उदयपुर– सिट बाँडफाँटका सन्दर्भमा सत्ता गठबन्धनमा लामो रस्साकस्सीका बीच उदयपुर- २ आफ्नो भागमा पारेपछि एकीकृत समाजवादी उत्साहित बनेको थियो। गत स्थानीय चुनावमा देखिएको उत्साहजनक मत र त्यसमाथि गठबन्धनको समर्थन हुने भएपछि यो क्षेत्र समाजवादीका लागि ‘ग्रीन जोन’ देखियो।
२०७४ को चुनावमा जित हासिल गरेको उक्त क्षेत्र यसपटक पनि आफ्नै भागमा पार्न माओवादी केन्द्रले पनि लामै जोडबल गरेको थियो। यस क्षेत्रका निवर्तमान प्रतिनिधि सभा सदस्य सुरेशकुमार राई (हिमाल) ले अन्तिमसम्म पनि आफ्नो दावी नछाडेपछि केन्द्रबाटै हस्तक्षेप गरेर समाजवादीलाई टिकट दिइएको थियो।
समाजवादीका उपमहासचिव तथा प्रचार विभाग प्रमुख जगन्नाथ खतिवडा आफ्नो निर्वाचन क्षेत्र पुग्दा निकै उत्साहित देखिए। उत्साहित हुनु पनि स्वभाविक थियो। गत वैशाखमा भएको स्थानीय चुनावको परिणामलाई केलाउँदा उनी सहज जितको नजिक देखिएका थिए।
तर, अहिले स्थिति बदलियो। ग्रिन जोनमा देखिएका खतिवडा अहिले ढुक्क हुने अवस्थामा छैनन्। गठबन्धनबाट खतिवडाले टिकट पाएपछि असन्तुष्ट बनेका क्षेत्र नम्बर २ का कांग्रेस नेता रामकुमार राईले स्वतन्त्र उम्मेदवारी दिए।
उम्मेदवारीपछि दसैंको मुखमा आफ्नो निर्वाचन क्षेत्र पुगेका खतिवडाले कटारी बजारमा रहेको गठबन्धनको सम्पर्क कार्यालय अगाडि स्थानीय शुभचिन्तकसँग सल्लाह माग्दै भने- उम्मेदवारी त दिइयो अब के चाहिँ गर्नु पर्ला?
सायद खतिवडाले ती शुभचिन्तकबाट कुनै विकासे अजेण्डाहरु आउने अपेक्षा गरेका थिए। तर शुभचिन्तकको सल्लाह भने अनपेक्षित आयो। ‘पहिलो कुरा त रामकुमारलाई उम्मेदवारी फिर्ता गराउन लगाउनूस्। बाँकी कुरा त्यसपछि गरौंला,’ शुभचिन्तकले खतिवडालाई सुझाए।
‘त्यो त छँदैछ’ भनेका खतिवडालाई उनै शुभचिन्तकले दिएको सुझाव पूरा गर्न नसक्दा आससँगै त्रास पनि देखिएको छ। ‘रामकुमार फ्याक्टर’ ले खतिवडाको संसद् छिर्ने सम्भावना के हुन्छ भन्ने अन्योल पारिदिएको छ।
सुरुवाती क्रममा एक पक्षीय देखिएको उदयपुरको क्षेत्र नम्बर २ रामकुमार राईको स्वतन्त्र उम्मेदवारीले अहिले निकै रोचक प्रतिस्पर्धा हुने संघारमा पुगेको छ।
एमालेबाट छुटिट्एपछि पहिलो पटक केन्द्रीय चुनावमा आफ्नो स्थानको मूल्यांकन गर्न निर्वाचनमा होमिएको एकीकृत समाजवादीलाई दावी गरेजस्तो सजिलो छैन। प्रदेश १ मा सत्ता गठबन्धनबाट प्रतिनिधि सभामा २ स्थान पाएको समाजवादीलाई उदयपुर- २ मा दावी गरेजस्तो जित हात पार्न सहज छैन।
१० जना दलका र २ स्वतन्त्र गरी १२ जना उम्मेदवार रहेको यो क्षेत्रमा स्वतन्त्र उम्मेदवार राईको अवस्था पनि राम्रो रहेकाले त्रिपक्षीय प्रतिस्पर्धा हुने देखिएको छ।
पार्टीको उपमहासचिव तथा प्रचार विभाग प्रमुख समेत रहेका खतिवडालाई यस क्षेत्रमा सत्ता गठबन्धका कांग्रेस र माओवादी केन्द्रले सघाउने सहमति छ।
भर्खरै जन्मिएको पार्टीको संगठन कमजोर भए पनि कांग्रेस र माओवादीको समर्थनमा आफू सहजै चुनाव जित्ने दावी खतिवडाले गरेका छन्। सत्ता गठबन्धन कायम रहने र समाजवादीका माथिल्लो तहका नेता भएकाले खतिवडाले मन्त्री भएर यस क्षेत्रमा विकास गर्ने आश्वासनका साथ गठबन्धन निर्वाचनको प्रचारमा दौडिएको छ। तर खतिवडालाई त्यति सजिलो भने छैन।
सत्ता गठबन्धन र पार्टीमै पटकपटक विद्रोह गरेका कांग्रेसका पुराना नेता रामकुमार राईले स्वतन्त्र उम्मेदवारी दिएपछि यस क्षेत्रमा कसले बाजी मार्ने हो भन्ने आकलन गर्न गाह्रो छ।
कांग्रेसको क्षेत्रीय सभापति भइसकेको, २०५४ सालमा कटारी गाविसको चुनाव जितेर लगातार जनताको काममा लामो समय काम गरेकाले आफ्नो जित सुनिश्चत रहेको राईको दावी छ। जनताको मनोभावनालाई पार्टीहरुले घात गरेपछि आफू मैदानमा आएको र इमान्दार कांग्रेस कार्यकर्ताको सहयोग भएकाले चुनाव जित्ने उनको दावी छ। गठबन्धन दल कांग्रेसको समेत केही भोट राईले काट्ने देखिएपछि यस क्षेत्रको चुनावी परिणाम अनपेक्षित आउन सक्ने आकलन गरिएको छ।
२०५६ सालमा चुनाव जितेर गए पनि त्यसपछि यस क्षेत्रमा नफर्किएको र विकासमा चासो नदिएको आरोप खतिवडामाथि छ। लामो समय राजनीतिमा क्रियाशील खतिवडा जनतामाझ आइनपुगेको दावी गर्दै नेकपा एमालेले यस पटक खतिवडालाई हराउन सहज भएको दावी गरेको छ।
एमालेबाट यस क्षेत्रमा प्रदेश सचिवालय सदस्य अम्बरबहादुर रायमाझीले उम्मेदवारी दिएका छन्। बागी उम्मेदवारी दिएका राईले गठबन्धनको मत काट्ने र खतिवडाको मत यस क्षेत्रमा नभएकाले आफ्नो जित सुनिश्चित रहेको रायमाझीको दावी छ।
उदयपुर- २ मा माओवादीका पालिका प्रमुखका उम्मेदवारले ल्याएको कुल मत ८ हजार १४३ छ। त्यस्तै एकीकृत समाजवादीका उम्मेदवारले ल्याएको कुल मत ४ हजार ९६४ छ भने कटारी नगरपालिकामा उपमेयरमा मात्र उम्मेदवारी दिएको समाजवादीले ३ हजार ७२३ मत ल्याएको थियो।
एउटा पालिकामा उम्मेदवारी दिएको कांग्रेसले ६ हजार ४१७ मत ल्याएको थियो। एमालेले कुल १६ हजार ५१४ मत ल्याएको थियो भने गठबन्धनले ल्याएको मतको अंकगणित गर्दा एमालेभन्दा गठबन्धन ६ हजार ७११ मतले अगाडि छ।
५ स्थानीय तहमध्ये यस क्षेत्रमा ४ गाउँपालिका र एक नगरपालिका छन्। जसमा जम्मा ९३ हजार ४ सय २१ मतदाता छन्। यी मतदाताको मन जित्दै प्रतिनिधि सभामा जाने तयारीका लागि निर्वाचनमा होमिएका यी तीन उम्मेदवारमध्ये कसले बाजी मार्छ भन्ने आकलन गर्न सकिने अवस्था छैन।
आ-आफ्नै दावी रहे पनि तीनै उम्मेदवारले मतदातासमक्ष नयाँ र फरक चुनावी नारा र प्रतिवद्धता ल्याउन सकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768049575.png)
-1764146706.png)
