काठमाडौं- यतिखेर सामाजिक सञ्जालमा एउटा भिडियो भाइरल छ। उक्त भिडियोमा बच्चा लिएर बारीमा कोदो टिपिरहेकी महिलासँग उम्मेदवारले ‘भोट हाल्न नसके जानु पर्दैन’ भनेर संवाद गरेको देखिन्छ।
यसरी महिलासँग कुराकानी गर्ने व्यक्ति हुन्, गोरखा– १ का नेपाली कांग्रेसका उम्मेदवार राजेन्द्र बजगाईं।
बजगाईं– कोदो टिपेको, नल काटेको?
महिला– कोदो टिपेको।
बजगाईं– दुःख छ?
महिला– दुःख छ।
बजगाईं– हामी त भोट माग्न आएको। यति सानो नानी रहेछ, कसरी आउनु। नसके नआउनु है।
महिला– हस्।
मंसिर ४ गतेको निर्वाचनमा आफू रुख चिह्नबाट उठेको भन्दै परिचय दिन्छन् अनि मत मागेर हिँड्छन् बजगाईं।
माओवादी केन्द्रका अध्यक्ष पुष्पकमल दाहाल प्रचण्ड चितवन छोडेर गोरखा गएपछि यो जिल्ला चर्चाको केन्द्रमा छ। प्रचण्ड गोरखा–२ बाट उम्मेदवार बनेपछि गोरखा– १ भने ओझेल परेको छ। उक्त क्षेत्रमा सत्ता गठबन्धनका तर्फबाट बजगाईं र नेकपा एमालेबाट रामशरण बस्नेत उम्मेदवार छन्। उनीहरु दुवै परिचित प्रतिस्पर्धी हुन्।
२०७४ सालको निर्वाचनमा यही क्षेत्रको प्रदेश सभा खमा प्रतिस्पर्धा गरेका उनीहरुमध्ये बस्नेतले बाजी मारेका थिए। बजगाईंले ५ वर्षअघिको हारको बदला लिनु छ भने बस्नेत जितको दबदबा कायमै राख्ने चुनौतीका साथ मैदानमा छन्।
गण्डकी प्रदेश सभामा मन्त्री समेत भएका बस्नेत बाटो नै नभएको स्थानमा पुल बनाएको भन्दै चर्चा र विवादमा पनि परेका थिए।
२०७४ सालको निर्वाचनमा बस्नेतले १६ हजार ६५६ मत पाएर विजयी भएका थिए भने बजगार्इंले १३ हजार १ मत पाए। उक्त निर्वाचनमा प्रतिनिधि सभातर्फ कांग्रेसका चिनकाजी श्रेष्ठ उम्मेदवार थिए भने वाम गठबन्धनका तर्फबाट एमाले र माओवादीले हरिराज अधिकारीलाई साझा उम्मेदवार बनाएका थिए। प्रतिनिधि सभामा माओवादी केन्द्रका अधिकारीले जित हात पारेका थिए।
यस पटकको निर्वाचनमा ठिक उल्टो भएको छ। नेकपा एमाले एक्लै लडेको छ भने कांग्रेस, माओवादी केन्द्र र एकीकृत समाजवादी गठबन्धन गरेर निर्वाचनको मैदानमा छन्। यसको फाइदा उठाउँदै जित हात पार्ने दाउमा बजगाईं रहेका छन् भने उनलाई रोकेर प्रदेशबाट प्रतिनिधि सभामा उक्लिने रणनीतिमा बस्नेत छन्।
स्थानीय मत ४० हजारको फरक
गत वैशाखमा भएको स्थानीय तह निर्वाचनको मत परिणाम हेर्दा गोरखा– १ मा नेपाली कांग्रेस पहिलो छ। कांग्रेसले २७ हजार ८४ मत पाएको छ भने माओवादी केन्द्रको २५ हजार ४७२ मत छ। दुई दलको मत परिणामसहित नेसपा र समाजवादीको मत जोड्दा ५५ हजारभन्दा बढी मत गठबन्धनको पक्षमा देखिन्छ। एमालेको मत १४ हजार ५ सय ६६ छ। एमालेभन्दा सत्ता गठबन्धन ४० हजारभन्दा बढी मतले अगाडि देखिन्छ।
१ लाख १५ हजार हाराहारीमा मतदाता रहेको यस क्षेत्रको प्रदेश कमा गठबन्धनले माओवादी केन्द्रका तर्फबाट कृष्ण धिताल र प्रदेश खमा नेपाली कांग्रेसका गोरखा सभापति समेत रहेका नन्दप्रसाद न्यौपाने उम्मेदवार छन्।
बजगाईंको २५ बुँदे प्रतिबद्धता
‘विकासका लागि राजनीति’ नारासहित बजगाईले २५ बुँदे प्रतिवद्धता अघि सारेका छन्। आफू संसद् बनेपछि राष्ट्रिय गौरवको योजनाका रुपमा रहेको बुढीगण्डकी जलविद्युत आयोजना निर्माण गर्नेदेखि बेनिघाट, आरुघाट, लार्के सडक निर्माण गरी त्रिदेशीय व्यापारबाट मुलुकको आर्थिक समृद्धिको ढोका खुलाउने उनको दावी छ।
मनास्लु तथा धार्चे क्षेत्रलाई राष्ट्रिय, अन्तर्राष्ट्रिय पर्यटकको हब बनाउने, चुमभ्यालीमा प्रचलित स्याक्या तथा नुब्री भ्याली र धार्चे क्षेत्रका गुरुङ, घले, भोटेलामा समुदायमा प्रचलित मौलिक संस्कृति र परम्परालाई राष्ट्रिय पहिचान दिई, त्यहाँको धार्मिक, ऐतिहासिक र पर्यापर्यटनको विकास गर्ने आफ्नो प्राथमिकता हुने उनको दावी छ।
केरौँजा, श्याम्चेत, खानीगाउँ लगायतका पहिरोबाट उच्च जोखिममा रहेका बस्तीका बासिन्दालाई पूर्वाधारयुक्त ठाउँमा स्थानान्तरण गर्न प्रयत्न गर्ने, सुकुम्बासी तथा अव्यवस्थित बसोबासीको दशकौंदेखिको समस्या समाधानका लागि अग्रणी भूमिका निर्वाह गर्ने, विकास निर्माण तथा स्थानीय आवश्यकतामा पर्याप्त छलफल र परामर्श गरी कार्यक्रम अघि बढाइने उनको प्रतिवद्धता छ।
गोरखकाली, गोरखनाथ, मनकामना, भीमवीरेश्वर मन्दिर क्षेत्र र तल्लो दरबार क्षेत्रलाई प्रवद्र्धन गर्दै उत्कृष्ट धार्मिक तथा ऐतिहासिक पर्यटकीय गन्तब्यको रुपमा विकास गर्ने उनको दावी छ।
जिल्लाका वडादेखि पालिका जोड्ने सडकहरुको स्तरोन्नति गर्ने, स्तुलखोला, खोर्लाखोला, बुढीगण्डकी, स्यार लगायतका विभिन्न नदी, खोलाका आवश्यक ठाउँ र बस्ती क्षेत्र जोड्ने ठाउँमा पक्की पुल निर्माणमा पहल गर्ने आफ्नो प्रमुख दायित्व रहेको उनको दावी छ।
निषेधित मनास्लु क्षेत्रलाई खुला गर्ने, आपतकालीन हेलिउद्धार गर्न हटलाइन अनुमतिको व्यवस्था ग्यारेन्टी गर्ने, जडिबुटीबाट आर्थिक समृद्धिको प्रचुर सम्भावनाको ढोका खुलाउन पहल गर्ने उनको प्रतिवद्धतामा उल्लेख छ।
रामशरण बस्नेतका अजेण्डा
प्रदेश सांसदको रुपमा सुरु गरेका काम केन्द्रबाट पुनः राष्ट्रिय महत्वका आयोजनाहरु यस क्षेत्रमा ल्याउने दावी बस्नेतले गरेका छन्। उनले आफ्नो प्रतिवद्धतामा प्रदेशमा मन्त्री रहँदा रहेका कामहरुलाई निरन्तरता दिने र विकासका अन्य कार्यक्रम पनि सञ्चालन हुने दावी गरिएको छ।
भौतिक पूर्वाधार विकास मन्त्री समेत भएका बस्नेतले आफू निर्वाचित हुनुपर्नाका कारणहरु मतदाता सामु उल्लेख गरेका छन्। बस्नेतले समृद्ध नेपाल, सुखी नेपालीको सपना साकार पार्न आफू यस क्षेत्रको उम्मेदवार बनेको दावी उनले गरेका छन्।
रुइला नाका सडक निर्माण सम्पन्न गर्ने, एक निर्वाचन क्षेत्र एक पक्की सडक, एक प्रदेश निर्वाचन क्षेत्र एक प्राविधिक शिक्षालय, पालिकास्तरीय स्वास्थ्य चौकीबाट गुणस्तरीय स्वास्थ्य सेवा प्रदान गर्न पहल गर्ने उनी बताउँछन्। एकघर एक धाराको अवधारणा अनुसार काम गर्न, कृषिमा आधुनिकीकरण गरी उत्पादन वृद्धिसहितको रोजगारी सिर्जना गर्न, धार्मिक, सांस्कृतिक, पुरातात्विक लगायतका पर्यटकीय क्षेत्रको प्रवद्र्धन गर्ने कार्यभार पूरा गर्न आफू यस क्षेत्रको उम्मेदवार भएको उनले बताएका छन्।
खेल क्षेत्रलाई प्रवद्र्धन गर्न एक वडा एक खेल मैदान निर्माण गर्ने, सूचना सञ्चारलाई आमजनताको पहुँचमा पु¥याउन, राष्ट्रिय गौरवको बुढीगण्डकी आयोजनालाई कार्यान्वयन गर्न आफू यो क्षेत्रको उम्मेदवार बनेको बस्नेतको दावी छ।
सामाजिक सुरक्षासहितको न्याय, शान्ति, सुशासन र भयरहितको सुसंस्कृत समाज निर्माण गर्ने, युवालाई स्वरोजगार बनाउने काम आफ्नो प्रमुख प्राथमिकतामा रहने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
