नेकपा एमालेका केन्द्रीय सदस्य बसन्तकुमार नेम्वाङ प्रतिनिधि सभाको एक मात्र निर्वाचन क्षेत्र रहेको पाँचथरमा उम्मेदवार छन्। केपी ओली नेतृत्वको सरकारमा भौतिक पूर्वाधार मन्त्री रहेका नेम्वाङ आफ्नो पालामा पाँचथरमा सामाजिक र भौतिक पूर्वाधार निर्माणका कामले उल्लेख्य फड्को मारेको बताउँछन्।
एमाले सत्तामा आउँदा गरेका काम जनताले बुझेको र गठबन्धनले विकास-निर्माणका काममा अवरोध गरेकोले आफ्नो जित आवश्यक रहेको उनी बताउँछन्।
निर्वाचन प्रसारप्रचारको क्रममा पाँचथरमा रहेका नेम्वाङसँग नेपाल लाइभकर्मी दुर्गा दुलालले गरेको संवाद:
जनतासमक्ष के अजेण्डा लिएर जानुभएको छ? जनताले कसरी लिइरहेका छन्?
जनता हाम्रा कुरा उत्साहपूर्वक सुनिरहेका छन्। चासो दिइरहेका छन्। शुसासन, विकास, समृद्धि र राष्ट्रियताका सवाल जनता सामु उठाएका छौं। समृद्ध नेपाल, सुखी नेपाली निर्माणको अभियान थालेका छौं। भौतिक पूर्वाधारका कुरा, सामाजिक सुरक्षाका कुरा छन्। उल्लेखित कुरा हामी ३ वर्ष सरकारमा हुँदा गरेका थियौँ।
यस्तै, हामीले २०४६ पछिको तुलना गरेका छौं। यो बीचमा कांग्रेसले २० वर्ष शासन गर्दा शेरबहादुर देउवा ५ पटक प्रधानमन्त्री भएका छन्। एमालेले मनमोहन अधिकारीले नेतृत्व गरेको ९ महिने सरकारसहित ५ वर्ष सरकार चलाएको छ।
पाँचथर जिल्लामा कांग्रेसले २० वर्षमा नगरेको काम हामीले ५ वर्षमा गरेका छौं। यहाँबाट कांग्रेसका धेरै मन्त्री भए। हाम्रो पार्टीबाट जम्मा २ जना मन्त्री भयौं। हाम्रो पालामा समाजिक र भौतिक पूर्वाधार निर्माणका कुरामा मारेको फड्को यहाँका जनताले देख्नुभएको छ।
यस्तै, हाम्रो पालामा चीन र भारत जोड्ने नाकासम्म सडक सञ्जालले जोड्यौं। हामीले वडादेखि पालिका हुँदै सदरमुकामसम्म ठूला अस्पतालहरु निर्माण गर्यौं। जिल्लाका ६० वटै वडामा विद्युत पुर्याएका छौं।
एमाले सत्तामा आउँदा गरेका उल्लेखित काम जनताले बुझेका छन्। र, हामीले थप स्पष्ट पारेका छौं। गठबन्धनले भने हामीले सुरु गरेका विकासमा अवरोध गरेकोले त्यसलाई हटाउन एमालेको जित आवश्यक रहेको जनतालाई भनेका छौं र जनताले यो बुझेका छन्।
जनताको अपेक्षा चाहिँ के छ त?
हामीले गरेको काममा जनताले भन्ने ठाउँ नै छैन। आँखाका अगाडि छर्लङ्गै देखेका छन् जुन कुरा हामी आएपछि भएको हो।
अध्यक्ष ओलीको नेतृत्वमा अघिल्लो पटक ९ महिना र पछिल्लो ३ वर्ष सरकारमा हुँदा राष्ट्रियताको विषयमा लिएको अडान र लोडसेडिङ अन्त्यको योजना लगायत सुकुम्बासी समस्या समाधानका लागि गरेको काम, गरिबी निर्मुलका लागि गरेका काम जनताले देखेका छन्। अब यसलाई निरन्तरता दिएर बाँकी रहेका काम पूरा गर्न जनताले एमालेलाई जिताएर पठाउँछन्।
आगामी ५ वर्षका लागि हामीले ग्यारेन्टी गरेका २० काम घोषणापत्रमार्फत सार्वजनिक गरेका छौं। हामीले गर्ने भनेका काम पूरा गर्न प्रतिबद्ध छौं।
स्थानीय तहको निर्वाचनको मत परिणामलाई हेर्ने हो भने कांग्रेस बलियो देखिन्छ। तपाईंको प्रतिस्पर्धा पनि गठबन्धनका कांग्रेस उम्मेदवारसँग हुँदैछ। प्रतिस्पर्धीलाई कसरी लिनुहुन्छ?
स्थानीय तहको मतपरिणामले आसन्न निर्वाचनमा असर गर्दैन। जनता त्यसमा तयार छैनन्।
विपक्षीसँग खास अजेण्डा छैनन्। एमालेले सुरु गरेर पूरा गरेका र कतिपय पूरा गर्न बाँकी रहेका काम पूरा गर्छौँ भनेर उनीहरु हिँडेका छन्।
मेरा प्रतिद्वन्द्वी भीष्मराज आङ्देम्बेलाई जनताले जिताएर पनि पठाएका थिए। उहाँकै पार्टीले २० वर्ष शासन गर्दा उहाँ पनि मन्त्री हुनुभयो। तर जनतालाई यो-यो काम गर्यौं भनेर देखाउने कुनै काम भएका छैनन्।
हामी मन्त्री हुँदा अर्ब-अर्बका बजेट ल्याएर खानेपानी, तमोर करिडोर सडक कालोपत्रे गर्ने कामको प्रारम्भ र केन्द्रीय विद्युतीय स्टेसन निर्माण गर्यौँ। त्यस्तै गाउँगाउँमा पक्की सडक, खोलाबाट तानेर खानेपानी घरघरमा पुर्याएका छौं। जनताले त्यो देखेका छन्। जनताले उनीहरुलाई के गर्यौ भनेर सोधे उनीहरुसँग जवाफ छैन। त्यसैले, गठबन्धनका आधारमा जनताले मत दिँदैनन्।
तपाईं निर्वतमान सांसद हुनुहन्छ। तपाईंकै अध्यक्षले दुई–दुई पटक संसद् विघटन गर्नुभयो। अब फेरि तपाईं निर्वाचित हुनुभयो भने संसदले कार्यकाल पूरा गर्छ भन्ने प्रतिबद्धता कसरी गर्नुहुन्छ?
संसद् विघटन हुने कुरा संसदीय परम्परामा स्वभाविक हो। हुने/नहुने प्रतिबद्धता गर्न सकिन्न। संसदीय व्यवस्थामा संसद् गठन, पुनर्गठन र आवधिक निर्वाचन स्वभाविक र संवैधानिक व्यवस्था हो।
उनीहरुले यो व्यवस्थालाई राम्ररी बुझेका छैनन्। त्यसैले यो विषयलाई गठबन्धनले प्रतिगमन भन्छ। उनीहरुसँग अजेण्डा नभएर त्यसो भनेका हुन्। जनतामा जाने कुरालाई कसरी प्रतिगमन भन्न मिल्छ? आखिर १४ महिनापछि जनतासँगै आउनुपर्यो।
शेरबहादुर देउवा आफैँले बरु संसद् राजालाई बुझाए। त्यो हो प्रतिगमन भनेको। उनकै नेतृत्वमा अहिले सरकार छ। यसर्थ प्रतिगमनकारी देउवा हुन्। यसको दोष म माओवादीलाई दिन्नँ। त्यो बेला उनीहरु थिएनन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
