पूर्वमन्त्री मोहम्मद आफताव आलमका छोरा डा फिरदोष आलम प्रतिनिधि सभा सदस्यमा उम्मेदवार बनेपछि रौतहट- २ सर्वाधिक चर्चामा छ। इँटाभट्टामा जिउँदै मान्छे जलाएको अभियोगको मुद्दाको पुर्पक्षका लागि थुनामा रहेका आफतावका छोरा फिरदोषलाई नेपाली कांग्रेसले उम्मेदवार बनाएपछि यो क्षेत्र चर्चामा आएको हो।
हुन त, बाजे, बुबा हुँदै फिरदोषसम्म आइपुग्दा यो परिवारको ३ पुस्ता राजनीतिमा छ। स्थानीय स्तरबाट अत्यधिक दबाब आएका कारण नै बुबा जेल परेपछि पनि फिरदोष उम्मेदवार बनेको चर्चा छ। निर्वाचनको प्रचारप्रसारका क्रममा रौतहटको नरकटियामा भेटिएका फिरदोषसँग नेपाल लाइभका नवीन झाले गरेको कुराकानी:
तपाईं चिकित्साशास्त्र पढेको र राम्रो सरकारी जागिरमा रहेको व्यक्ति। किन राजनीतिमा हामफाल्नुभयो?
२०७४ को निर्वाचनमा रौतहट- २ का जनताले मेरो बुबा मोहम्मद आफताव आलमलाई अत्यधिक मतका साथ विजय गराए। त्यसपछि तत्कालीन केपी ओली नेतृत्वको सरकारले विभिन्न जालझेल गरेर उहाँलाई फसायो। त्यसपछि यो क्षेत्रका जनता नेतृत्वविहीन हुन पुगे। त्यही भएर बुबाविरुद्धको जालझेल चिर्न र रौतहटलाई नेतृत्वविहीन हुनबाट जोगाउन यो क्षेत्रमा उम्मेदवार बनेको हुँ।
तपाईं बुबाको राजनीतिक बिरासत थाम्नकै लागि राजनीतिमा आएको देखिन्छ। निर्वाचन प्रचासप्रसारको क्रममा जनतामा जाँदा बुबाका बारेमा प्रश्न गर्दैनन्?
यहाँका जनतालाई राम्रोसँग थाहा छ, मेरो बुबा निर्दोष हुनुहुन्छ। जालझेल गरेर फसाइएको हो। नत्र घटना हुनेवित्तिकै यहाँका जनतालाई किन थाहा भएन? घटना जहाँको भनिएको छ, रौतहट राजापुर। त्यहाँ गत वैशाखमा सम्पन्न स्थानीय तह निर्वाचनमा मेरो कान्छो भाइ अत्यधिक मतका साथ मेयरमा निर्वाचित भएका छन्। जनताले आफ्नो मतमार्फत स्थानीय तह निर्वाचन उक्त घटनाको जवाफ दिइसकेका छन्। र, अगामी प्रतिनिधिसभा निर्वाचनमा पुन: जनताले आफ्नो मतबाट त्यसको जवाफ दिँदैछन्।
तपाईं शिक्षित युवा। अहिले राजनीतिमा पुस्तान्तरणको सवाल जबरजस्त रुपमा उठेको छ। तपाईं प्रतिनिधि सभा उम्मेदवार बनेर एकाएक यस क्षेत्रमा आउँदा यहाँका मतदाता तथा स्थानीय नेताहरुले कसरी लिएका छन्?
राजनीतिमा पुस्तान्तरणको सवाल महत्वपूर्ण छ। तर मलाई कसैले श्रीपेच लगाएर राजनीतिमा ल्याएको वा स्थापित गर्न खोजेका होइन। म लोकतान्त्रिक विधि र प्रकियाबाट उम्मेदवार बनेर जनताको घर-घरमा मत माग्दैछु।
अर्को, पुस्तान्तरणको सवालमा म सेवाभावले राजनीतिमा आएको हो। म राम्रो सरकारी जागिर खाइरहेको व्यक्ति सेवाभावसहित राजनीतिमा आएका कारण सबै मतदाताले राम्रो मानेका छन्।
तपाईंको बुबाको विषयमा जे-जस्तो कुरा उठेका छन्, त्यसका बाबजुद कांग्रेसले जोखिम मोलेर तपाईंलाई उम्मेदवार बनाएको भनिन्छ। आफ्नो राजनीतिक भविष्य जोखिमपूर्ण छ जस्तो लाग्दैन?
यो क्षेत्रबाट टिकटका लागि क्षेत्रीय समितिले मेरो बुबाको नाम सर्वसम्मत सिफारिस गरेको थियो। तर केही कानुनी प्रश्न उठेपछि यहीँका अग्रज नेताहरुले मेरो परिवारबाट उम्मेदवार बन्नुपर्छ भन्ने आवाज उठाए। उहाँहरुले मेरो परिवारबाट उम्मेदवार भएमा घरदैलौ गर्न र निर्वाचन जित्न सहज हुने भन्दै मलाई प्रस्ताव गर्नुभयो । त्यसपछि म उम्मेदवार बनेर आएँ। त्यही भएर मलाई मेरो राजनीतिक भविष्यमा जोखिम छ जस्तो लाग्दैन।
तपाईंको बाजे र बुबा नै सांसद र मन्त्री हुनुभयो। एउटा परिवारको तेस्रो पुस्ता राजनीतिमा आउँदा जनतासामु कस्ता अजेण्डा लैजानुभएको छ?
मेरो बाजे र बुबा सांसद र मन्त्री हुँदा यो क्षेत्रमा भएको विकास त तपाईंले हेर्नु भएकै होला। म दाबाका साथ भन्न सक्छु, मधेसको ग्रामीण भेगमा यहाँजत्तिको विकास अन्त कतै भएको छैन। तर म भने आफ्नै अजेण्डा बोकेर राजनीतिमा आएको हुँ।
मेरो बाजे र बुबाका कारण यहाँका गाउँ-टोलका सडक तथा पुलको समस्या छैन। अब यो क्षेत्रलाई कसरी थप विकास गर्ने भन्नेमा मेरो ध्यान केन्द्रित हुनेछ। मेरो प्राथमिकता तीन वटा कुरामा हुन्छ। पहिलो, कृषिका लागि सिचाईं जो यहाँका जनताको मुख्य आवश्यकता हो। दोस्रो, शिक्षाको स्तर र उच्च तहको शिक्षाको व्यवस्था आफ्नै क्षेत्रमा गर्छु। र, तेस्रो, स्वास्थ्यको सवालमा एउटा राम्रो अस्पताल म आफनो निर्वाचनमा बनाउनेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
