निर्वाचन विशेष

सिन्धुलीमा माओवादी र पूर्वमाओवादी आमने-सामने: कसको पल्ला भारी ?

नारायण अधिकारी सोमबार, असोज ३१, २०७९ २०:२३

काठमाडौं- आगामी मंसिर ४ मा हुने प्रतिनिधि सभा निर्वाचनमा दुई क्षेत्र रहेको सिन्धुलीबाट मुख्य तीन दलबाट चार जना उम्मेदवार प्रतिस्पर्धामा उत्रिएका छन्। चारै जना उम्मेदवार नयाँ अनुहार हुन्।

सिन्धुली- १ मा गठबन्धनको तर्फबाट नेपाली कांग्रेसका श्याम घिमिरे उम्मेदवार बनेका छन् भने उनीसँग नेकपा एमालेका प्रदीप कटुवाल प्रतिस्पर्धा गर्दैछन्।

सिन्धुली- २ मा गठबन्धनकै अर्को घटक माओवादी केन्द्रका राजन दाहाल चुनावी मैदानमा छन्। उनीसँग माओवादीबाटै एमाले प्रवेश गरेका मनोजजंग थापा प्रतिस्पर्धामा छन्। यी चारै प्रतिस्पर्धीमध्ये जसले जिते पनि प्रतिनिधि सभा प्रवेश उनीहरुका लागि पहिलो अनुभव हुनेछ।

यो पटक कांग्रेस-माओवादीले गठबन्धनबाट उम्मेदवारी दिएका छन् भने एमाले उनीहरुसँग प्रतिस्पर्धा गर्दैछ। यस्तो अवस्थामा सिन्धुलीको चुनावलाई निकै चासोका साथ हेरिएको छ।

एमाले किल्लामा गठबन्धनको अवस्था कस्तो ?
सिन्धुली- १ एमालेको राम्रो पकड रहेको क्षेत्र मानिन्छ। २०७४ को प्रतिनिधि सभा चुनावमा सो क्षेत्रबाट एमालेका गणेश पहाडी विजयी भएका थिए। त्यतिबेला माओवादी र एमालेले गठबन्धन गरेर उम्मेदवारी दिएका थिए।

एमालेका पहाडीले कांग्रेसका प्रेमचन्द्र दाहाललाई करिब १० हजार मतान्तरले पराजित गरेका थिए। पहाडीले ३२ हजार ५ सय २९ मत ल्याउँदा दाहालले २२ हजार ३ सय ८९ मत ल्याएका थिए।

तर, अहिले अवस्था फेरिएको छ। कांग्रेस र माओवादीले गठबन्धन गरेर उम्मेदवारी दिएका छन्।

२०७४ को चुनावमा सिन्धुली- १ को (क) बाट प्रदेश सभा उम्मेदवार बनेका घिमिरे त्यतिबेला माओवादीका राजन दाहालसँग पराजित भएका थिए। अहिले भने माओवादीकै साथ पाएकाले घिमिरे चुनाव जितिनेमा ढुक्क देखिन्छन्।

तर, घिमिरेलाई चुनाव जित्न त्यति सहज भने छैन। यसअघि यसै क्षेत्रको प्रदेश सभा (ख) बाट निर्वाचन जितेका प्रदीप कटुवाल प्रतिस्पर्धी छन्। घिमिरेभन्दा आफू स्थानीय स्तरमा बढी भिजेकोले जितिनेमा कटुवाल आशावादी छन्।

हरेकजसो स्थानीय समस्यालाई नियालेर हेरेको र स्थानीय स्तरमा लोकप्रिय रहेकोले आफूले चुनाव जित्ने कटुवालको दावी छ।

क्षेत्र नम्बर १ को वडागत मतलाई आधार मानेर हेर्दा मुख्य तीन पार्टीमा एमाले नै अगाडि देखिन्छ। दुधौली नगरपालिका, फिक्कल गाउँपालिका, गोलन्जोर गाउँपालिका, तीन पाटन गाउँपालिका र कमलामाई नगरपालिकाको ९, १३ र १४ वडा क्षेत्र नम्बर १ मा पर्छन्। यो क्षेत्रमा जम्मा ४१ वटा वडा पर्छन्।

स्थानीय निर्वाचनमा कांग्रेसले २१ वटा वडा जिते पनि मत संख्याको आधारमा भने एमाले बलियो देखिन्छ। एमालेका वडाध्यक्षले ३० हजार ३३ मत पाउँदा कांग्रेसका वडाध्यक्षले २७ हजार ६ सय ८२ र माओवादीका वडाध्यक्षले १३ हजार ३ सय ६९ मत पाएका थिए।

कांग्रेस र माओवादीका वडाध्यक्षले पाएको मत जोड्दा एमालेका वडाध्यक्षले पाएको मतभन्दा थोरै मात्रै बढी देखिएकाले पनि यो क्षेत्रमा कांग्रेस र एमालेका उम्मेदवारबीच कडा प्रतिस्पर्धा हुने देखिन्छ।

माओवादी भर्सेस पूर्वमाओवादी
माओवादीको गढ मानिएको सिन्धुली- २ मा यो पटक माओवादी र पूर्वमाओवादीबीच भिडन्त हुने भएको छ। माओवादीबाट लेखनाथ दाहाल (राजन) र एमालेबाट उठेका पूर्वमाओवादी मनोजजंग थापा छन्।

माओवादीको गढ मानिएको यो क्षेत्रमा एमालेले समेत पूर्वमाओवादीलाई उम्मेदवार बनाउनुलाई अर्थपूर्ण रुपमा हेरिएको छ।

२०७४ को चुनावमा यस क्षेत्रबाट माओवादीका हरिबोल गजुरेलले चुनाव जितेका थिए। अहिले उनको ठाउँमा यसअघि सिन्धुली- १ को प्रदेश सभा (क) बाट विजयी भएका दाहाल चुनावी प्रतिस्पर्धामा छन्।

स्थानीय स्तरमा लोकप्रिय मानिएका दाहाल माओवादी गढ मानिएको क्षेत्रबाट प्रतिस्पर्धामा उत्रिएकाले सहजै चुनाव जितिनेमा विश्वस्त देखिन्छन्। त्यसमाथि पनि कांग्रेसको समेत साथ रहेकाले सहजै चुनाव जित्ने उनको दाबी छ।

यता एमालेबाट भने पूर्वमाओवादी नै रहेका मनोजजंग थापा प्रतिस्पर्धामा उत्रिएका छन्। माओवादी गढ मानिएको क्षेत्रबाट एमालले पूर्वमाओवादीलाई नै उम्मेदवार बनाउनुलाई निकै रणनीतिक रुपमा हेरिएको छ।

एमालेको आफ्नो मतमा माओवादीको केही मत तान्न सकिने र केही असन्तुष्ट पक्षको मत तान्न सकेमा चुनाव प्रतिस्पर्धात्मक बन्न सक्ने एमालेको विश्लेषण छ। सोही रणनीतिका साथ एमालले पूर्वमाओवालीलाई नै उम्मेदवार बनाएको हुनसक्ने विश्लेषण गरिएको छ।