बेले ३२ हजार ६३ मत पाएका छन्। एमालेका उम्मेदवार नेम्वाङले ३२ हजार १ सय १० मत पाएका छन्। उक्त क्षेत्रमा समानुपातिक मत गणना चलिरहँदा प्रत्यक्षको मतपत्र भेटिएपछि विवाद भएको थियो । प्रत्यक्ष तर्फको ब्यालेट बक्समा हुनुपर्ने मत समानुपातिकमा परेको पाइएपछि पुनः मतगणना हुनुपर्ने माग भइरहेको छ। तर एमालेले त्यसलाई अस्वीकार गरिरहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

तोलामा एक हजार ४ सयले घट्यो सुनको मूल्य, चाँदीको कति ?

वर्षाका कारण नेपाल र हङकङ बिचको खेल रद्ध

रुसी राष्ट्रपति पुटिन र चीनियाँ राष्ट्रपति जिनपिङबीच भेटवार्ता