काठमाडौं– अर्थतन्त्रमा देखिएको समस्याको कारण नीजि क्षेत्र निरासाजनक अवस्थामा रहेको नीजि क्षेत्रको दाबी छ। नेपाल उधोग वाणिज्य महासंघका अध्यक्ष शेखर गोल्छाले पछिल्लो समय नेपालमा देखिएको आर्थिक समस्याको कारण नीजी क्षेत्रको मनोबल कमजोर भएको बताएका छन्।
शुक्रबार उद्योग दिवसको अवसरमा आयोजित कार्यक्रममा बोल्दै अध्यक्ष गोल्छाले बजारमा तरलता चरम अभाव,उद्योगको उत्पादन क्षमतामा कमी, बैंकको ब्याजदर वृद्धि लगायत सरकारको नीतिको कारण निजी क्षेत्रको मनोवल कमजोर भएको बताए।
उनले सरकारले लामो समय आयात प्रतिबन्ध गर्दा राजश्व संकलनमा कमी आएकाले सरकारको दैनिक खर्च गर्नसमेत समस्या हुने गरेको बताए। सरकारले मुलुकको वर्तमान अर्थतन्त्रमा वास्तविकता परीक्षण गर्न आवश्यक रहेको उनको भनाइ छ।
अध्यक्ष गोल्छाले अहिले ५० लाख विदेशमा रहेका युवाले पठाएको रेमिट्यान्सले मुलुकको अर्थतन्त्र चलेको बताए। उनले देशभित्र नै युवाहरुलाई रोजगारी दिन नसक्नु उद्योगी व्यवसायी र सरकारको कमजोरी भएको बताए। उनले मुलुकभित्रै युवाहरुले भविष्य खोज्न सक्नुपर्ने धारणा व्यक्त गरे।
अध्यक्ष गोल्छाले ६० वर्षदेखि नेपालमा उद्योग क्षेत्रका समस्या एउटै भए पनि अहिलेसम्म एउटै समस्या यथावत रहेको बताए।
देशभित्र नै औद्योगिक विकास गरी उचित मूल्य दिन सक्नुपर्ने, बढ्दै गएको व्यापारघाटा कम गर्नको लागि देशमा औद्योगिक विकास गर्न जरुरी रहेको उनको बुझाइ छ। सरकारले उद्योगलाई बचाउन सके मात्रै अहिले देखिएको अर्थतन्त्रको समस्या समाधान हुने गोल्छाको भनाइ छ।
‘सरकार राजश्वमुखी अर्थतन्त्रमा गएकाले कसरी उत्पादन र रोजगारमुखी बनाउने योजना सरकारसँग छैन। सरकारले निश्चित उद्योगहरुलाई ब्याजदरमा अनुदान दिनुपर्छ,’ गोल्छाले भने।
उनले वर्तमानको आर्थिक संकटले सरकार र निजी क्षेत्र धरासायी भएको बताए। उनले वाणिज्य बैंकहरु नाफा कमाउने उद्देश्यकै हुने हुँदा ब्याजदरको अस्थिर अवस्थामा बैंकलाई भन्दा उद्योग बचाउन सरकारले उद्योगको ब्याजमा अनुदान दिनुपर्ने बताए।
त्यस्तै, उद्योग परिसंघका अध्यक्ष विष्णुकुमार अग्रवालले अर्थतन्त्रमा देखिएका समस्याले निजी क्षेत्र निराश रहेको बताए। उनले पछिल्लो समय तलरलताको चरम अभाव, बैंकको ब्याजदर १८ प्रतिशतसम्म वृद्धि, मागमा समेत ठूलो रुपमा संकुचन भएकाले निराशा छाएको बताए। उनले उद्योगीहरुले उद्योगमा लगानी गर्ने वातावरण नभएकाले ७० प्रतिशत उद्योगीहरुले लगानी रोकेर राखेको बताए।
उनले सरकारसँगको सहकार्यमा अगाडि बढाइरहेको मेक इन नेपाल ‘स्वदेशी’ अभियानमा आवद्ध सदस्यहरुलाई सहुलियत माग गरे। परिसंघले अगाडि सारेको मेक इन नेपाल ‘स्वदेशी’ अभियानमार्फत् ४ वर्षमा वार्षिक १ हजार उद्योग दर्ता गर्ने, वर्षमा उद्योगको योगदान २२ प्रतिशत बनाउने, १ लाख ५० हजार युवालाई वार्षिक रोजगारी सिर्जना गर्ने र निर्यातलाई ४ मिलियन डलर पुर्याउने उद्देश्य रहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1777595787.png)
