काठमाडौं– मंसिर ४ मा हुने प्रतिनिधि सभा निर्वाचनमा खोटाङ जिल्लाबाट नेकपा एमालेबाट विशाल भट्टराई र सत्ता-गठबन्धनबाट माओवादी केन्द्रका रामकुमार राई (पासाङ) प्रतिस्पर्धामा छन्। भट्टराई पाँचौँ पटक प्रतिस्पर्धामा छन् भने राई दोस्रो पटक प्रतिस्पर्धामा होमिएका छन्।
को हुन् विशाल भट्टराई?
५३ वर्षीय भट्टराई नेकपा एमालेका पोलिटब्युरो सदस्य हुन्। २०३८ सालबाट विद्यार्थी राजनीति सुरु गरेका भट्टराई २०५१ मा महेन्द्ररत्न क्याम्पसको स्ववियु सभापति बन्दै २०५४ सालमा अनेरास्ववियुको केन्द्रीय कमिटीको प्रचार विभाग प्रमुख रहेर काम गरेका थिए।
२०५५ सालमा पार्टी राजनीति गर्न खोटाङ फर्किएका भट्टराई २०५६ को प्रतिनिधि सभा सदस्य निर्वाचनमा खोटाङ- २ मा उम्मेदवार भएर पराजित भएका थिए। त्यसयता २०६४, २०७० र २०७४ को निर्वाचनमा प्रतिस्पर्धा गरेका भट्टराई पछिल्ला दुई निर्वाचनमा मात्र विजयी भएका थिए।
भट्टराई पछिल्लो संसद्मा नेकपा एमालेको संसदीय दलको प्रमुख सचेतक रहेका थिए।
को हुन् रामकुमार राई?
५४ वर्षीय राई नेकपा माओवादी केन्द्रका केन्द्रीय सदस्य हुन्। २०३८ सालमा तत्कालीन मालेको विद्यार्थी संगठन अनेरास्ववियुबाट राजनीतिक यात्रा सुरु गरेका राई २०४९ सालमा गोपाल किराँती नेतृत्वको खम्बुवान राष्ट्रिय मोर्चामा आवद्ध भएर भूमिगत राजनीतिमा सक्रिय रहेका थिए।
२०५९ मा खम्बुवान र माओवादीबीच एकीकरण भएपछि राई जनयुद्ध गरिरहेको तत्कालीन नेकपा माओवादीको सैन्य विभागको सोलु-सल्लेरी बिग्रेड कमिसारसम्म भएका थिए।
राई २०६४ मा भएको पहिलो संविधान सभा निर्वाचनमा खोटाङ- १ बाट निर्वाचित भएका थिए। संविधान जारी भएपछि २०७४ को प्रदेश सभा निर्वाचनमा उनी खोटाङ- १ (ख) बाट निर्वाचित भएका थिए। राई प्रदेश १ को वर्तमान खानेपानी, तथा सिंचाइ तथा ऊर्जा मन्त्री पनि हुन्।
के छ अंकगणित?
१ लाख ४२ हजार ७९२ मतदाता रहेको खोटाङमा सत्ता-गठबन्धन र एमालेका उम्मेदवारबीच प्रतिस्पर्धा हुने देखिएको छ। दस स्थानीय तह रहेको जिल्लामा गत वैशाखमा सम्पन्न स्थानीय तहको निर्वाचनमा आठ स्थानीय तह गठबन्धनले जितेको थियो।
स्थानीय तह निर्वाचनमा वडाध्यक्षमा खसेको मतलाई आधार मानेर हेर्दा कांग्रेस उम्मेदवारले २६ हजार ६३३, माओवादी केन्द्रले १८ हजार ७३६, एकीकृत समाजवादीले २ हजार १४४ मत प्राप्त गरेका छन्।
यसरी हेर्दा स्थानीय तहको निर्वाचनमा वडाध्यक्षका लागि खसेको मतका आधारमा वाम-लोकतान्त्रिक गठबन्धनको ४७ हजार ५१३ मत र एमालेको २८ हजार ७९७ मत रहेको छ।
उक्त आँकडाले गठबन्धन बलियो देखिन्छ तर त्यसयताको राष्ट्रिय राजनीति र उम्मेदवारको प्रतिबद्धताले आसन्न निर्वाचनको नतिजा तय गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
