सुरक्षा/अपराध

१० महिनामा ८ पटक एटीएममा चोरी, एकै व्यक्ति दोहोरिनाले प्रहरीलाई चुनौती

रिखिराम जिसी शनिबार, भदौ ११, २०७९ १५:५४

पोखरा– गत साउन ३ गते मध्यराति २ बजे पोखरा–२७ लेखनाथस्थित तालचोकमा रहेको एनआईसी एसिया बैंकको एटीएमबाट करिब १५ लाख चोरी भयो।

बैंकको सेन्टर सर्भिलेन्सले असामान्य गतिविधि भइरहेको थाहा पाएपछि प्रहरी पुग्दा एटीएम फोड्ने प्रयास भएको देखियो। तर मान्छे फेला परेन। सोही दिन बिहान मात्रै थाहा भयो एटीएम फोडेर रकम चोरी भएको रहेछ। अनुसन्धान गर्दा एटीएम मेसिन फोडेर ज्ञद्ध लाख ठज्ञ हजार पाँच सय रुपैयाँ चोरी भएको पत्ता लाग्यो।

प्रहरीले चोरी गर्नेलाई खोजी गरिरहेको थियो। करिब एक महिनापछि प्रहरीले चोरीमा संलग्न अनिश तामाङलाई नेपाल–भारत सीमाको बेलहियाबाट पक्राउ गर्‍यो। उनलाई कास्की प्रहरीले जिल्ला अदालत कास्कीबाट ७ दिनको म्याद थप गरी अनुसन्धान गरिरहेको छ।

एनआईसी एसिया मात्रै होइन तामाङले सोही अर्को बैंकको एटीएम पनि फोड्ने कोशिस गरेको प्रहरी अनुसन्धानबाट खुलेको छ। चोरी भएको एटीएममा भने साँचो राम्ररी नलागेले पैसा निकाल्न सहज भएको कास्की प्रहरी प्रवक्ता डिएसपी सुन्दर तिवारीले बताए। ‘एटीएमको साँचो राम्ररी लागेको थिएन। त्यसैले नै अनिशले त्यहाँबाट पैसा निकाल्न सफल भएका हुन्,’ तिवारीले भने।

यस्तै गत वैशाख ४ गते पस्र्याङस्थित माछापुच्छ्रे बैंकको एटीएम चोर्ने प्रयास भयो। सेन्ट्रल सर्भिलेन्सबाट तुरुन्त जानकारी भएपछि चोरी असफल भयो। ती नै व्यक्तिले माछापुच्छ्रे बैंककै पृथ्वीचोक शाखामा वैशाख २९ गते फेरि एटीएम चोरी गर्ने प्रयास गरे। तर, उनको दुवै प्रयास असफल भयो। प्रहरीले अनुसन्धानपछि दीपक श्रेष्ठ ‘बेले’लाई पक्राउ गरी अभद्र व्यवहारमा मुद्दा चलाएको छ। उनलाई लागुऔषधसम्बन्धी मुद्दामा पनि वडा प्रहरी कार्यालय बैदाममा अनुसन्धान भइरहेको छ।

साउन २० गते रातको ११ बजे बिरौटामा एनआईसी एसिया बैंकको एटीएम फोड्ने प्रयास भयो। पर्वत कुश्मा नगरपालिका ३ बस्ने ३३ वर्षीय कृष्णबहादुर विकलाई प्रहरीले चोरी गर्न लागेका बेला पक्राउ गर्‍यो। उनी यसअघि नै माछापुच्छ्रे बैंकको एटीएम मेसिन चोरी गरेर कैद भुक्तानी गरिसकेको व्यक्ति हुन्।

पहिला एटीएम चोरी प्रयासकै कारण जेल परेका कृष्ण कैद भुक्तानपछि गत वैशाखमा जेलबाट निस्केका थिए। डिएसपी सुन्दर तिवारीका अनुसार कृष्णले गतवर्ष माघ ८ गते माछापुच्छ्रे बैंकको एटीएम मेसिनबाट रकम चोरी गरेका थिए। त्यस घटनापछि लागेको मुद्दामा धरौटी बुझाउन नसक्दा ३ महिना जेल परेका थिए। फेरि एनआईसी बैंकको मेसिनबाट चोरी गर्दै गरेको अवस्थामा पक्राउ परे।

पछिल्लो १० महिनायता पोखरामा मात्रै एटीएम चोरीका ८ वटा घटना भएकाछन्। पटक–पटक यस्ता घटना दोहोरिनुले पर्यटकीय नगरी पोखराको सुुरक्षा व्यवस्थामा प्रश्न उठेको छ। त्यो पनि बारबार एकै व्यक्तिबाट यस्ता घटना हुनुले पनि प्रहरीमाथि चुनौती थपिएको छ।