आँसुको वर्ग

साहित्य डबली

कविताआँसुको वर्ग

मुक्तान थेबा शनिबार, असार २५, २०७९ १४:०१

आँसु कुनै माल होइन
आँसुको मूल्य हुन सक्दैन
भन्छन्– भन्नेहरू।

आँसु
अनुभूतिको गहिराइबाट उर्लिएको भावना हो।
आँसु दुःखमा खस्छ
आँसु पीडामा खस्छ
आँसु हर्षमा खस्छ
भन्छन्– भन्नेहरू।

आँसु
बगेपछि दुःख बग्छ भन्छन्
आँसु बगेपछि
चोटहरू बग्छ भन्छन्
आँसु बगेपछि
एकोहोरो धड्किएको मुटुको गति शान्त हुन्छ भन्छन्।

मान्छेहरू आँसुको महाकाव्य लेख्छन्
मान्छेहरू आँसुको शोककाव्य लेख्छन्
मान्छेहरू आँसुको महाआख्यान लेख्छन्
मान्छेहरू आँसुको व्यापार गर्छन्
यो सत्य हो।

आँसु किन झर्छ?

प्रेमी/प्रेमिकाको भागमा धोका पर्दा?
या वर्षौँ प्रतीक्षापछिको पहिलो भेट?
योनीद्वार छेदनको असह्य पीडा?
या भर्खरै जन्मिएको सन्तानको चम्किलो अनुहार?

योद्धाको छेदविच्छेद लास?
या जितको खुसीमा घन्किएको विजयको नारा?

सन्तानको बिदाइमा
विमानस्थलको गेटमा एकोहोरो टोलाइरहेको वृद्ध बाबु?
या वर्षौँ पछि टुप्लुक्क आँगनमा देखिएको सन्तान?

सत्ताबाट पछारिएपछिको शासक?
या भर्खरै सत्ता उक्लिँदै गरेको शासक?

गणतन्त्रको घोषणाको प्रथम पल?
या राष्ट्रघाती सम्झौतामा संसद्को लालमोहोर?

लटरम्म फलेको टमाटरको झुप्पा?
या सहकारीको ब्याज?

किन झर्छ आँसु?

भुइँमान्छेको करङ टेकेर उभिएको
महलमा बस्नेको पनि झर्छ आँसु
त्यही महलले किचेर
सडकमा लम्पसार एक भरियाको पनि झर्छ आँसु।

एक कालोबजारी व्यापारीको आँसु
एक खुंखार तस्करको आँसु
एक कमिसनखोरको आँसु
एक भ्रष्ट कर्मचारीको आँसु
एक ठेकेदार नेताको आँसु
एक भ्रष्ट शासकको आँसु
एक मालिकको आँसु
एक सम्पादकको आँसु
एक रिपोर्टरको आँसु
एक साइकल ब्वाइको आँसु
एक ज्यामीको आँसु
एक मजदुरको आँसु
खाडीमा बेचिएकी एक महिलाको आँसु
मरुभूमिमा भोक किनिरहेको एक परदेशीको आँसु
रासनको लाइनमा पालो पर्खिरहेको कर्णालीको आँसु
डलरको रुख रोप्दै हिँडेको
एक एनजीओ/आइएनजिओ मालिकको आँसु
एक ब्रान्डेड समीक्षकको आँसु
एक ब्रान्डेड लेखकको आँसु
प्रकाशकको ढोका–ढोका भौँतारिएको लेखकको आँसु
पुरस्कृत लेखकको आँसु
पुरस्कारको लागि निवेदन दिँदै हिँडेको लेखकको आँसु
एक कविको आँसु
एक बिचौलियाको आँसु
एक गरीब किसानको आँसु
सहकारीको किस्ताले निचोरिएको
मेरो आप्पा र आमाको आँसु।