काठमाडौं- मंसिर ४ गते हुने प्रतिनिधि सभा निर्वाचनमा ६८ वर्षभन्दा बढी उमेरका १ सय २० जना उम्मेदवार चुनावी मैदानमा छन्। त्यस्तै पाका उमेरका उम्मेदवारमध्ये एक हुन्, राष्ट्रिय जनमोर्चाका अध्यक्ष चित्रबहादुर केसी।
बाग्लुङ- १ मा सत्ता गठबन्धनको साझा उम्मेदवार ८० वर्षीय केसीलाई नेपाली कांग्रेस, नेकपा माओवादी केन्द्र र एकीकृत समाजवादीले साथ दिएका छन्।
उनको प्रतिस्पर्धीका रुपमा नेकपा एमालेका निर्वतमान सांसद सूर्य पाठक मैदानमा छन्। पाठक २०७४ सालको निर्वाचनमा वाम गठबन्धनवाट उक्त क्षेत्रमा निर्वाचित भएका थिए।
२०७४ सालमा केसी समानुपातिकमा बसेका थिए। त्यो बेला राष्ट्रिय जनमोर्चाले प्युठानमा एमालेसँग तालमेल गर्दै उम्मेदवार उठाएको थियो। राजमोले निर्वाचनको थ्रेसहोल्ड कटाउन नसकेपछि उनी सांसद हुनबाट वञ्चित भए।
को हुन् चित्रबहादुर?
केसी राष्ट्रिय जनमोर्चाका अध्यक्ष हुन्। नेपालको कम्युनिस्ट आन्दोलनमा दशकौंदेखि सक्रिय र परिचित उनी पटक-पटक सांसद भइसकेका छन्।
२०७२ मा गठित केपी ओली नेतृत्वको सरकारमा उनी उपप्रधानमन्त्री तथा गरिबी निवारण मन्त्री भएका थिए। २०७४ सालको निर्वाचनमा एक सिट रहेको जनमोर्चाले केपी शर्मा ओली नेतृत्वको नेकपा एमालेलाई सर्मथन गरेको थियो।
को हुन् पाठक?
४६ वर्षीय पाठक नेकपा एमालेका केन्द्रीय सदस्य हुन्। २०४५ मा विद्यार्थी संगठबाट राजनीति सुरु गरेका उनी केही समय अध्ययनका लागि मुलुकबाहिर रहेका थिए। त्यहाँबाट फर्किएसँगै उनी पुनः राजनीतिमा सक्रिय भएका थिए।
पाठक २०७४ को प्रतिनिधि सभा निर्वाचनमा पनि बाग्लुङ- १ बाटै निर्वाचित भएका थिए। उनले ३३ हजार ६५७ मत ल्याउँदै जित हात पारेका थिए भने कांग्रेसकी चम्पादेवी खड्काले २० हजार ६१६ मत प्राप्त गरेकी थिइन्।
बागलुङ- १ अन्तर्गत दुई नगरपालिका र दुई गाउँपालिका गरी चार स्थानीय तह पर्छन्। जसमा बाग्लुङ नगरपालिका, जैमिनी नगरपालिका, वरेङ गाउँपालिका र काठेखोला गाउँपालिका छन्।
स्थानीय तहमा बाग्लुङ नगरपालिका प्रमुख कांग्रेस र उपप्रमुख माओवादीले जितेको छ। जैमिनी नगरपालिका प्रमुख जनमोर्चाले र उपप्रमुख कांग्रेसले जितेको छ।
यस्तै काठेखोला गाउँपालिका प्रमुख कांग्रेस र उपप्रमुख जनमोर्चाले जितेको छ। वरेङ गाउँपालिका प्रमुख जनमोर्चा र उपप्रमुख कांग्रेसले जितेको छ। वैशाख ३० गते भएको स्थानीय निर्वाचनमा सत्ता गठबन्धनसँग मिलेर जनमोर्चाले उम्मेदवार उठाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
