‘नगर प्रमुख हुँदा धेरै विकास गरेकोले मै जित्छु’

निर्वाचन विशेष

काठमाडौं–३‘नगर प्रमुख हुँदा धेरै विकास गरेकोले मै जित्छु’

नेपाल लाइभ आइतबार, कात्तिक १३, २०७९ १३:५४

मंसिर ४ गते हुने प्रतिनिधि सभा निर्वाचनमा काठमाडौं- ३ बाट नेपाली कांग्रेसका सन्तोष चालिसे मैदानमा उत्रिएका छन्। उनको प्रतिस्पर्धा नेकपा एमालेका कृष्ण राईसँग हुँदैछ।काठमाडौं- ३ मा उम्मेदवार बनेका कांग्रेस उम्मेदवार चालिसे पार्टीका क्षेत्रीय सभापति एवं गोकर्णेश्वर नगरपालिकाका पूर्वप्रमुख हुन्।

जनप्रतिनिधि हुँदा अघि सारेका विकासका योजना र जनताका काम नै आफूले जित्ने आधार भएको दाबी गर्छन् चालिसे।

यो क्षेत्रमा सुरुमा मित्रवत प्रतिस्पर्धा गर्ने भन्दै सत्ता-गठबन्धनका दलले छुट्टाछुट्टै उम्मेदवारी दर्ता गराए पनि पछि माओवादी केन्द्रका उम्मेदवार बद्री बजगाईंले कांग्रेस उम्मेदवार चालिसेलाई नै समर्थन गर्ने निर्णय गरेका थिए। उनै चालिसेसँग निर्वाचनका विषयमा नेपाल लाइभले गरेको कुराकानी:

तपाईंलाई काठमाडौं- ३ का जनताले किन भोट दिने?
म ४० वर्षदेखि यही क्षेत्रमा जनताको नजिक रहेर काम गरिरहेको छु। मैले गरेको कामको मूल्यांकन गरेर जनताले मत दिने हुन्। मैले आजसम्म जे गर्दै आएको छु, त्यो प्रत्यक्ष रुपमा जनताको सामु छ।

मैले ५ वर्षमा नगपालिकाको प्रमुख भएर गरेको सम्पूर्ण काम जनतामाझ छर्लङ्ग छ। त्यस कारण सम्पूर्ण मतदाताले मूल्याङ्कन गर्नुभएको छ, अब प्रतिनिधि सभामा पनि यही मान्छे पठाउनुपर्छ। यसले यस क्षेत्रका बारेमा संसदमा कुरा उठाउन सक्छ भनेर।

यो मान्छे बोल्न सक्छ। प्रतिनिधित्व गर्न सक्छ। यो जत्तिको व्यक्ति यो क्षेत्रमा अरु छैन भनेर नै पार्टीले पनि टिकट दिएको हो। जनताले पनि मलाई मत हालेर निर्वाचित गराउनुहुन्छ भन्ने विश्वास छ।

तपाईंका अजेण्डा के–के हुन्?
मेरा मुल अजेण्डा भनेको मैले संसदमा बोल्ने र पास हुने बिलहरु मुलुककै लागि हुन्छ। मेरो क्षेत्रको विषयमा मुख्य गरी दुई तीन वटा अजेण्डा छन्। यहाँ सुकुम्बासीको ठूलो समस्या छ। त्यसलाई जसरी पनि स्थायी रुपमा समाधान दिनुछ। ती सुकुम्बासी दाजुभाइलाई लालपुर्जा दिलाउनु छ।

अर्को कुरा, सुन्दरीजलबाट माथि ठूलो गाउँमा आवत-जावत गर्नका लागि धेरै पैसा तिर्नुपर्ने दुखद अवस्था छ। आफ्नै गाउँ-टोल हिँड्न पनि पैसा तिर्नुपर्ने अवस्था छ। यसलाई हटाउन पहल हुनेछ।

धेरै युवा बेरोजगार हुनुहुन्छ। उहाँहरुलाई कसरी स्वरोजगार बनाउने भन्ने विषयमा पनि म लागिपर्नेछु।

यो बाहेक महिला दिदी-बहिनीहरुले स्वतन्त्र भएर शान्तिपूर्वक हिँड्न र बाँच्न पाउने अधिकारका लागि पनि लड्नेछु। जबसम्म शान्ति र सुरक्षा हुँदैन मान्छेले केही काम नै गर्न सक्दैन। त्यस कारण यी विषयमा दृढ संकल्पका साथ संसदमा कुरा राख्नेछु।

तपाईंको क्षेत्रमा पार्टीको आन्तरिक विवाद पनि देखिएको छ। त्यो विवाद कसरी मिलाउँदै हुनुहुन्छ?
विवाद नभएको पार्टी कुन होला र? पार्टीभित्र असन्तुष्टि हुन्छ। असन्तुष्टि जाहेर गर्नुहुन्छ साथीहरुले। असन्तुष्टि जाहेर गरेर पनि पार्टीलाई सहयोग गर्न आउनुहुन्छ। टिकट नपाउँदा असन्तुष्टि जाहेर गर्नु स्वभाविक पनि हो। तर अब यहाँ कोही असन्तुष्ट छैन।

एक दुई जनाले स्वतन्त्र उम्मेदवारी दिनुभएको छ। स्वतन्त्र उम्मेदवारी दिन पाइन्छ। उहाँहरुलाई हामीले सम्झाउने काम गरिरहेका छौं। सायद अन्तिम दिनसम्म उहाँहरुले मलाई समर्थन गरेर छोड्नुहुन्छ होला। अरु चाहिँ त्यस्तो विवाद पार्टीभित्र छैन।

तपाईंको क्षेत्रमा अरु उम्मेदवारसँग कस्तो प्रतिस्पर्धा हुने देख्नुभएको छ?
प्रतिस्पर्धा त प्रतिस्पर्धा नै हो यो। प्रतिस्पर्धा त भई नै हाल्छ। कस्तो प्रतिस्पर्धा हुन्छ भन्ने विषयमा म लामो समयदेखि काम गरेको नाताले, राम्रो काम गरेको नाताले, सम्पूर्ण मतदाताले रुचाएको व्यक्ति भएको नाताले मलाई त्यस्तो ठूलो प्रतिस्पर्धा होला जस्तो लाग्दैन।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एनपीएल खेल्न काठमाडौं आइपुगे शिखर धवन

यू–१९ एसिया कप: श्रीलंकासँग नेपाल ५५ रनले पराजित

मतगणनाको अद्यावधिक परिणाम आयोगको बेवसाइटमा हेर्न सकिने