एजेन्सी–अमेरिकी संसद्की सभामुख न्यान्सी पेलोसी ताइवान गएमा अमेरिकाले यसको मूल्य चुकाउनुपर्ने चीनले चेतावनी दिएको छ।
चीनको परराष्ट्र मन्त्रालयका प्रवक्ता हुवा चुनयिङले पत्रकार सम्मेलनमा भनेकी छिन्, ‘यसको जिम्मेवारी अमेरिकी पक्षको हुनेछ र अमेरिकाले चीनको सार्वभौमसत्ता र सुरक्षा हितमा आँच पुर्याउने काम गरे त्यसको मूल्य चुकाउनुपर्नेछ।’
रोयटर्सका अनुसार, ताइवानका प्रधानमन्त्री सु त्सेङ चांगले ताइवानले अमेरिकी प्रतिनिधि सभाकी सभामुख न्यान्सी पेलोसीको सम्भावित भ्रमणअघि विदेशी पाहुनाहरूलाई न्यानो स्वागत गर्ने बताएका छन्। साथै, उनले ताइवानले त्यस्ता पाहुनाहरूको लागि उत्तम उपायहरू लिने र उनीहरूको योजनालाई सम्मान गर्ने बताए।
यसअघि अमेरिकी सदनकी सभामुख न्यान्सी पेलोसीको ताइवान पुग्ने कथित योजनालाई रोक्न चिनियाँ सेनाले शक्ति प्रदर्शन गरेको खबर आएको थियो। बीबीसीका अनुसार पेलोसीको एसिया भ्रमण सुरु भइसकेको छ तर ताइवानको बारेमा भने केही उल्लेख गरिएको छैन।
उनको कार्यालयले भ्रमण इन्डो–प्यासिफिक क्षेत्रको रहेको बताएको छ। जसमा सिंगापुर, मलेसिया, दक्षिण कोरिया र जापानको यात्रा समावेश छ।
विगत २५ वर्षमा कुनै पनि निर्वाचित उच्च पदस्थ अमेरिकी अधिकारीले ताइवान भ्रमण गरेका छैनन्। चीनले न्यान्सी पेलोसी ताइवान गएमा नराम्रो परिणाम भोग्नुपर्ने चेतावनी दिएको छ।
न्यान्सी पेलोसीको ताइवान भ्रमणले चिनियाँ प्रभावलाई असर गर्न सक्ने चीनको धारणा छ। अमेरिकाले ताइवानमा पृथकतावादी अजेन्डामा काम गरिरहेको छ, जसलाई न्यान्सी पेलोसीको भ्रमणले बलियो बनाउन सक्छ भन्ने चीनको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
