काठमाडौं– काठमाडौं महानगरपालिका वडा २८ मा रहेको खुला मञ्चमा ट्रिपल बेसमेन्ट पार्किङ र पानी पुर्नभरण पिटको विस्तृत परियोजना प्रतिवेदन तयार गरिने भएको छ। मंगलबार महानगरका प्रमुख बालेन्द्र शाह (बालेन)को अध्यक्षतामा राष्ट्रिय सभा गृहमा बसेको १० औँ कार्यपालिका बैठकले नगर विकास कोषको प्राविधिक सहयोगमा यससम्बन्धी काम गर्ने प्रस्ताव पारित गरेको हो।
बैठकले सहकारी क्षेत्र हेर्नका लागि छुट्टै समिति गठन गर्ने निर्णय गरेको छ। कार्यपालिकाअन्तर्गत अहिले १२ वटा समिति छन्। यसमा विषयविज्ञसहितको एउटा समिति थप हुनेछ। बैठकमा प्रमुख शाहले यसको जानकारी गराएको महानगरले जनाएको छ।
बैठकमा पेश भएको खरिद नियमावली स्वीकृत गर्ने सम्बन्धको प्रस्तावमा प्रमुख शाहले निश्चित सीमासम्मका योजनाहरू वडा आफैँले खरिद गर्न सक्ने बनाउन लागिएको बताए। विकेन्द्रीकरणलाई व्यवहारिक रुपमा कार्यान्वयन गराउने प्रयास स्वरुप यस्तो व्यवस्था गर्न लागिएको उनको भनाइ छ। यस विषयमा थप छलफल गरेर अर्को बैठकमा पेश गरिनेछ। नियमावलीमा वडा र केन्द्रको खरिद प्रक्रिया, मूल्याङ्कन र कार्यान्वयन सम्बन्धी व्यवस्था प्रस्ताव गरिएको उनले बताए।
बैठकले काठमाडौं उपत्यका सार्वजनिक यातायात प्राधिकरण ऐन कार्यान्वयन गर्न कार्यविधि बनाउने, महिला स्वास्थ्य स्वयम्सेविकासम्बन्धी कार्यविधि बनाउनेलगायत निर्णय गरेको छ। यस्तै सामाजिक विकास विभागअन्तर्गत विकास सहायता कार्यविधिले तोकेका काम गर्न आवश्यक पर्ने सामग्रीसहित ४२ शीर्षकका दररेट स्वीकृत गरेको छ।
कार्यपालिकाको बैठकले महानगरअन्तर्गतका ८९ वटा सामुदायिक विद्यालय र १६ वटा बैकल्पिक महिला विद्यालयसहित १०५ वटा विद्यालयका छात्रालाई सेनिटरी प्याड व्यवस्थापन गर्न सशर्त अनुदान रकम उपलब्ध गराउने निर्णय गरेको छ।
कक्षा ६ देखि १२ सम्मका छात्रालाई प्याड उपलब्ध गराउने विद्यालय क्षेत्र विकास कार्यक्रमअन्तर्गत संघीय सरकारबाट चालु आर्थिक बर्षमा करिब १ करोड ६५ लाख रुपैयाँ महानगरलाई प्राप्त भएको छ। विद्यालयको शैक्षिक व्यवस्थापन सूचना प्रणाली (आईईएमआईएस) मा दर्ता भएका लाभग्राही छात्राहरूको संख्याका आधारमा निकासा हुनेछ। यसमा प्रति छात्रा करिब ९ सय ८४ रुपैयाँ पर्छ।
प्रयोग भइसकेका प्याडको व्यवस्थापन गर्न सेनेटरी प्याड इन्सिनेटर खरिद प्रक्रिया हुनेछ। बैठकमा उपप्रमुख सुनिता डंगोलले भनिन्, ‘प्याड प्राप्त गर्ने र इन्सिनेटर प्राप्त गर्ने छुट्टाछुट्टै कार्यक्रम हुन्।’
बैठकले डोटी जिल्लाको पूर्वी चौकी गाउँपालिकालाई भूकम्पीय क्षति व्यवस्थापनमा सघाउ पु्र्याउन १० लाख रुपैयाँ सहयोग गर्ने, वडा एक पालिका एक भगिनी सम्बन्ध कार्यक्रमअन्तर्गत बाँकी रहेका प्रदेशबाट विकट पालिका छनोट गर्ने, सहरी स्वास्थ्य केन्द्रको स्तरोन्नतिका लागि आवश्यक समन्वय गर्ने, सफाई कर्मचारी सेवा करारमा लिनेलगायत निर्णय गरेको छ। यसैगरी वडा नम्बर ७ मा सञ्चालन भएको चन्द्रविनायक जात्राका लागि १२ लाख रुपैयाँ वडामा निकासा पठाउने निर्णय भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1778551198-1778552039.jpeg)
-1764146706.png)
-1779545841.jpg)
