धनगढी– धनगढी उपमहानगरपालिकाले विकल्प नदिई सडक संरचना हटाउन भनेको भन्दै व्यवसायीहरूले विरोध जनाएका छन्। उपमहानगरपालिकाले व्यवसायीलाई विस्थापित पार्ने प्रयास गरेको भन्दै उनीहरुले विरोध जनाएका हुन्।
उपमहानगरपालिकाले असोज मसान्तभित्र कैलालीपुलदेखि क्याम्पसरोडसम्मका सडकको ३० मिटर क्षेत्रभित्र पर्ने भौतिक संरचना खाली गर्न भदौ १३ गते सूचना जारी गरेको थियो। तर, अहिलेसम्म व्यवसायी तथा घरधनीहरुले भौतिक संरचना हटाउन थालेका छैनन्।
कैलाली उद्योग वाणिज्य संघले सो सडक संरचनाभित्र पर्ने व्यवसायीहरुसँग आइतबार छलफल गरेको थियो। छलफलमा व्यवसायीहरुले कोभिड महामारीका कारण व्यवसाय नै धरापमा परेका बेला उपमहानगरपालिकाको निर्णयले व्यवसायीहरु विस्थापित हुने अवस्था आउने बताए।
धनगढीको मुख्य बजारमा सुनचाँदी व्यवसाय गर्दै आएका टेकलाल श्रेष्ठले व्यवसाय घाटामा जाँदा बैंकको ब्याज तिर्न पनि नसकिरहेको बताए।
उनले भने, ‘सरकारको अहिलेको नयाँ मौद्रिक नीतिले लयमा फर्कन लागेको व्यवसाय थप मारमा रहेको छ। बैंकको ब्याज नै तिर्न नसक्ने अवस्थामा रहेको यस समयमा उपमहानगरपालिकाले जारी गरेको सूचनाले व्यवसायीलाई समस्या भइरहेको छ।’ उनले व्यक्तिको कुनै पनि घरमा क्षति नहुने गरी सडक विस्तार गर्ने कार्यमा सहयोग गर्ने बताए।
मुख्य बजारमा व्यवसायी गरिरहेका विनोद कुमार शाहले उपमहानगरपालिकाले आफूखुशी केही व्यक्तिको स्वार्थमा परेर व्यवसायीहरुलाई दुःख दिने काम गर्न लागेको आरोप लगाए।
‘भत्किने घर पछाडि रहेका घर धनीहरु सडकको संरचना ३० मिटर नै हुनुपर्छ भनिरहेका छन्। यस्तै व्यक्तिको स्वार्थमा परेर उपमहानगरपालिकाले व्यवसायीलाई कुनै विकल्प नदिई गलत कदम अघि बढाएको छ’, उनले भने।
उनका अनुसार उपमहानगरपालिकाले कार्यपालिकाको बैठकमा कुनै निर्णय नगराई एक्कासी पत्रपत्रिकामार्फत् सूचना जारी गराएको थियो। उनले भने, ‘कुन कानुनमा रहेर सडक संरचनाको क्षेत्राधिकार ३० मिटर तोकिएको हो? कार्यपालिका बैठकबाट निर्णय नगराएर व्यवसायीहरुलाई धम्काउने गरि संरचना खाली गर्न भनी समयावि दिइएको छ। त्यो मान्य हुँदैन।’
उपमहानगरपालिकाले सूचना जारी गरेदेखिनै केही व्यापारी तथा घरधनीहरुले विभिन्न चरणका बैठक बसाएका थिए। तर, व्यवसायी र घरधनीहरु एकमत नभएको कैलाली उद्योग वाणिज्य संघका उपाध्यक्ष दिनेश लम्सालले बताए। ‘घरधनीहरु व्यवसायीको पक्षमा केही सहमति गरेर आउँछन् कि भनेर संघ कुरेर बसेको थियो। तर, घरधनीहरुले सहकार्य नगरेपछि व्यवसायीको पक्षमा संघले आवाज उठाउनुपर्ने आवश्यक देखिएको हो’, उनले भने।
व्यवसायी ईश्वरप्रसाद खतिवडाले उपमहानगरपालिकाले बजेटको सुनिश्चितता नै नगरी सूचना जारी गरेको गुनासो गरे। ‘सडकको ३० मिटर खाली गर भनेर सूचना जारी गरेको छ। घरधनीले घर भत्काउलान् तर, सडक बनाउन स्रोतको त आवश्यक पर्छ। त्यसबारे अहिलेसम्म टुङ्गो लागेको छैन। यसले संरचना भत्काएपनि सडक बन्छ भन्ने ग्यारेण्टी समेत भएन’, उनले थपे।
उपमहानगरपालिकाले सो सडक आफ्नै स्रोतमा निर्माण गराउने दाबी गरिरहेको छ। तर, विभिन्न क्षेत्रबाट सहयोग भने अहिलेसम्म पाइरहेको छैन। यसले गर्दा सडक निर्माण गर्दा बजेट अभाव देखिने निश्चित रहेको उनको भनाइ छ।
व्यवसायी टेकेन्द्र जोशीले उपमहानगरपालिकाले सडक मिचिएको क्षेत्र हटाउनमा ध्यान नदिई मुख्य सडक चौडा गर्ने नाममा व्यवसायीलाई पीडा दिन खोजिरहेको बताए। ‘उपमहानगरपालिकाले सूचना जारी गरेपश्चात मुख्य बजारका व्यवसायीहरुलाई उधारोमा सामान थप्न समस्या भइरहेको छ’, उनले भने, ‘सडक भत्किन्छ। तिमीहरुको व्यवसाय सकियो भन्दै सहकारी तथा बैंकहरुले एकमुष्ट रकम तिर्न पत्र पठाइरहेका छन्। एकातिर व्यवसायीले सामान पाएका छैनन् भने अर्कोतिर बैंक तथा सहकारीको असुली आर्थिक मारमा पारिरहेको छ।’
कैलाली उद्योग वाणिज्य संघका अध्यक्ष पुष्प कुँवरले उपमहानगरपालिकाका निर्णयहरु व्यवसायीमैत्री बन्न नसकिरहेको बताए। उनले प्लाष्टिकजन्य सामग्रीहरु निषेध, व्यवसायीहरुसँग छलफलनै नगरी सडक संरचनामा परेका भौतिक संरचना खाली गर्न जारी गरिएको सूचना लगायतका उपमहानगरपालिकाको गतिविधि व्यवसायीमैत्री नरहेको बताए।
उनले संघका पदाधिकारीले पहिलो चरणमा उपमहानगरपालिकाका प्रमुख गोपल हमालसँग बसेर छलफल तथा ध्यानाकर्षण गराउने बताए। उनले भने, ‘नगर प्रमुखसँग निर्णय सच्याउन भनी आग्रह गर्छौं। त्यसपश्चात उहाँको गतिविधि जसरी अघि बढ्छ, संघले पनि त्यही अनुसार कदम चाल्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791271370.png)
-1786602170.png)
