नेपाली कांग्रेसका सहमहामन्त्री भीष्मराज आङदेम्बे आगामी प्रतिनिधि सभा निर्वाचनमा पाँचथरबाट उम्मेदवार बनेका छन्। उनको प्रतिस्पर्धा नेकपा एमालेका बसन्तकुमार नेम्वाङसँग हुँदैछ।
केपी ओली नेतृत्वको सरकारमा भौतिक पूर्वाधार मन्त्री रहेका नेम्वाङ आङदेम्बेका लागि कडा प्रतिस्पर्धी हुन्। २०७४ सालमा उनै नेम्वाङसँग पराजित भएका आङदेम्बेलाई यस पटक बदला लिने अवसर भने छ।
आफू पराजित हुँदा विकासको काम रोकिएकाले यस पटक जित हात पार्ने दावी उनले गरेका छन्। वैशाख ३० मा भएको स्थानीय तह निर्वाचनमा अधिकांश पालिकामा जित हात पारेकाले पनि उनी उत्साही देखिन्छन्।
निर्वाचन प्रसार-प्रचारको क्रममा पाँचथरमा रहेका आङदेम्बेसँग चुनावी तयारी र अजेण्डाबारे नेपाल लाइभले गरेको संवाद:
मतदातासमक्ष पार्टीगत र व्यक्तिगत रुपमा कस्ता प्रतिबद्धता व्यक्त गरिरहनुभएको छ?
अहिले हामी घरदैलो अभियान अन्तर्गत मतदाता समक्ष पुगेका छौं। सुरुमा कार्यकर्ता भेटघाट गर्यौं। गठबन्धनभित्र रहेका तीन दलका कार्यकर्ताको संयुक्त निर्वाचन परिचालन कमिटी बनायौं। अहिले मतदाताको कुरा सुन्ने चरणमा पुगेका छौं। पाँचथर जिल्ला समग्र घुम्नुपर्ने र निर्वाचन आयोगको समय सीमा समेत भएका कारण हामीले त्यही अनुसारको कार्यक्रम तय गरेका छौं।
हाम्रो पार्टीले घोषणापत्र जारी गरेको छ। उक्त घोषणापत्रमा भएका कुराहरु मतदातालाई बुझाइरहेका छौं। नेपाली कांग्रेसले आफ्नो घोषणापत्रमा रोजगारी,स्वास्थ्य शिक्षा, आर्थिक वृद्धिदेखि प्रतिनिधि सभा बीचमै विघटन नगर्ने प्रतिवद्धता गरेको छ। हामी पाँच वर्ष सरकार चलाएर देशलाई आर्थिक विकासमा लैजान चाहन्छौं।
२०७४ सालमा नेकपा एमालेले यो क्षेत्रमा जित्यो। तर उसले न विकास गर्यो न संसद् चलायो। यो क्षेत्रको विकासका लागि फेरि पनि नेपाली कांग्रेस अघि सर्नुपरेको छ। नेपाली कांग्रेस नेतृत्वमा हुँदा सुरु गरेका विकासका काम बाहेक अन्य काम अघि बढाइएको छैन।
जनताले कस्ता अपेक्षा राख्ने गरेका छन्? उनीहरुको चासो कस्ता विषयमा छन्?
जनताको पहिलो अपेक्षा भनेको यस क्षेत्रको विकास नै हो। खानेपानी,शिक्षा, स्वास्थ्य, बाटो निर्माणदेखि सिंचाइसम्म विकासका गुनासोहरु मतदाताले राखेका छन्। त्यस्तै सांसद निर्वाचित हुने तर गाउँ नफर्कने गुनासो पनि उनीहरुले गरेका छन्।
अबको पाँच वर्ष आफू यस जिल्लाकै लागि खटिने कुरा मैले मतदातालाई बुझाइरहेको छु। मतदाताको धेरै चासो चाहिँ विकासमै देखिन्छ। आफूले मत दिएर पठाएको उम्मेदवारले आफ्नो क्षेत्रमा विकास गरोस् र मतको सम्मान गरोस् भन्ने उनीहरुको चाहना देखिन्छ। यसअघिका उम्मेदवारले विकासका काम नगरेको गुनासो पनि धेरै सुनिएको छ।
तपाईंले जित्ने आधार के हो?
यो क्षेत्रका लागि म परिचित उम्मेदवार हो। यहाँ लामो समयदेखि राजनीतिमा संलग्न भएको र केन्द्रसम्म पहुँच भएको व्यक्तिको रुपमा मतदाताले मलाई लिएको पाएको छु। त्यस्तै मतदाताले विकास गर्ने व्यक्ति भएको कारण तपाईंले नै जित्नुपर्छ भनेकाले पनि यस पटक म उत्साही छु।
त्यस्तै स्थानीय तहको मतभार हेर्ने हो भने हामी सहज जित निकाल्ने अवस्थामा छौं। हामीले प्रमुख प्रतिस्पर्धी नेकपा एमालेभन्दा दोब्बर मत ल्याउने सम्भावना देखिन्छ। नेपाली कांग्रेस एक्लै यो क्षेत्रमा जित निकाल्ने अवस्थामा थियो। त्यसमाथि माओवादी केन्द्र र एकीकृत समाजवादीले पनि साथ दिएका छन्। गठबन्धनको मतसहित हेर्दा हामी बिजेता बन्न धेरै समय छैन।
त्यस्तै अरु आधार भनेको मैले यस क्षेत्रमा सुरु गरेका विकासका कामहरु हुन्। खानेपानी, सडक, सिंचाइ लगायत अन्य धेरै काम हामीले गरेका छौं। जसका कारण जनताले हामीलाई मत दिनेछन् ।
२०७४ सालमा नेपाली कांग्रेस हार्दा यो क्षेत्र विकासमा धेरै पछि परेको कुरा मतदाताले अहिले बुझेका छन्। त्यस्तै नेपाली कांग्रेसको नीति र कार्यक्रम हेरेर पनि जनताले मत दिनेछन्। एमालेलाई बहुमत दिए पनि चलाउन नसक्ने देखिएकाले जनताले निर्विकल्प रुपमा नेपाली कांग्रेसलाई जिताउनेछन्।
विपक्षीप्रति तपाईंको मूल्यांकन के छ? कतिको चुनौती महसुस गरिरहनुभएको छ?
यो क्षेत्रमा मुख्य प्रतिस्पर्धा नेकपा एमालेका उम्मेदवार बसन्त नेम्वाङसँग हो। स्थानीय तहको मत हेर्दा अहिले प्रतिस्पर्धा नै नहुने देखिन्छ। तर उहाँलाई मैले प्रतिस्पर्धीको रुपमा लिएको छु।
उहाँ २०७४ सालमा मलाई पराजित गरेर सांसद हुनुभएको थियो। मन्त्रीसमेत हुनुभयो तर यस क्षेत्रका लागि खास काम गर्नुभएन। करिब ३ वर्ष नेकपा एमालेको सरकार रहँदा उहाँ पनि मन्त्री हुनुभएको थियो। तर काम नगरेका कारण यहाँका जनता अहिले विकल्पको खोजीमा रहेको पाएको छु।
निर्वाचन जित्नुभयो भने संसद्मा तपाईंको भूमिका कस्तो रहन्छ? कस्ता मुद्दा सदनमा उठाउनुहुन्छ?
संसदमा गएपछि हामी जनताको मुद्दा उठाउँछौं। नेकपा एमाले जस्तो बीचमै संसद् विघटन गर्दैनौं। संसदलाई पूरा कार्यकाल चलाउने कुरा हामीले आफ्नो घोषाणपत्रमै उल्लेख गरेका छौं।
नेकपा एमालेले बहुमत पाएपछि संसद् चलाउन नसक्ने पुष्टि भएकाले पनि नेपाली कांग्रेस र मेरो जित आवश्यक देखिएको छ। यहाँको विकास र गुनासाहरु संसदमा जोडदार रुपमा उठाउने र संसदलाई बचाएर त्यहाँबाट समग्र जनताको हितमा कानुन बनाउन मेरो भूमिका रहन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787239320.jpg)
-1786602170.png)
-1786513116.png)
