विराटनगर– सत्ता गठबन्धनमा सहभागी दलहरुबीच सिट बाडफाँटको टुंगो नलाग्दै नेपाली कांग्रेसले धमाधम उम्मेदवार सिफारिस गर्न थालेको छ।
केन्द्रीय समितिको सर्कूलर अनुसार प्रतिनिधिसभा र प्रदेश सभाका लागि प्रत्यक्ष तथा समानुपातिकतर्फका उम्मेदवार सिफारिस गर्न थालिएको नेताहरुले बताएका छन्।
नेपाली कांग्रेस मोरङ नम्बर ४ को क्षेत्रीय समितिको बुधबार बसेको बैठकले प्रतिनिधिसभाको प्रत्यक्षतर्फ ५ जना र समानुपातिकतर्फ १५ जनाकोे नाम सिफारिस गरेको छ। प्रतिनिधिसभाको प्रत्यक्षतर्फ महेश आचार्य, अमृत अर्याल , गुरुराज घिमिरे, भीम पराजुली र दिलिप गच्छदारको नाम सिफारिस गरिएको क्षेत्रीय सभापति विनोद बस्नेतले जानकारी दिए।
आचार्य पार्टीको १४ औं महाधिवेशनमा उपसभापतिमा पराजित भएका थिए। त्यसबेला उनी शेरबहादुर देउवा र डा शेखर कोइराला कसैको पनि प्यानलमा परेका थिएनन्। पार्टीका केन्द्रीय सदस्य अर्याल देउवानिकट हुन्।
मोरङ क्षेत्र नम्बर ५ बाट राजनिति गर्दै आएका अर्यालले यसपटक क्षेत्र परिवर्तन गर्न खोजेका छन्। २०७४ मा वाम गठबन्धनका उम्मेदवार शिवकुमार मण्डलले सो क्षेत्रबाट अर्याललाइ पराजित गरेका थिए। अहिले यो क्षेत्रमा माओवादी केन्द्रको दाबी छ।
मोरङ ४ बाट प्रतिनिधिसभातर्फ प्रत्यक्षमा सिफाारिस भएका घिमिरे नेविसंघका पूर्वकेन्द्रीय अध्यक्ष हुन्। उनी पार्टीको १४औं महाधिवेशसनमा प्रदेश सभापतिमा झिनो मतले पराजित भएका थिए। उनी डा शेखर कोइराला निकट छन्।
पार्टीका केन्द्रीय सदस्य पराजुली विराटनगर महानगरपालिकाका पूर्वमेयर हुन्। विगतमा डा शेखर कोइराला समूहमा रहेका पराजुली पार्टीको १४औं महाधिवेशनमा समूह परिवर्तन गरि शेरबहादुर देउवा समूहमा लागेका थिए। उनी नेता कृष्णप्रसाद सिटौला निकट मानिन्छन्।
यसैगरि मोरङ ४ बाट प्रतिनिधिसभाको समानुपातिकतर्फ रामकृष्ण भटराई, इन्दिरा कार्की, दुर्गा कोइराला, सूची चौधरी, कविता सरदार, भोटनीदेवी खवास र मोहनलाल माझीको नाम सिफारिस गरिएको छ।
यस्तै, हरि प्रसाद न्यौपाने, उमावतीदेवी चौधरी, भक्तिनाथ माझी, प्रभाकर थापा, ज्ञानेन्द्र पौडेल, पवन कुमार सारडा, रामकुमार विश्वकर्मा र आमोद चौधरीको नाम पनि प्रतिनिधिसभाको समानुपातिकतर्फ सिफारिस भएको छ। सिफारिसमा परेका नामावली अब जिल्ला समितिमा पठाइने क्षेत्रीय सभापति बस्नेतले बताए। प्रदेश सभा सदस्यका लागि यसअघि नै नाम संकलन भइसकेको बताइएको छ।
मोरङको क्षेत्र नम्बर ४ मा सत्तारुढ दल नेपाली कांग्रेस र माओवादीबीच कसले सिट लिने भन्ने विवाद छ। २०७४ को निर्वाचनमा प्रतिनिधि सभामा वाम गठबन्धनका उम्मेदवार अमनलाल मोदीले सो क्षेत्रमा जितेका थिए।
मोदीले नेपाली कांग्रेसका उम्मेदवार महेश आचार्र्यलाई पराजित गरेका थिए। प्रदेश सभाका दुवै क्षेत्रमा पनि वाम गठबन्धनका उम्मेदवार निर्वाचित भएका थिए।
त्यसैका आधारमा माओवादी केन्द्रले सो क्षेत्रमा आफ्नो दावी गर्दै आएको छ। तर, कांग्रेसका नेताहरुले वाम गठबन्धन टुटेपछि त्यहाँ माओवादी निकै कमजोर भएको दाबी गर्दै सो क्षेत्र कांग्रेसको भागमा पार्न केन्द्रीय नेतृत्वलाई दबाब दिँदै आएका छ।
सिट बाँडफाँटमा आफ्नो भागमा परे सो क्षेत्रमा माओवादी केन्द्रबाट हालका सांसद अमनलाल मोदी नै उम्मेदवार बन्ने निश्चित जस्तै छ। एमालेले विनोद ढकाललाई अघि सार्ने तयारी गरेको बताइएको छ।
यस्तो छ तथ्यांक
२०७४ को चुनावमा वाम गठबन्धनका उम्मेदवार अमनलाल मोदीले ३३ हजार ५ सय २९ मत ल्याएर निर्वाचित भएका थिए। निकटम प्रतिद्वन्द्वी नेपाली कांग्रेसका महेश आचार्यले २६ हजार ८ सय मत पाएका थिए।
मोरङ ४ अन्तर्गत कटहरी गाउँपालिका, ग्रामथान गाउँपालिका र विराटनगर महानगरपालिकाका वडा नम्बर १, २, ३, ८ र १० नम्बर वडा पर्छन्।
त्यस्तै, बेलबारी नगरपालिकाका वडा नम्बर ५, ६ र ७ पनि सो क्षेत्रमा पर्छन्। गत वैशाख ३० गते भएको स्थानीय तहको निर्वाचनमा सो क्षेत्रका २२ वटा वडामध्ये १७ वडामा एमालेले जितेको छ। नेपाली कांग्रेसले ३, माओवादी केन्द्र र जसपाले एक/एक वडाध्यक्ष जितेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
