काठमाडौं– चालू आर्थिक वर्षको असोज मसान्तसम्म आइपुग्दा राष्ट्रियस्तरका विकास बैंकहरुको खुद नाफा समग्रमा ३० प्रतिशतले घटेको छ।
बैंकहरुले सार्वजनिक गरेको प्रथम त्रैमासिक वित्तीयले विवरण अनुसार उक्त अवस्था देखिएको हो। चालू आर्थिक वर्षको असोज मसान्त (पहिलो त्रैमास) सम्म विकास बैंकहरुले एक अर्ब नौं करोड ७२ लाख ४९ हजार रुपैयाँ खुद नाफा कमाएका छन्। अघिल्लो वर्षको यसैअवधिमा भने राष्ट्रियस्तरका विकास बैंकहरुले खुद नाफा एक अर्ब ५६ करोड ९१ लाख रुपैयाँ थियो।
कुन बैंकको कति नाफा वृद्धि भयो?
चालू आर्थिक वर्षको पहिलो तीन महिनामा तीन बैंक मात्र खुद नाफा वृद्धि गर्न सफल भएका छन्। यस अवधिसम्म आउँदा साइना रेसुङगा विकास बैंक, गरिमा विकास बैंक, सांग्रिला विकास बैंकको नाफा गत वर्षको यसै अवधिको भन्दा केही बढेको छ।
यस अवधिसम्म आउँदा साइन रेसुङगा विकास बैंकको नाफा २० करोड ९१ लाख ३९ हजार रुपैयाँ छ। बैंकको नाफा गत आर्थिक वर्षको सोही अवधिको भन्दा ४१ प्रतिशतले बढेको छ। गत आर्थिक वर्षको सोही अवधिमा बैंकले १४ करोड ७३ लाख ६३ हजार रुपैयाँ बराबर नाफा आर्जन गर्न सफल भएको थियो।
यसैगरी, चालू आर्थिक वर्षको तीन महिनासम्मको वित्तीय विवरण अनुसार गरिमा विकास बैंकको नाफा १९ करोड ३३ लाख रुपैयाँ छ। बैंकको नाफा गत आर्थिक वर्षको यसै अवधिकोभन्दा ४ प्रतिशतले बढेको छ। गत आर्थिक वर्षको सोही अवधिमा यस बैंकले १८ करोड ४४ लाख रुपैयाँ बराबर खुद मुनाफा आर्जन गरेको थियो।
चालू आर्थिक वर्षको पहिलो तीन महिनासम्म आउँदा सांग्रिला विकास बैंकले पाँच करोड ५३ लाख ४३ हजार रुपैयाँ नाफा आर्जन गरेको छ। बैंकको नाफा गत आर्थिक वर्षको यसै अवधिकोभन्दा १.६० प्रतिशतले बढेको छ। गत वर्षको सोही अवधिमा बैंकले पाँच करोड ४४ लाख रुपैयाँ बराबरको नाफा आर्जन गर्न सफल भएको थियो।
कुन बैंकको कति नाफा घट्यो?
चालू आर्थिक वर्षको पहिलो त्रैमाससम्म आउँदा पाँचवटा राष्ट्रिय स्तरका विकास बैंकको नाफामा गिरावट आएको छ। यस अवधिसम्म आउँदा सबैभन्दा धेरै नाफा घटेको विकास बैंक कामना सेवा विकास बैंक हो। यस बैंकको नाफा चालू आवको पहिलो त्रैमाससम्म ७६ प्रतिशतभन्दा धेरैले घटेको छ।
गत आर्थिक वर्षको पहिलो तीन महिनामा १७ करोड ५७ लाख रुपैयाँ नाफा कमाएको यस बैंकले चालू आर्थिक वर्षको सोही अवधिमा चार करोड १५ लाख रुपैयाँमात्र नाफा कमाएको छ। यसैगरी, चालू आर्थिक वर्षको पहिलो तीन महिनामा लुम्बिनी विकास बैंकको नाफा ६६ प्रतिशतभन्दा धेरै घटेको छ।
गत आर्थिक वर्षको पहिलो तीन महिनामा २१ करोड ३१ लाख रुपैयाँ नाफा कमाएको बैंकले चालू आर्थिक वर्षको सोही अवधिमा ७ करोड १० लाख रुपैयाँमात्र नाफा कमाउन सफल भएको छ। चालू आर्थिक वर्षको पहिलो तीन महिनामा मुक्तिनाथ विकास बैंकको नाफा पनि ११ प्रतिशतभन्दा धेरै घटेको छ। यस अवधिसम्म बैंकले ३० करोड ४४ लाख रुपैयाँ नाफा कमाएको छ। बैंकको नाफा गत आर्थिक वर्षको सोही अवधिमा ३४ करोड ५५ लाख रुपैयाँ थियो।
चालू आवको पहिलो तीन महिनामा महालक्ष्मी विकास बैंकको नाफा ४८ प्रतिशतभन्दा धेरै घटेको छ। गत आर्थिक वर्षको पहिलो तीन महिनामा २३ करोड पाँच लाख रुपैयाँ नाफा कमाएको यस बैंकले चालू आर्थिक वर्षको सोही अवधिमा आउँदा ११ करोड ९३ लाख रुपैयाँमात्र नाफा कमाउन सफल भएको छ।
चालू आर्थिक वर्षको पहिलो त्रैमासम्म आउँदा ज्योती विकास बैंकको नाफा पनि ५४ प्रतिशतले घटेको छ। गत आर्थिक वर्षको पहिलो तीन महिनाको अवधिमा २१ करोड ७८ लाख रुपैयाँ नाफा कमाएको बैंकले चालू आर्थिक वर्षको पहिलो त्रैमाससम्म १० करोड रुपैयाँमात्र नाफा आर्जन गर्न सफल भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
