काठमाडौं- वामदेव गौतम नेतृत्वको नेकपा राष्ट्रिय एकता अभियानले हप्ता दिन नपुग्दै विभाजनको सुरुआत गरेको छ। गत असार १४ गते पत्रकार सम्मेलन गरेर सो पार्टी गठन भएको सार्वजनिक भएको थियो।
त्यसअघि असार ११ मा नेकपा एकता राष्ट्रिय अभियानको दोस्रो भेलामा समाजवादी केन्द्र नेपाल, आधुनिक नेपाल समाजवादी पार्टी, नेकपा राष्ट्रवादी र आम नेपाली पार्टीसमेत सहभागी थिए। पार्टी सोही दिन जन्मिएको गौतमले १४ गते जारी गरेको विज्ञप्तिमा उल्लेख छ।
सो पार्टीको सबैभन्दा महत्त्वपूर्ण र मुख्य कार्यभार विघटन भएको नेपाल कम्युनिस्ट पार्टी (नेकपा)लाई फेरि पुनर्गठन गर्नु भएको बताइएको थियो। तर तत्कालै एकता हुन नसकेमा नेकपा एमाले, नेकपा माओवादी केन्द्र र नेकपा एकीकृत समाजवादीबीच कार्यगत एकतामा आउने वातावरण सिर्जना गर्ने भनिएको छ।
तर, शनिबार मात्रै अभियानका केही नेताहरुको बैठक बसेर संयोजक गौतमलाई नै पदमुक्त गरेका छन्। राष्ट्रिय एकता अभियानमा जोडिएका चार दलको बैठकले गौतमलाई निष्कासन गरेका हुन्। समाजवादी केन्द्र नेपाल, आधुनिक नेपाल समाजवादी पार्टी, नेकपा राष्ट्रवादी र आम नेपाली पार्टीले गौतमलाई पाँच बुँदे आरोप पनि लगाएका छन्।
गौतमलाई सांगठनिक अराजकता, निरंकुश, तानाशाही शैली, चरम अवसरवादी चरित्र र अराजनीतिक व्यवहार प्रस्तुत गरिएको, अहंकारवादी सोच र एकलौटी निर्णय गरिएको, जालझेल, छलछाम, षड्यन्त्र र तिकडमबाजी कार्यशैली अपनाइएको, नेकपा एकता राष्ट्रिय अभियानमा आबद्ध दलहरुको आडमा शक्ति बनाई सो शक्तिको चरम दुरुपयोग गरी उल्लेखित शक्तिहरुलाई सिध्याउने गतिविधि गरिएको र सम्पूर्ण वामपन्थी तथा समाजवादी शक्तिलाई बृहत कम्युनिस्ट एकतामा जोड्ने योजनाबमोजिम नेकपा एकता राष्ट्रिय अभियान गठन गरिएकोमा संयोजक कमरेड वामदेव गौतमले सो निर्धारित उद्धेश्यविपरीत अभियानलाई सत्ता, शक्ति, पद प्राप्तिको लागि बार्गेनिङको माध्यम बनाएको जस्ता आरोप लगाइएको छ।
गौतमलाई निष्कासन गरी उनीहरुले युवराज सफललाई संयोजक बनाएका छन्। र, उनकै नेतृत्वमा एकता अभियानको ११ सदस्यीय केन्द्रीय घोषणा गरिएको छ। जसमा, सफल, कृष्ण गोपाल बञ्झारा, मिननाथ देवकोटा, निलकण्ठ पौडेल, द्वारिका निरौला मानव, गुणबहादुर बञ्झरा, भरत कुमाल, भगवती ढकाल, सरस्वती न्यौपाने, तेजबहादुर कार्की र रोशन लामिछाने छन्।
असार १४ गते भने पार्टी (एकीकरणको भूमिका निर्वाह गर्दासम्म पार्टीको ढाँचा समन्वय समितिको रुपमा रहने)को केन्द्रीय सचिवालयमा वामदेव गौतम, डीबी कार्की, ओम शर्मा चालिसे, डिल्लीराज भट्टराई, दुर्गा भण्डारी, निमकान्त पाण्डे, भगवती विष्ट र युवराज सफल रहने घोषणा गरिएको थियो।
गौतमलाई निष्कासन गर्ने शनिबारको बैठकको निर्णयमा आम नेपाली पार्टीका निलकण्ठ पौडेल, नेकपा राष्ट्रवादीका अध्यक्ष मिननाथ देवकोटा, आधुनिक नेपाल समाजवादी पार्टीका कृष्ण गोपाल बञ्झरा र समाजवादी केन्द्र नेपालका सर्वोच्च नेता युवराज सफलले हस्ताक्षर गरेका छन्।
तर सफलले भने राष्ट्रिय एकता अभियानबाट शुक्रबार नै राजीनामा दिएको खुलेको छ। १६ गते लेखेको उनको राजीनामा पत्रमा भनिएको छ- असार १४ गतेको पत्रकार सम्मेलनमा ८ सदस्यीय सचिवालय घोषणा भएको तर सो सचिवालयमा एकता प्रक्रियामा आएका आधुनिक नेपाल समाजवादी पार्टी, नेकपा राष्ट्रवादी, आम नेपाली पार्टीका प्रमुखहरुलाई सामेल नगराइएको कारण गठित सचिवालय असमावेशी भएकोले नैतिकताको आधारमा आजैको मितिदेखि नेकपा एकता राष्ट्रिय अभियानको केन्द्रीय सचिवालयको पदबाट राजीनामा दिएको घोषणा गर्दछु।
सफलले गौतमसँग चार बुँदे माग पनि राखेका छन्। जसमा उनले अभियानको केन्द्रीय समिति घोषणा गर्दा वरियतालाई ख्याल नगरी केन्द्रीय समिति घोषणा गरिएकोले सो सच्याई वरियता निर्धारण गरी केन्द्रीय समिति लिस्ट सार्वजनिक गर्न पर्ने, अन्य राजनीतिक पार्टी तथा समूहरु एकता प्रक्रिया सामेल हुन चाहेकोले सो पार्टी तथा समूहहरुलाई एकता प्रक्रियामा ल्याउन पर्ने लगायतका विषय छन्।
राष्ट्रिय एकता अभियानका प्रचार प्रमुख निमकान्त पौडेलले भने आफूहरुले सफल सहित अन्य सबैलाई पार्टीबाटै निष्कासन गरिसकेको बताए। 'सफलले १६ गते राजीनामा दिनुभएको थियो। १७ गते हाम्रो बैठक बसेर उहाँलाई सचिवालय सदस्यबाट निष्कासन गरेका थियौँ। तर, १८ गते फेरि अनधिकृत बैठक राखेर सचिवालय गठन गर्ने जस्तो उद्दण्डता गर्नुभयो। हिजो उहाँहरुको निर्णय सार्वजनिक हुने बित्तिकै हाम्रो बैठक बसेर उहाँलाई साधारण सदस्य समेत नरहने गरी निष्कासन गरेका छौँ', उनले नेपाल लाइभसँग कुरा गर्दै भने।
आफूहरुको बैठकले सफल नेतृत्वको बैठकको निर्णयमा हस्ताक्षर गर्ने अन्य सबैलाई पनि निष्कासन गरेको पाण्डेले बताए। सफल बाहेक अन्यले आत्मालोचना गरेर विज्ञप्ति जारी गरे कारबाहीमा पुनर्विचार हुन सक्ने उनको भनाइ छ। 'तर, सफलको हकमा भने कुनै पुनर्विचार हुँदैन', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
