बागलुङ– बागलुङ नगरपालिका–१ को माझी बस्ती। विहान–बेलुकाको छाक टार्न नै मुस्किल पर्ने माझीहरुको यो बस्तीका अनेक समस्या छन्। गास, बास र कपासजस्ता न्यूनतम आधारभूत आवश्यकताकै लागि संघर्षरत यहाँका बासिन्दाको दु:ख सुनिदिने कोही हुँदैनन्।
तर, अहिले चुनावको मुखमा भने यहाँ विभिन्नखाले आश्वासनका ‘पोका’ बाँडिँदैछन्। हरेक निर्वाचनमा जस्तै आगामी प्रदेश तथा प्रतिनिधि सभा निर्वाचनका लागि भोट माग्न आउनेहरुले यहाँ रोजगार दिलाउने आश देखाइरहेका छन्।
२०४८ सालमा बागलुङ–पोखरा राजमार्ग निर्माण गर्दा विस्थापित भएका माझी परिवार एक दशक बढी बाङ्गेचौर वरपर छाप्रो बनाएर बसे। त्यही नै गुजारा चलाए। ४ वर्ष अगाडि सरकारले नियरघाट नजिकै बस्ती निर्माण गरी उनीहरूलाई हस्तान्तरण गर्यो। धेरैले घरसहित लालपूर्जा पाए, तर केही परिवारले अझै पाउन सकेका छैनन्।
माझी समुदायलाई सडक, खानेपानी, रोजगारलगायतका आश्वासन चुनावैपिच्छे आउँछन्, तर काम कसैले गर्दैनन्। स्थानीय सोमबहादुर माझी भन्छन्, ‘चुनावका बेला यो गर्दिन्छौँ, त्यो गर्दिन्छौँ भन्दै दिनदिनै नेताहरू आउनुहुन्छ, चुनाव जितेपछि एकपटक पनि हाम्रो बस्तीमा आउनु हुन्न। काम पनि खासै केही गर्न सक्नु भएन, हाम्रो बस्तीमा धेरै समस्या छन्।’
उम्मेदवारले चुनावका बेला सडक, खानेपानी र रोजगारको कुरा गरे पनि अहिलेसम्म कुनै पनि बाचा पूरा गर्न नसकेको माझीको गुनासो छ। उनी वर्षौँ बितिसक्दा पनि खानेपानीको व्यवस्थापन पूर्णरूपमा हुन नसकेको भन्दै सडकको अवस्था पनि उस्तै रहेको बताउँछन्।
‘चुनावका बेला भोट माग्न आउने सबैले सडक, खानेपानीको कुरा गर्नुहुन्छ, यहाँ पानी ल्याउने भनेको धेरै भयो, अहिलेसम्म स्वच्छ खानेपानीको व्यवस्था हुनसकेको छैन,’ उनले भने।
विस्थापित माझी परिवारलाई सरकारले १३ घर निर्माण गरी ४ वर्ष अगाडि हस्तान्तरण गरेको थियो। घर पाए पनि स्वास्थ्य, शिक्षा, रोजगार र खानेपानीको राम्रो व्यवस्था हुन नसकेको स्थानीय उमा माझीले बताइन्। पटक–पटक आफूहरूले भोट दिए पनि माझी समुदायमा उम्मेदवार जितेपछि कमै आउने गरेको उमाको गुनासो छ।
‘हाम्रा लागि काम गर्लान् भनेर भोट दिएर जिताइयो, तर फर्कि हेरेनन्, समस्या जस्ताकोतस्तै छन्,’ उमा भन्छिन्, ‘भोट माग्न आउने बेलामा गर्छौँ भनेर भन्छन्, विश्वास लाग्छ तर काम गर्दैनन्, अहिले आएर हामीहरूलाई झुक्याउन खोजेको जस्तो लाग्न थाल्यो।’
माझी समुदायको उम्मेदवारसँग ठूलो अपेक्षा छैन। रोजगार सिर्जना गरिदिए पुग्ने उनीहरु बताउँछन्। स्थानीय चन्द्रकला माझी भन्छिन्, ‘भएको घर सम्पत्ति सडकले खाइदियो, सरकारले यति घरमात्रै बनाइदिएको हो, घरमात्रै भएर नहुने, गरीखाने ठाउँ छैन, सरकारले कि गरिखाने ठाउँ, कि काम गर्ने ठाउँको व्यवस्था गरिदिए हुन्थ्यो।’
उम्मेदवारको ध्यान माझी बस्तीमा पुग्न नसक्दा आफूहरूको समस्या ज्यूँका त्यूँ रहेको उनीहरु बताउँछन्। ‘अहिले आउने उम्मेदवार अर्को चुनावमा मात्र फर्किन्छन्,’ चन्द्रकला भन्छिन्, ‘भ्रममात्रै छर्दा रैछन्, काम गर्दा रहेनछन्।’
सडक निर्माण गर्दा विस्थापित बनेकामध्ये १३ परिवारको सरकारले घर निर्माण गरेर हस्तान्तरण गरे पनि ३ परिवारले अझै लालपूर्जा पाउन सकेका छैनन्। अहिलेसम्म गमसिंह माझी, रामबहादुर माझी र यमबहादुर माझीले लालपूर्जा पाएका छैनन्। विभिन्न प्रक्रिया नपुग्दा आफूहरूले अहिलेसम्म लालपूर्जा पाउन नसकेको यमबहादुर माझीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786875773.jpg)
-1786602170.png)
-1786513116.png)
