काठमाडौं– राष्ट्रिय स्वतन्त्र पार्टीका तर्फबाट काठमाडौं– ८ मा विराज भक्त श्रेष्ठ निर्वाचित भए।
श्रेष्ठ १० हजार १ सय ५ मत ल्याएर सङ्घीय सांसदमा निर्वाचित भए। उनका निकटतम प्रतिद्वन्द्वि हाम्रो नेपाल पार्टीको ‘लौरो’ चुनाव चिह्न लिएर उम्मेदवारी दिएका सुमन सायमीले ६ हजार १ सय ७४ मत पाएका छन्।
श्रेष्ठले सायमी मात्रै हैन बहालवाला मन्त्रीलाई समेत पछि पारेर जित हासील गरेका हुन्।
सानै उमेरदेखि सामाजिक काममा सक्रिय श्रेष्ठको राजनीतिक पृष्ठभूमि भने लामो छैन। ६ वर्ष अघि अन्य पेसामा सकृय श्रेष्ठ विवेकशील नेपाली दल हुँदै राजनीतिमा आए।
विद्यालयस्तरमा रेडक्रसको अध्यक्ष बनेका श्रेष्ठ अहिले सम्पदा संरक्षण लगायत विभिन्न सामाजिक सेवाका काममा आबद्ध छन्। व्यवस्थापन अध्ययन गरेका श्रेष्ठले विभिन्न सङ्घ–संस्थामा व्यावस्थापकीय रूपमा पनि नेतृत्व गरेका छन्।
उनी ०७२ सालको भूकम्पको समयमा तत्कालीन विवेकशील नेपाली दलमा आबद्ध थिए। त्यसको केही समयपछि विवेकशील नेपाली दल र साझा पार्टीबीच एकता भयो। उनी विवेकशील साझा पार्टीको केन्द्रीय सदस्य बने।
०७४ सालमा भएको निर्वाचनमा विवेकशील साझा पार्टीले कुनै पनि स्थानमा जित हासिल गर्न सकेन। तर बाग्मती प्रदेश सभामा भने समानुपातिक मार्फत् ३ जना संसद् पठाउन पाउने भयो। पार्टीले विराजभक्त श्रेष्ठ, रमेश पौड्याल र शोभा शाक्य बाग्मती प्रदेश सभामा सामेल भएका हुन्।
काठमाडौंको इन्द्रचोकमा जन्मिएका विराजभक्तले पछिल्लो समय विवेकशील साझा पार्टी टुटफुटको शृङ्खलापछि राष्ट्रिय स्वतन्त्र पार्टीमार्फत् उम्मेदवारी दिए।
उनले बहालवाला संस्कृती, पर्यटन तथा नागरिक उड्डयन मन्त्री समेत रहेका जीवनराम श्रेष्ठ र गुठी आन्दोलनका अभियन्ता सुमन सायमीलाई पछि पार्दै जित हासिल गरे।
आफूले जिते पछि संसद्मा पनि घण्टी बज्ने उनले जनाएको छन्।
‘अब संसद्मा पनि घण्टी बज्छ। पछाडिका कुराहरू सहजताका साथ लिँदै अगाडि बढ्नुपर्छ। वहाँहरूको योगदानलाई सम्मान गर्छौ,’ विजयपश्चात् विराजले भने।
उनले ६ वर्षअघिसम्म राजनीतिमा आउने सोच राखेका थिएनन्। तर अहिले आफूले जितेको आफैंलाई चमत्कार लागेको उनले बताए।
‘हामी निर्वाचन हुँदै गर्दा आफू जस्ता गैर राजनीतिक पृष्ठभूमि भएकाहरूलाई समेत राजनीतिमा चाख बढेको छ,’ उनले भने, ' उनले भने, '३०औं वर्षदेखि कल्पना गरिएअनुसार देश नपाएकाले हामी आशा लिएर आएका छौँ। अब पहिलेको जस्तो सिस्टमले चल्दैन। सहभागितामूलक ठाउँ बनाउँछौं भनेर नै मलाई आम मानिसले भोट हालेका हुन्।’
उनी आफू ठूलो मतान्तरले जित हासिल गरे पनि त्यो उत्सवको रूपमा नलिएर विनम्र बन्ने प्रेरणा दिएको बताउँछन्। ‘जो मान्छे शक्तिशाली हुन्छ त्यो विनम्र हुन्छ। जो मान्छे भित्रबाट कमजोर हुन्छ त्यो मान्छे आक्रोशित हुने हुन्छ,' उनी भन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
