काठमाडौं- सुदूरपूर्वको तल्लो भेग मेची किनारवारिको निर्वाचन क्षेत्र झापा- १ मा चुनावी सरगर्मी यति महत्त्वको छ कि यहाँका मुख्य प्रतिस्पर्धी पहिलोपटक जनताको प्रत्यक्ष मतबाट अनुमोदित हुने प्रयत्नमा छन्।
यो क्षेत्रका मुख्य प्रतिस्पर्धी हुन्, कांग्रेसका महामन्त्री विश्वप्रकाश शर्मा र नेकपा एमालेका स्थायी कमिटी सदस्य अग्नीप्रसाद खरेल। खरेल पहिलो पटक उम्मेदवार भएर निर्वाचनको मैदानमा छन् भने शर्मा विगतका दुई निर्वाचनमा उम्मेदवार भएर पनि पराजित भएका थिए। शर्मा यस पटक पहिलेको हारलाई जितमा बदल्ने अभियानमा छन्।
कानुन क्षेत्रका परिचित खरेल यसअघि दुई पटक सांसद र महान्यायाधिवक्ता भएका छन्। उनी कानुनमन्त्री समेत भएका थिए।
शर्मा पार्टी राजनीतिमा महत्त्वपूर्ण महामन्त्री पदमा निर्वाचित भएर चुनावी मैदानमा छन्। दुवैका बीचमा रोचक प्रतिस्पर्धा हुने आकलन गरिएको छ।
को हुन् शर्मा?
५२ वर्षीय शर्मा नेपाली कांग्रेसका महामन्त्री हुन्। नेपाल विद्यार्थी संघबाट विद्यार्थी राजनीति सुरु गरेका शर्मा २०५७ मा नेविसंघको केन्द्रीय सभापति भएका थिए। त्यसलगत्तै पार्टी राजनीति गर्न झापा झरेका शर्मा जिल्ला सभापतिको प्रतिस्पर्धामा पराजित भए।
करिब २ दशकदेखि यही क्षेत्रमा केन्द्रित शर्मा जनताबाट यो निर्वाचनबाट अनुमोदित भएर संसद् प्रवेश गर्न चाहन्छन्। यसअघि शर्मा २०७० र २०७४ को निर्वाचनमा यही क्षेत्रबाट उम्मेदवारी दिएर पराजित भएका थिए।
२०७४ को निर्वाचनमा वाम गठबन्धन गरेर माओवादी केन्द्रका उम्मेदवार राम कार्कीले शर्मालाई पराजित गरेका थिए। शर्माले ३३ हजार ३१० मत प्राप्त गर्दा कार्की ३६ हजार १७३ मत ल्याएर विजयी भएका थिए।
त्यसअघि २०७० को निर्वाचनमा शर्माले एमाले नेता रविन कोइरालासँग पराजय ब्यहोरेका थिए।
कांग्रेसको पछिल्लो महाधिवेशनबाट महामन्त्रीमा निर्वाचित भएका शर्मा त्यसअघिको कमिटीमा नेपाली कांग्रेसको प्रवक्ताको जिम्मेवारीमा थिए।
को हुन् खरेल?
६१ वर्षीय खरेल नेकपा एमालेका स्थायी कमिटी सदस्य हुन्। विद्यार्थी संगठनबाट राजनीति सुरु गरेका खरेल अधिवक्ता भएसँगै पार्टी निकट कानुन व्यवसायी संगठनबाट राजनीतिलाई निरन्तरता दिएका थिए।
दुई वटै संविधान सभामा सरकारबाट मनोनित सभासद भएका खरेल केपी ओली नेतृत्वको अघिल्लो सरकारमा कानुन मन्त्रीको जिम्मेवारीमा थिए। केपी ओलीले २०७४ मा पुन: सरकारको नेतृत्व गर्दा उनै खरेललाई नेपाल सरकारको महान्याधिवक्ता बनाएका थिए।
खरेलले २०७७ फागुनमा महान्याधिवक्ताको पदबाट राजीनामा दिएर निर्वाचनको तयारीका लागि झापा फर्केका थिए। उनी झापा- २ मा केन्द्रित थिए।
पार्टी केन्द्रले मनोनयन दर्ता गर्ने पूर्वसन्ध्यामा क्षेत्र परिवर्तन गराएर क्षेत्र नम्बर १ मा पुर्याएपछि खरेल यो क्षेत्रका आम मतदातासमक्ष नयाँ परिचय दिएर मत माग्दै छन्।
दुई-दुई पटक सांसद भएसके पनि खरेल जनताको प्रत्यक्ष मतबाट पहिलो पटक निर्वाचित हुने प्रयत्नमा छन्।
यस्तो छ अङ्कगणित
वैशाखमा सम्पन्न स्थानीय तह निर्वाचनमा कांग्रेस र माओवादी केन्द्रले गठबन्धन गरेका थिए। त्यही गठबन्धनबाट शर्मा अहिले पनि प्रतिस्पर्धामा छन्।
उक्त निर्वाचनमा कांग्रेसका वडाध्यक्षका उम्मेदवारले २४ हजार ५९ मत प्राप्त गरेका थिए। त्यस्तै, माओवादी केन्द्रका वडाध्यक्षका उम्मेदवारले ३ हजार ९०५ मत प्राप्त गरेका थिए।
एक्लै प्रतिस्पर्धा गरेको एमालेका वडाध्यक्षका उम्मेदवारले ३१ हजार २३२ मत प्राप्त गरेका थिए। यस्तै, राप्रपाका वडाध्यक्षका उम्मेदवारले ५ हजार ८३० मत, एकीकृत समाजवादीका उम्मेदवारले १ हजार २५२ मत र स्वतन्त्र लगायत अन्य दलले ४ हजार ६५२ मत प्राप्त गरेका थिए।
वैशाखमा सम्पन्न स्थानीय तह निर्वाचनमा दलबाट उम्मेदवार बनेका वडाध्यक्षले प्राप्त मतलाई विश्लेषण गर्ने हो भने एमाले फराकिलो मतले अगाडि देखिन्छ।
त्यसका साथै एमाले-राप्रपाको गठबन्धनले खरेललाई पछिल्लो अङ्कगणितले थप सहज त हुन्छ तर दुई दशकदेखि यही क्षेत्रमा केन्द्रित शर्मा आफैँमा कम प्रभावशाली व्यक्तित्व हैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
