मंसिर ४ गते हुने प्रतिनिधि सभाको निर्वाचनमा नेकपा एमालेका नेता लालबाबु पण्डित मोरङ- ६ बाट उम्मेदवार बनेका छन्। पण्डित २०७० मा सुशील कोइराला नेतृत्वको सरकारमा रहँदा विदेशी मुलुकको पीआर लिएकाहरुप्रति अपनाएको नीतिका कारण चर्चामा आएका थिए। तर, २०७४ मा केपी ओली नेतृत्वको सरकारमा उनको प्रस्तुति अपेक्षाकृत नभएको भन्दै आलोचना भयो। २०७४ को निर्वाचनमा कांग्रेस नेता शेखर कोइरालालाई पराजित गरेका पण्डित यसपटक पनि उनैसँग प्रतिस्पर्धामा छन्। प्रस्तुत छ पण्डितसँग नेपाल लाइभका भूपेन्द्र शाह ठकुरीले गरेको कुराकानीः
यस पटककको निर्वाचनमा तपाईंका चुनावी अजेन्डाहरु के छन्?
नेकपा एमालेले आफ्नो घोषणापत्र सार्वजनिक गरिसकेको छ। पार्टीले घोषणा गरेको विषय त घोषणापत्रमै छँदैछ। यसका साथै सुशासन र विकासलाई अगाडि बढाउने, भ्रष्टाचारलाई न्यून गर्ने मेरो अजेन्डा छ। जनताको दुःखसुखका साथीको रुपमा अगाडि बढ्ने, आफ्नो क्षेत्रमा बढीभन्दा बढी भौतिक संरचनाहरु निर्माण गर्ने अजेन्डाहरु पनि छन्। सडक, यातायात, स्कुल, झुलुंगे पुल, कभर्ड हल, सामुदायिक भवन बनाउने, गरिबलाई आश्रयको व्यवस्था गर्ने, सुकुम्बासीलाई बासको व्यवस्थापन गर्ने र बाढी र डुबानबाट प्रभावितहरुको समस्या समाधान गर्ने मेरा अजेन्डा छन्। ती समस्याहरुलाई समाधान गर्ने गरी अगाडि बढ्नु नै अहिलेको विकल्प हो।
जनताहरुले तपाईसँग कस्तो अपेक्षा राखेका छन्, उनीहरुको चासो कस्ता विषयमा छन्?
जनताको अपेक्षा धेरै जसो सुशासनसँग सम्बन्धित छन्। विकाससँग छन्। राष्ट्रियतासँग छन्। र संकटको बेलामा आफ्नो प्रतिनिधिको साथ पाइयोस् भन्ने विषयमा छन्। उनीहरुले आफ्ना समस्याहरु समाधान गर्ने, आफ्ना कुरा सुन्ने र विकासप्रेमी जनप्रतिनिधि खोजिरहेका छन्। उनीहरुको म प्रतिको अपेक्षा भनेको म प्रतिको विश्वास हो।
तपाईंसँगको प्रतिस्पर्धामा गठबन्धनको बलियो उम्मेदवार हुनुहुन्छ। तैपनि, तपाईंले चुनाव जित्ने आधार के छ?
मैले आफ्नो कामबाट कहिल्यै पनि देशको शिर निहुरिन दिएको छैन। मेरो आफ्नै शिर निहुरिने गरी, मतदाताको शिर निहुरिने गरी कुनै काम गरेको छैन। बरु सकेसम्म उच्च सम्मानका साथ काम गरेको छु। त्यसैले जनतामा विकासको प्रवाह दिने र जनप्रतिनिधिको असल भूमिकामा लालबाबु पण्डित भन्ने छ।
हामीले आफूले मेहनत गरेर जनताको विश्वास जित्ने हो। अंश र वंशबाट उपहार स्वरुप निर्वाचन क्षेत्रमा आएर जित्ने कुरा म ठान्दिनँ। जनताको साथ सहयोग मलाई छ। मेहनत गरेको छु। जनताको साथ पाएको छु। साथ सहयोग पाउने आशा र विश्वास पनि मैले राखेको छु। त्यसकारणले म सजिलै निर्वाचन जित्छु।
गठबन्धनका उम्मेदवार शेखर कोइरालाप्रति तपाईको मूल्यांकन कस्तो छ?
मेरो विपक्षी वंशबाट आउनुभएको छ। तर मैले हरेक टोल, वडा र सिंगै क्षेत्रभर हरेक ठाउँमा जनताका आँखाले देख्ने गरी, बुझ्ने गरी, अनि गौरव गर्ने गरी काम गरेको छु। यिनै कुराहरुलाई आधार मानेर जित्ने कुरामा म विश्वस्त छु।
तपाईंले यसअघि पनि ४ पटक संसद्मा प्रतिनिधित्व गरिसक्नु भएको छ। फेरि निर्वाचन जित्नुभयो भने संसद्मा कस्ता मुद्दाहरु उठाउनुहुन्छ?
म यो निर्वाचन क्षेत्रबाट एक पटक मात्र प्रतिनिधित्व गरेको छु। यसअघि जिल्लाका अन्य निर्वाचन क्षेत्रबाट हो। यस निर्वाचन क्षेत्रबाट एक पटक साढे चार वर्षको अवधि मात्र हो। यो अवधिमा ५ अर्बभन्दा बढी संघीय बजेट यो निर्वाचन क्षेत्रमा परिचालन भएको छ। साढे तीन सयभन्दा बढी प्रोजेक्टहरु चलिराखेका छन्। ५२ करोड, ४८ करोड लगायत करोडौंकरोडको बहुवर्षीय प्रोजेक्टहरु पनि चलिरहेका छन्। काम भइरहेको छ।
विराटनगर विमानस्थललाई विस्तार गर्ने कामलाई अहिलेको गठबन्धनले रोकेको छ। त्यसलाई बिस्तार गर्ने काम नेकपा एमालेको सरकारले गर्छ। त्यस्तै केशल्या, बुढीखोला, गचिया खोलामा तटबन्धनको काम गर्छ, करिडोर निर्माण गरेर। साथसाथै खनारदेखि नेता चोकसम्मको नहर सडकलाई पनि कालोपत्रे गरेर हामी अगाडि बढ्छौं। सहरभित्र र गाउँभित्रका सडकहरुलाई पनि हामीले स्तरोन्नतिको काम गर्छौँ।
निर्वाचन जितेको अवस्थामा संसद्मा राष्ट्रियताको मुद्दा उठाउने छँदैछ। जनजीविकाको मुद्दा छँदैछ। गाँस र बासको मुद्दा, सुशासनको मुद्दा र विकासका मुद्दाहरु उठाउनेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_3anZTthbso-1766484950.jpg)
-1764146706.png)
-1777595787.png)
