काठमाडौं- परराष्ट्र मन्त्रालयले एसपीपी अगाडि नबढाउने पत्र अमेरिकालाई नपठाइएको बताएको छ। मन्त्रालयकी प्रवक्ता सेवा लम्सालले आइतबार उपयुक्त तरिकाले पत्र पठाउने जानकारी दिइन्।
'उपयुक्त तरिकाले अध्ययन गर्ने, के कतिवटा पत्राचार भयो, पहिला के भएको थियो, नेपाल सरकार मन्त्रिपरिषद्को निर्णयलाई कार्यान्वयन गर्नलाई हामीले त्यही अनुसारको तयारी गर्नुपर्ने हुनाले त्यो क्रममा छौँ', नियमित पत्रकार सम्मेलनमा उनले भनिन्, 'त्यो उपयुक्त तरिकाले कूटनीतिक च्यानलबाट जान्छ भन्ने कुरा आश्वस्त गराएँ। गइसकेको अवस्था छैन। जान्छ। तपाईंहरु ढुक्क हुनुहोस्।'
उनले नेपाल सरकारको निर्णय अनुसार म्यान्डेट प्राप्त भएको बताइन्। तर परराष्ट्र मन्त्रालयले काम गर्दा 'थोरो' अध्ययन गरेर, सबै कुराहरु अध्ययन गरेर मात्रै पत्राचार गर्नुपर्ने भएकाले आफूहरु अध्ययन गर्ने क्रममा रहेको उनको भनाइ छ। 'यसलाई उपयुक्त समयमा डिप्लोम्याटिक च्यानलबाट हामीले नेपाल सरकार मन्त्रिपरिषद्को निर्णयलाई कार्यान्वयन गर्छौँ। अहिले पनि हामी तयारी गरिरहेकै अवस्थामा छौँ', उनको भनाइ छ।
एसपीपीको प्रस्तावित मस्यौदा सार्वजनिक भएपछि नेपालमा आलोचना र विवाद भएको थियो। त्यसैलाई ध्यानमा राखेर असार ६ गते बसेको मन्त्रिपरिषद् बैठकले 'संयुक्त राज्य अमेरिकाको स्टेट पार्टनरसिप प्रोग्राम (एसपीपी) अगाडि नबढाउने' निर्णय गरेको थियो। त्यस्तै, सोही दिनको मन्त्रिपरिषद् बैठकले 'सबै सरकारी निकायहरुले कुटनीतिक सम्बन्धका विषयहरुमा पत्राचार गर्दा अनिवार्य रुपमा परराष्ट्र मन्त्रालयमार्फत् गर्ने' निर्णय पनि गरेको थियो।
केहीअघि गृहमन्त्री बालकृष्ण खाणले राष्ट्रिय सभामा परराष्ट्र मन्त्रालयमार्फत सो पत्र पठाइसकिएको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
