काठमाडौं– परराष्ट्रमन्त्री नारायण खड्काले अमेरिकाको स्टेट पार्टनरसिप प्रोग्राम (एसपीपी) नेपालको हितमा नरहेको बताएका छन्। प्रतिनिधि सभाको अन्तर्राष्ट्रिय सम्बन्ध समितिको बैठकमा परराष्ट्रमन्त्री खड्काले नेपाललाई एसपीपी स्वीकार्य नभएको स्पष्ट पारे।
‘अमेरिकाले ल्याएको स्टेट पार्टनसीप प्रोग्राम (एसपीपी) नेपालको हितमा छैन। त्यसैले सरकारलाई स्वीकार्य पनि छैन’, शुक्रबार बिहान सिंहदरबारमा भएको समिति बैठकमा मन्त्री खड्काले भने, ‘नेपाल आफ्नो देशको सार्वभौमसत्ता र संविधानको व्यवस्था विपरीत र असंलग्न परराष्ट्र नीतिबाट बाहिर जान सक्दैन।’
उनले यसबारेमा प्रधानमन्त्री, गृहमन्त्री र नेपाली सेनाले पनि स्पष्ट पारेकाले थप बहस गर्नुको औचित्य समाप्त भएको बताए।
‘नेपाल भूराजनीतिमा अति संवेदनशील छ, हामी संयुक्त राष्ट्र संघको सदस्य पनि भएकाले यस्ता कुनै पनि प्रकारको सामरिक सैन्य रणनीतिमा जान सक्दैन’, उनले भने, ‘हाम्रो संविधानले पनि दिँदैन। हाम्रा अन्य सम्बन्धले पनि दिँदैन। त्यसको च्याप्टर क्लोज भयो।’
उनले अहिलेको सरकारले कुनै पनि यस्तो सम्झौता गर्ने विषयमा छलफल पनि नगरेको र दीर्घकालमा गर्ने सोच पनि नरहेको बताए।
‘सरकारका तर्फबाट कुनै सम्झौता भएको छैन। सहमतिका लागि कसैबा६ दबाब पनि आएको छैन’, मन्त्री खड्काले भने, ‘विगतको सरकारको समयमा भएका कुराहरु हामीले पनि सार्वजनिक सञ्चारमाध्यमवाट पढेका मात्र छौं।’
उनले अब विवादित भइसकेको र सरकारको धारणा सार्वभौम संसद्देखि अन्य स्थानमा समेत प्रष्ट पारेकाले अब यसको औचित्य समाप्त भएको दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1793102318.png)
-1786602170.png)
