सत्तारुढ दल नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानले स्थानीय तह निर्वाचन २०७९ मा पार्टीका तर्फबाट निर्वाचित प्रमुख, उपप्रमुख, अध्यक्ष तथा उपाध्यक्षका लागि दुई दिने अभिमुखीकरण कार्यक्रम साेमबारबाट सुरु गरेकाे छ। त्यही कार्यक्रममा छन् उनीहरुलाई जिताउन सक्रिय नेताहरु। तिनैमध्येका एक हुन् सुदूरपश्चिमका कांग्रेस सभापति वीरबहादुर बलायर। स्थानीय तह निर्वाचनदेखि नै उनले सुदूरपश्चिममा कांग्रेस एक्लै भिड्नेगरी मजबुत रहेको दाबी गर्दै आइरहेका छन्। अहिले उनको निर्वाचन क्षेत्र नै भागबन्डामा सकस पर्नेमध्येमा परेकाे छ। कारण यसअघि उनलाई हराएका प्रेम आले गठबन्धनबाट टिकटको लबिङ गरिरहेका छन्। बलायरसँग यही सन्दर्भमा रहेर नेपाल लाइभका भूपेन्द्र शाह ठकुरीले गरेको कुराकानी :
कांग्रेस गठबन्धनमा प्रतिबद्ध देखिन्छ। यो गठबन्धन सत्ताको लागि मात्रै हो कि के अरु केही उद्देश्य बाँकी छन्?
पहिलो कुरा गठबन्धन सरकारका लागि मात्र होइन। दोस्रो कुरा गठबन्धन कुन दलको बीचमा हुँदैछ भन्ने प्रष्ट हुनुपर्छ। कुन मूल्य, मान्यता र उद्धेश्यका लागि गठबन्धन हो? सैद्धान्तिक रुपमा हुँदै नहुने गठबन्धन हुँदैछ कांग्रेस र कम्युनिष्टबीचमा। उनीहरु तलदेखि माथिसम्म एकजुट हुँदैनन्। यसले धेरै उपलब्धी हासिल गर्यो भने पनि दुर्भाग्य नै हुन्छ। फेरि अर्को दुर्घटना हुनसक्छ। अहिले जुन गठबन्धन दलहरुले गरेका छन्, त्यसको विरुद्धमा म पनि छैन। हामीले गठबन्धन गरेर एमालेलाई जित्ने हो। तर जित्न नसके त्यस्तो गठबन्धनले कुनै अर्थ राख्दैन।
तपाईंले आफ्नो निर्वाचन क्षेत्रको स्थितिलाई हेरेर गठबन्धन गर्नुहुँदैन भन्न खोज्नु भएको हो?
कांग्रेसले आफ्नो क्षमता र संगठनलाई गुमाएर अर्को पार्टीको क्षमता अभिवृद्धि गर्नेगरी गठबन्धन गर्नुहुँदैन। त्यस्तो गठबन्धन गर्ने बाटोमा गयो भने कांग्रेस पतन हुन्छ। त्यसैले अहिले धेरै बोल्नुभन्दा पनि अड्कलबाजीका आधारमा गठबन्धन हुनुहुँदैन भन्ने पक्षमा छु। व्यक्ति विशेषका आधारमा गठबन्धन गरिएको हैन। मूल्य र मान्यताका लागि हो भने त्यो फरक कुरा। व्यक्तिका लागि हो भने त को व्यक्ति? कस्तो? कसको क्षमता के हो? कसको हैसियत के? भन्ने त देखिएका छन्।
स्थानीय रुपमा ठूलै नेता हुँ भन्ने मानिसले आफ्नो पार्टीलाई महत्वका साथ राख्नुपर्छ। म दाबाका साथ भन्छु गत बैशाख ३० गतेको स्थानीय तह निर्वाचनमा डोटीमा कांग्रेस रोल नम्बर एक हो। आज कांग्रेसले पाएको मत सारा त्यहाँका अरु पार्टीको मत जोड्दा पनि ३ हजार मतभारले अघि छ। स्थानीय निर्वाचनमा टोल–टोलमा समेत उम्मेद्वार हुनुहुन्थ्यो। त्यसैले यो गठबन्धन उद्धेश्य, सिद्धान्त र मुलुकको समृद्धिका लागि हुनुपर्छ। मुलुकको प्रगतिलाई अगाडि बढाउने र नेपाली लोकतान्त्रिक राज्य व्यवस्थाका लागि गठबन्धन हुनुपर्छ। यहाँ व्यक्तिका लागि गठबन्धनले कुनै अर्थ रहँदैन।
तपाईंले गठबन्धनको कुरा गरिरहँदा तपाईंको क्षेत्रबाट समाजवादी पार्टीका पूर्वमन्त्री प्रेम आलेले टिकट पाउनु् भयो भने कांग्रेसका मतदाताले मत दिन मुस्किल हुन्छ भन्न खोज्नुभएको हो?
म कुनै व्यक्ति विशेषको नाम उच्चारण गर्न चाहन्नँ। मैले मेरो जिल्लाको कुरा मात्रै गरेको हैन। देशभरको कुरा गरेको हो। कांग्रेसभित्र पनि त्यस्तो खालका मान्छेहरु छन्। जीवनमा कहिल्यै कांग्रेसलाई भोट हालेका छैनन्, कांग्रेस भएरै बसेका छन्। तिनीहरुको भाषा र शैलीको म धेरै विश्वास गर्दिनँ। कांग्रेसलाई चाहिएको बेला कांग्रेस नभइदिने, अरु बेला ठूलो कांग्रेस भइराखेको के अर्थ रह्यो?
गठबन्धनमा बसेर गठबन्धनका दलहरुलाई दुःख दिने, एमालेसँग हातेमालो गर्ने र गठबन्धनकै मानिसहरुलाई प्रभावित गरेर आर्थिक अपचलन गरेर अगाडि बढ्न खोज्नेसँग कांग्रेसको गठबन्धन हुँदैन।
म पनि नेपाली कांग्रेस सुदूरपश्चिम प्रदेशको सभापति हुँ। कहाँ–कहाँ कसरी गठबन्धन गर्ने भन्ने निर्णय मेरो समितिमा पनि निहित छ। त्यसका लागि म आफू कांग्रेसको जिम्मेवार नेता भएका कारणले गठबन्धन कसरी गर्ने, कसरी जितिन्छ भन्ने अधिकार मलाई पनि छ। त्यसको खाका दिने अधिकार मलाई पनि छ । त्यसैले कसले के भन्यो भन्ने कुराचाहिँ महत्वपूर्ण होइन।
तपाई आगामी निर्वाचनपछि मुख्यमन्त्री बन्ने चर्चा पनि छ नि?
म संगठन निर्माणका लागि तल गएको हुँ। म त रिटायर्ड हुनुपर्छ राजनीतिबाट। आगामी ५ वर्षपछि मैले कुनै पनि प्रत्यक्ष निर्वाचन लड्ने छैन। त्यति मात्र हैन म अनुदानको राजनीति गर्ने मान्छे पनि हैन। त्यसैले म संघ र प्रदेशमा म आइहाल्छु भनेर पूरा जानकारी गराएर हिँड्ने मान्छे पनि हैन। मैले यो ५ वर्षको अवधिमा आफ्नो कार्यकालभरि कांग्रेसको एउटा मजबुत जग हाल्न सकें भने त्यो नै मेरा लागि सुखद रहन्छ।
स्थानीय धरातल कमजोर भएका कारण कांग्रेसको चिन्ता लागेर म केन्द्रीय सदस्य भइसकेको मान्छे प्रदेशमा झरेको हुँ। म प्रदेशको सभापति भइसकेपछि पहिले जिल्लाहरुमा र अन्तिममा आफ्नो जिल्लामा अभियान चलाएर यो किसिमको राम्रो परिणाम ल्याउन सकिएको हो। त्यसका केही कारण छन्। गठबन्धनका विषयमा बाधक भएर अभिव्यक्ति दिने मेरो मनसाय छैन । म धैर्य लिने मान्छे हुँ। हतार छैन। अर्काले बोल्नासाथ प्याच्च बोल्नैपर्छ भन्ने पनि छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
