काठमाडौं- गण्डकी प्रदेशको पहिलो मुख्यमन्त्री पृथ्वी सुब्बा गुरुङ लमजुङबाट प्रतिनिधि सभाका लागि उम्मेदवार छन्।
आसन्न निर्वाचनमा प्रदेश सभामै उम्मेदवारी दिने मनस्थितिका बाबजुद नेकपा एमाले नेतृत्वले प्रतिनिधि सभाकै उम्मेदवार बनाएपछि उनी प्रतिस्पर्धाका लागि तीव्र तयारीमा छन्। उनका प्रतिस्पर्धी छन्, नेकपा माओवादी केन्द्रका नेता देवप्रसाद गुरुङ।
दुई कम्युनिष्ट पार्टीका प्रभावशाली नेताको भिडन्तका कारण लमजुङको निर्वाचन रोचक बनेको छ।
को हुन् पृथ्वी सुब्बा गुरुङ?
६४ वर्षीय गुरुङ एमालेका उपमहासचिव हुन्। उनी गण्डकी प्रदेशका पूर्वमुख्यमन्त्री पनि हुन्। नेपालमा संघीयता लागू भएपछि २०७४ को निर्वाचनमा भने उनी प्रदेश सभातर्फ सांसद बनेर गण्डकी प्रदेशको मुख्यमन्त्री बनेका हुन्। गुरुङ २०७४ देखि २०७७ सम्म सो प्रदेशको मुख्यमन्त्री बनेका थिए।
गुरूङले २०४८ पछिका सबै निर्वाचनमा उम्मेदवारी दिएका छन्। त्यसो त उनले २०४३ मा पञ्चायतको विरोध गर्दै तत्कालीन भूमिगत पार्टीबाट उम्मेदवारी दिएका थिए। उनी जेलमा थिए। तर पञ्चायतको विरोध गर्ने नीतिले पार्टीको तर्फबाट उम्मेदवारी दिएका थिए।
२०४८, २०५३, २०५६, र २०७० को दोस्रो संविधान सभा निर्वाचनमा उनले पराजय बेहोरेका थिए। २०६४ मा भएको पहिलो संविधान सभा निर्वाचनमा भने गुरुङ लमजुङ- २ बाट निर्वाचित भएका थिए।
उनी २०६३ मा संस्कृति, पर्यटन तथा नागरिक उड्ययन मन्त्री पनि बनेका थिए।
को हुन् देवप्रसाद गुरुङ?
६४ वर्षीय गुरुङ माओवादी केन्द्रका महासचिव हुन्। २०३६ मा नेकपा चौमबाट राजनीति अगाडि बढाएका उनले नेकपा मशाल हुँदै तत्कालीन नेकपा माओवादीद्वारा सञ्चालित जनयुद्धमा नेतृत्वदायी भूमिका निर्वाह गरेका थिए।
दोस्रो जनआन्दोलनपश्चात् २०६३ मा तत्कालीन पुनर्स्थापित ससद्को अन्तरिम व्यवस्थापिका सदस्य समेत भएका उनी २०६४ को निर्वाचनमा कास्की- १ र मनाङबाट निर्वाचित भएका थिए।
त्यसो त, गुरुङले बहुदल स्थापनापछि २०४८ मा भएको पहिलो आम निर्वाचनमा लमजुङ- १ बाट संयुक्त जनमोर्चा नेपालबाट उम्मेदवारी दिएका थिए। तर उक्त निर्वाचनमा भने उनी पराजित भएका थिए।
२०६९ मा भएको पहिलो संविधान सभा विघटनसँगै तत्कालीन एकीकृत माओवादी फुटेपछि गुरुङ मोहन वैद्य नेतृत्वको नयाँ कम्युनिष्ट पार्टीमा गएका थिए। वैद्य नेतृत्वको दलले निर्वाचन बहिस्कार गरेपछि २०७० को निर्वचनमा गुरुङ सहभागी भएका थिएनन्।
२०७२ मा पुन: प्रचण्ड नेतृत्वकै माओवादीका फर्किएपछि २०७४ मा भएको निर्वाचनबाट उनी प्रतिनिधि सभामा लमजुङबाट निर्वाचित भएका थिए। उनी स्थानीय विकास र कानुन, न्याय तथा संविधानस सभा व्यवस्था मन्त्री भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
