चितवन– २ मा नेकपा एमालेबाट उम्मेदवार भएका छन्, कृष्णभक्त पोखरेल। उनी चितवनबाटै २०७० र २०७४ मा पनि निर्वाचित भएका थिए। तेस्रोपटक उनीसँग कांग्रेसका उमेश श्रेष्ठदेखि रवि लामिछानेसम्म प्रतिस्पर्धामा उत्रिएका छन्। उनले आफ्नो तेस्रो प्रतिस्पर्धालाई कसरी विश्लेषण गरेका छन्? यसपटक उनीसँग के अजेन्डा छ? आफ्नो निर्वाचन क्षेत्रमा घरदैलोमा व्यस्त रहेका उनीसँग उनकै निर्वाचन क्षेत्रमा नेपाल लाइभका लागि डिबी खड्का र नारायण अधिकारीले गरेको कुराकानीः
तपाईंको चुनावी घरदैलो चल्दैछ। कस्तो प्रतिक्रिया पाउनुभएको छ?
जनताले अपार माया र स्नेह देखाउनुभएको छ। यसले अरु जिम्मेवार बनाएको छ। नेकपा एमाले मात्रै एउटा यस्तो पार्टी हो। जसले स्थायित्व दिनसक्छ। समृद्ध नेपाल र सुखी नेपाली बनाउन सक्छ। त्यसलाई यो घरदैलोले करिबकरिब अनुमोदन गरिसकेको जस्तो अनुभूति भएको छ। एकदम उज्यालो र चम्किलो भावनाको साथ हामी विजयको यात्रातर्फ लम्किरहेका छौँ भन्ने मलाई लाग्छ।
पछिल्ला निर्वाचनहरुमा चितवन ’हटस्पट’ बनिरहेको छ। यसपटक चितवन– २ अझै बढी चर्चाको केन्द्रमा छ। तर तपाईं आफ्नो पक्षमै नतिजा आउनेमा विश्वस्त हुनुहुन्छ?
नेकपा एमालेको जुन जनाधार यस क्षेत्रमा छ। स्थानीय तहको निर्वाचनमा चितवन– २ अन्तर्गत पर्ने वडाहरुमा एमालेको बहुमत देखिन्छ। अर्कोतिर, यहाँ मेरो सम्बन्ध छ। म हिजो २० वर्ष वकालत गर्दा त्यस्तो माओवादी हुनुहुन्न, हिरासत वा थुनामा पर्दा उहाँहरुलाई मैले मुद्दामामिलामा सहयोग नगरेको होस्। ती मान्छेसँग मेरो आँखामा आँखा जुधाएर भेट हुन्छ नि, मप्रति विश्वास देख्छु। नेपाली कांग्रेसमा पनि कुनै न कुनै रुपमा मैले सहयोग नगरेका वा तीन पुस्ता नजानेका व्यक्ति हुनुहुन्न। मेरो बाजेले पनि चितवनमै बिवाह गर्नुभयो। म यहीँ जन्मेँ, हुर्केँ, बढेँ, २० वर्ष वकालत गरेँ। वडा तहसम्म महिलाहरुको सञ्जाल बनाएर निशुल्क कानुनी सहायता प्रदान गरेँ। त्यस किसिमबाट जनतासँग भएको अन्तरघुलनले मलाई विजयमा समस्या छ भन्ने लाग्दैन। तर यो चुनाव हो। लोकतान्त्रिक प्रणालीमा चुनावलाई सौन्दर्यको रुपमा लिइन्छ। त्यसैले मंसिर ४ गते जनताले परिणाम देखाउँछन्।
तपाईं लगातार तेस्रो पटक प्रतिस्पर्धामा हुनुहुन्छ। यस बीचमा जनताका अपेक्षा पनि परिवर्तन भए होलान् नि?
संविधान सभा निर्वाचनमा प्रतिस्पर्धा गर्दा संविधान निर्माणलाई नै मैले जनतामाझ मुद्दाको रुपमा लगेको थिएँ। पार्टीले पनि संयोगले संविधान मस्यौदाकारकै जिम्मेवारी दियो। भरतमोहन अधिकारी बिरामी भइसकेकाले त्यो जिम्मेवारी मैले अझै बढी प्राप्त गरेँ। २०६४ को संविधान सभाले संविधान लेख्न नसकेको र २०७० मा आफूले निर्वाचित गरेको प्रतिनिधिले मस्यौदाकारको रुपमा संविधान लेखेर आयो भन्ने कुराले खुसियाली थियो। दोस्रो पटक संविधान कार्यान्वयनको अवधि थियो। त्यसमा पनि हामीले झन्डै २३० कानुन निर्माण गरेकोमा १७६ त मेरै नेतृत्वमा कानुन तर्जुमा भएका हुन्।
विकासको कुरामा पनि जनताले आशा गरेका हुने रहेछन्। विकासमा केही ठूला परियोजना चलेका छन्। तर पनि आम जनताको घरमसम्म विकास पुगोस् भन्ने जुन चाहना छ , त्यो अपेक्षा छँदैछ। त्यसैले मेरो तेस्रो चुनावको मुद्दा नै विकास र समृद्धि हुन्छ। मैले नेतृत्वलाई पनि भन्छु, अब मलाई कानुनको जिम्मेवारी दिएर नअल्झाउनुस्। १० वर्ष मैले संविधान र कानुनमा काम गरेँ। यो पाँच वर्ष म पूर्णरुपमा कालिका नगरपालिका, इच्छाकामना गाउँपालिका र भरतपुर महानगरपालिकाको १० वटा वडाको समृद्धिको अजेन्डा मात्रै मेरो हुनेछ। मैले जनतालाई त्यो कुरा भनेको छु, जनता पनि त्यसमा विश्वस्त हुनुहुन्छ भन्ने मलाई लाग्छ।
तपाईंले राष्ट्रिय रुपमा २० वटा ग्यारेन्टी प्रस्तुत गर्नुभएको छ। स्थानीय स्तरमा चाहिँ तपाईंको के मुद्दाहरु छन्? जसका कारण जनताले तपाईंलाई नै अनुमोदन गरुन्?
मूलतः भरतपुर एउटा महानगरपालिका भएर पनि रिङरोड छैन। त्यसलाई पूरा गर्ने योजनामा छौँ। ल्यान्डफिल साइट थिएन। त्यसलाई पूरा गर्दैछौँ। कोकाकोलादेखि पुल्चोकसम्मको ६ लेनको बाटो सम्पन्न हुँदैछ। काठमाडौंपछिको सबैभन्दा ठूलो सभाहल केपी ओली नै आएर शिलान्यास गर्नुभएको थियो। अब पूरा हुँदैछ। हामी भरतपुरलाई सांस्कृतिक र पर्यटकीय शहरको रुपमा विकास गर्न चाहिरहेका छौँ। कालिका नगरपालिकाको हकमा पनि रिङरोडको डीपीआर तयार छ। त्यसअनुसार केही बजेट विनियोजन भएर काम पनि भएको छ। त्यसलाई हामी पूरा गर्छौँ।
नेपालका चेपाङमध्ये २० प्रतिशत त्यसै नगरपालिकामा हुनुहुन्छ। सिन्ती झरना जस्ता ठाउँहरु छन्। त्यहाँ पनि पर्यटन विकासको सम्भावना छ। इच्छाकामना गाउँपालिकामा पनि पर्यटन विकासको सम्भावना छ। मेरो निर्वाचन क्षेत्रमा फरकफरक पर्यावरणीय ठाउँहरु छन्। हिजो सात घण्टा लाग्थ्यो गाडी चढ्ने ठाउँमा पुग्न। आज १० मिनेट लाग्छ। तर बर्खायाममा बाटो चलिरहेको छैन। बाह्रैमास चल्न सक्ने बाटो बनाउने, बिजुली, खानेपानीको कुराको व्यवस्थापन गर्नुपर्ने छ। यति गर्न सकियो भने अरु धेरै ठूलो कुरा गर्छु भन्नुपर्दैन। मूलतः स्थानीय सरकारसँग समन्वयकारी भूमिका निर्वाह गर्ने, त्यसकै क्षमता विकास गर्ने हो। हामी आफैंले आएर १० लाख, २० लाख वितरण गर्ने होइन। स्थानीय तहको सरकारको क्षमता बढाउने र संघीय सरकारसँग जोड्ने काममा मेरो भूमिका रहन्छ।
तपाईंसँग प्रतिस्पर्धामा उभिनुभएका अन्य उम्मेदवारहरुलाई कसरी मूल्यांकन गर्नुभएको छ?
गठबन्धनले कुनै नयाँ उम्मेदवार ल्याउनुभएको छैन। पुरानै उम्मेदवार र मन्त्री भइसकेका व्यक्ति ल्याउनुभएको छ। म मन्त्री नभए पनि यस बीचमा यस निर्वाचन क्षेत्रमा कसले विकासका कार्यक्रम ल्यायो? जनता कसले चिन्छ? मेरो निर्वाचन क्षेत्रका ९० प्रतिशत जनताले म बाटोमा हिँड्दा पनि चिन्छन्। म पनि प्रत्येक वडाका सय, डेढ सय जनाको नाम फरर्र भन्न सक्छु। तर मेरा प्रतिस्पर्धीलाई कुन वडा कहाँ पर्छ भन्ने पनि थाहा छैन। त्यसैले जतिले उम्मेदवारी दिनुभएको छ। सबै मेरा प्रतिस्पर्धी हुनुहुन्छ। मंसिर ४ मा थाहा हुन्छ को हो भन्ने कुरा। तर आजको मितिमा कुरा गर्दा, आज मेरो विरुद्धमा जो उठ्नुभएको छ, उहाँहरुले आफैंले आफैंलाई भोट हाल्ने स्थिति छैन। त्यो परिस्थितिमा यहाँका जनताले उहाँहरुलाई मतदान गर्नुहुन्छ होला भन्ने लाग्दैन। आफ्नो बाटो, आफ्नो गाउँ ठाउँ बुझेको, दुःख सुखमा आउने मान्छे नरोजी अर्को मान्छे रोज्ने सम्भावना देख्दिनँ। तर सबैप्रति मेरो उच्च सम्मान र आदर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_3anZTthbso-1766484950.jpg)
-1764146706.png)
-1777595787.png)
