सुदूरपश्चिम प्रदेश: अघिल्लोपटक निर्वाचित ३२ सांसदमध्ये १३ जना पुन: प्रदेशकै प्रतिस्पर्धामा

राजनीति

शेरबहादुर ऐर बुधबार, असोज २६, २०७९ ०६:३६

धनगढी– पहिलो प्रदेश सभा निर्वाचन २०७४ मा वााम गठबन्धनबाट उम्मेदवार थिए नेकपा एमालेका पठानसिंह बोहरा। उनी यसपटक पनि प्रदेश सभाकै उम्मेदवार बनेका छन्।

आइतबार डडेल्धुरामा उनले निर्वाचन क्षेत्र नम्बर १ बाट उम्मेदवारी दर्ता गराएका छन्। डडेल्धुरामा पठानसँग नेकपा माओवादी केन्द्रका उम्मेदवार खगराज भट्टले प्रतिस्पर्धा गर्दैछन्।

२०७४ सालमै सम्पन्न प्रदेश सभा निर्वाचनमा बाजुरा क्षेत्र नम्बर १ को प्रदेश सभा ‘क’मा बलदेव रेग्मी निर्वाचित भए। मंसिर ४ गते हुन लागेको प्रदेशसभा निर्वाचनका लागि उनले पनि पुनः उम्मेदवारी दर्ता गराएका छन्।

पूर्व प्रदेश सभा सदस्य बोहरा र रेग्मी जस्तै सुदूरपश्चिम प्रदेश सभामा अघिल्लो निर्वाचनमा निर्वाचित आधा जति प्ररतिनिधि यसपटक पनि प्रदेश सभामै उठेका छन्। प्रदेश सभामा दोहोरिन चाहेर उम्मेदवारी दर्ता गराउनेमा मन्त्री, पूर्वमन्त्रीदेखि संसदीय समितिका सभापति, प्रमुख सचेतक, प्रदेश सभा सदस्यहरु रहेका छन्।

एकीकृत समाजवादी पार्टीकै इन्चार्जसमेत रहेका दीर्घबहादुर सोडारीले कैलाली क्षेत्र नम्बर ४ प्रदेश सभा ‘क’ बाट उम्मेदवारी दर्ता गराइ प्रदेश सभामा दोहोरिने तयारी गरिरहेका छन्। उनी प्रदेशको भौतिक पूर्वाधार मन्त्री पनि हुन्।

यस्तै पूर्व सामाजिक विकासमन्त्री समेत रहेका लालबहादुर खड्काले एकीकृत समाजवादी पार्टीबाट कञ्चनपुर क्षेत्र नम्बर १ प्रदेश सभा ‘ख’ बाट उम्मेदवारी दर्ता गराएका छन्।

नेकपा एमालेबाटै कैलाली क्षेत्र नम्बर ५ को प्रदेश सभा ‘क’ नेपालु चौधरीले उम्मेदवारी दर्ता गराएका छन्। उनी प्रदेश सभामा विद्यायन तथा प्रदेश मामिला समितिका सभापति पनि थिए।

यता बैतडी क्षेत्र नम्बर १ को प्रदेश सभा ‘ख’मा नेकपा एमालेबाट लिलाधर भट्टले आइतबार उम्मेदवारी दर्ता गराए। उनी नेकपा एमालेको संसदीय दलको प्रमुख सचेतकसमेत बनिसकेका छन्।

यस्तै अघिल्लो प्रदेशसभा निर्वाचनमा वाम गठबन्धनबाट कैलाली क्षेत्र नम्बर २ ‘ख’ निर्वाचित एमालेका रतन थापा यसपटक भने उनी नागरिक उन्मुक्ति पार्टीबाट प्रदेश सभामा उम्मेदवार बनेका छन्। पार्टीको विधान विपरीत काम गरेको भन्दै कारबाही गरेपछि उनी नागरिक उन्मुक्ति पार्टीमा प्रवेश गरेका हुन्। उनले पुनः सोही क्षेत्रबाट उम्मेदवारी दिएका छन्।

सुदूरपश्चिम प्रदेशको आन्तरिक मामिला तथा कानुनमन्त्री रणबहादुर रावल पनि पुनः प्रदेश सभामा दोहोरिने दाउमा छन्। कैलाली क्षेत्र नम्बर १ ‘ख’बाट उनले कांग्रेसबाट आइतबार उम्मेदवारी दर्ता गराएका छन्।

उनीमात्र होइन यतिबेला प्रदेशका अधिकांश मन्त्रीले पुनः प्रदेश सभाकै लागि उम्मेदवारी दिएका छन्। उद्योग, पर्यटन, वन तथा वातावरणमन्त्री रहेका नेकपा माओवादी केन्द्रका मानबहादुर धामीले दार्चुला क्षेत्र नम्बर १ ‘ख’, सामाजिक विकासमन्त्री गोविन्दराज बोहराले डडेल्धुरा क्षेत्र नम्बर १ क्षेत्र ‘ख’, आर्थिक मामिला राज्यमन्त्री प्रकाश रावलले कञ्चनपुर क्षेत्र नम्बर ३ ‘क’, पूर्व आर्थिक मामिला राज्यमन्त्री अमरबहादुर साउदले कैलाली क्षेत्र नम्बर ३ ‘ख’ बाट उम्मेदवारी दिएका छन्।

प्रदेश सभा सदस्य रहेका माओवादी केन्द्रका अक्कलबहादुर रावलले अछाम क्षेत्र नम्बर २ ‘क’ र लोकतान्त्रिक समाजवादी पार्टीका कृष्णबहादुर चौधरीले कैलाली क्षेत्र नम्बर १ ‘क’ बाट उम्मेदवारी दिएका छन्।

२०७४ को निर्वाचनमा प्रत्यक्षमा निर्वाचित प्रदेश सभाका घद्द सांसदमध्ये यसपकट १३ जना पुनः प्रदेश सभाकै लागि प्रतिस्पर्धामा उत्रिएका छन्।

प्रदेशबाट उक्लिने प्रयास
यस्तै केही अघिल्लो निर्वाचनमा प्रदेश सभामा निर्वाचित प्रतिनिधि यसपटक प्रतिनिधि सभामा प्रवेश गर्ने प्रयासमा छन्। कैलाली क्षेत्र नम्बर ५ बाट यसपटक डिल्लीराज पन्त कांग्रेसबाट प्रतिनिधि सभाका लागि उम्मेदवार बनेका छन्। उनी २०७४ को निर्वाचनमा प्रदेश सभामा निर्वाचित भएका थिए।

यसैगरि २०७४ मा प्रदेश सभामा निर्वाचित भएर आर्थिक मामिलामन्त्री बनेका तारा लामा तामाङ पनि यसपटक प्रतिनिधि सभाको उम्मेदवार बनेका छन्। एमालेबाट कञ्चनपुर क्षेत्र नम्बर १ बाट उनले उम्मेदवारी दिएका छन्। सत्ता गठबन्धनबाट उम्मेदवार बनेकी माओवादी नेतृ बीना थापामगरसँग उनी प्रतिस्पर्धा गर्दैछन्।

यस्तै प्रदेशको आर्थिक मामिला मन्त्रालयको नेतृत्व सम्हालिसकेका एमाले नेता झपटबहादुर बोहोरा पनि यसपटक अछाम क्षेत्र नम्बर १ बाट प्रतिनिधि सभा उम्मेदवार बनेका छन्।

पालिकाबाट संसद्को तयारीमा
२०७४ को स्थानीय तह निर्वाचनमा मेयर पदमा विजयी भएका केही नेताले आगामी मंसिर ४ गते हुने प्रतिनिधि सभा तथा प्रदेश सभा निर्वाचनका लागि उम्मेदवारी दिएका छन्।

कैलालीको टिकापुर नगरपालिकाको मेयरमा २०७४मा निर्वाचित भएका तपेन्द्रबहादुर रावल यसपटक प्रतिनिधि सभाको दौडमा छन्। उनले एमालेका तर्फबाट कैलाली–१ मा उम्मेदवारी दिएका छन्।

यसैगरी बैतडीको पाटन नगरपालिकाका पूर्व मेयर केशव चन्दले पनि प्रतिनिधि सभाका लागि उम्मेदवारी दिएका छन्। उनी २०७४को निर्वाचनमा कांग्रेसबाट मेयरमा निर्वाचित भएका थिए।

यता २०७४ को स्थानीय तह निर्वाचनमा कैलालीको गोदावरी नगरपालिकामा एमालेबाट निर्वाचित भएका हरिसिंह साउँदले यसपटक प्रदेश सभा सदस्यका लागि उम्मेदवारी दिएका छन्। उनी कैलाली क्षेत्र नम्बर ४ को ‘ख’बाट उम्मेदवार बनेका छन्। एमालेबाटै ०७४ को स्थानीय तह निर्वाचनमा गौरिगंगा नगरपालिकाको मेयरमा निर्वाचित भएका भीम देउवा पनि यसपटक प्रदेश सभा सदस्यको दौडमा छन्। उनले कैलाली क्षेत्र नम्बर ४ को ‘क’बाट उम्मेदवारी दिएका छन्।

प्रदेश सभा सदस्यकै लागि कञ्चनपुरको क्षेत्र नम्बर–३ ‘ख’सुरेन्द्र विष्टले उम्मेदवारी दिएका छन्। उनी २०७४ को निर्वाचनमा कञ्चनपुरको भीमदत्त नगरपालिकाका मेयरमा निर्वाचित भएका थिए। उनी नेकपा एमालेबाट प्रतिस्पर्धा गर्दैछन्।

बैतडीको सुर्नयाँ गाउँपालिकाका पूर्वअध्यक्ष बीरबहादुर विष्टले पनि प्रदेश सभा सदस्यका लागि उम्मेदवारी दर्ता गराएका छन्। उनी २०७४ को निर्वाचनमा नेपाली कांग्रेसबाट सुर्नयाँ गाउँपालिकाको अध्यक्ष बनेका थिए। यसपटक पनि उनले सत्तारुढ गठबन्धनका साझा उम्मेदवारका रुपमा नेपाली कांग्रेसबाट प्रदेश सभामा प्रतिस्पर्धा गर्दैछन्।

बैतडीको पुर्चौडी नगरपालिकाकी पूर्व उप–मेयर जानकी ऐर बम प्रदेश सभाका लागि एमालेको समानुपातिक सूचिमा छन्।

२०७४ मा लम्कीचुहा नगरपालिकाकी उप–मेयर बनेकी पूजा थापा नागरिक उन्मुक्ति पाटीको समानुपातिक सूचीमा रहेकी छन्। उनी २०७४ को निर्वाचनमा नेकपा एमालेबाट उप–मेयर पदमा विजयी भएकी थिइन्।

प्रतिनिधि सभापछि प्रदेशको प्रतिस्पर्धामा
लालबहादुर थापा २०७४ सालमा बाजुरा निर्वाचन क्षेत्र नम्बर १ बाट प्रतिनिधि सभा सदस्यमा निर्वाचित भएका थिए। तर यसपटक भने उनले प्रदेश सभा सदस्यका लागि उम्मेदवारी दिएका छन्। बाजुरा ‘ख’ बाट उनले एमालेका तर्फबाट आइतबार उम्मेदवारी दर्ता गराएका हुन्।

२०७४ सालको प्रतिनिधि निर्वाचनमा २८ हजार ६५ मत प्राप्त गरि प्रतिनिधि सभा सदस्य बनेका थापाले प्रतिनिधि सभामा टिकट नपाएपछि प्रदेशमा उम्मेदवारी दर्ता गराएका हुन्।

उनी एमाले पार्टीका केन्द्रीय सदस्य तथा बाजुरा जिल्ला इन्चार्जसमेत हुन्। नेकपा एमालेबाट प्रतिनिधि सभामा बाजुराबाट कर्णबहादुर थापाले उम्मेदवारी दर्ता गराएका छन्। २०७४ को निर्वाचनमा थापा प्रदेशमा समानुपातिकमा बसेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।