काठमाडौं– प्रतिनिधि सभाको बिहीबारको बैठकमा प्रधानमन्त्री शेरबहादुर देउवाको खोजी भयो। कार्यसूचीमा प्रधानमन्त्री देउवासँग सम्बन्धित मन्त्रालय र कार्यालयको जवाफ दिने विषय भएकाले नै सांसद्हरुले उनको खोजी गरेका थिए।
सभामुख अग्निप्रसाद सापकोटाले प्रधानमन्त्री शेरबहादुर देउवाको तर्फबाट गृहमन्त्री बालकृष्ण खाणलाई जवाफ दिन समय दिएपछि नेमकिपाका सांसद प्रेम सुवालले नियमापत्ति गरेका थिए। उनले प्रधानमन्त्रीलाई नै जवाफ दिने बन्दोबस्त गर्न सभामुखसँग माग गरे।
‘यो गरिमामय संसद्मा प्रधानमन्त्री किन उपस्थित हुनसक्नुभएन? बिरामी हुनुहुन्छ कि? विदेश जानुभएको हो कि? कुनै अस्पतालमा भर्ना हुनुभएको हो कि? यो गरिमामय संसद्मा आफ्नो जिम्मेवारीको विभागको प्रधानमन्त्रीले जवाफ दिनुपर्छ। र बिरामी हुनुहुन्छ वा विदेश जानुभएको छ भने संसद्लाई जानकारी दिनुपर्छ’, सुवालले भने।
अर्को कार्यसूचीमा प्रधानमन्त्रीको तर्फबाट सञ्चार तथा सूचना प्रविधि मन्त्री ज्ञानेन्द्रबहादुर कार्कीलाई समय दिइयो। त्यसपछि पनि सांसद्हरुले प्रश्न उठाए।
एमाले सांसद् भीम रावलले प्रधानमन्त्री सदनप्रति जिम्मेवार र उत्तरदायी हुनुपर्ने भन्दै स्मरण गराए। उनले प्रधानमन्त्री बिरामी भएको हल्ला सुनेको बताए।
‘मैले उहाँ कतै उपचार गर्दै हुनुहुन्छ भन्ने हल्ला सुनेको थिएँ, कपाल कि पेट के दुख्यो भन्ने सुनेको थिएँ। मन्त्रीजीलाई थाहा होला। मलाई त्यति जानकारी भएन। प्रधानमन्त्रीजी सिकिस्त बिरामी हुनुहुन्छ भने कुन अस्पतालमा हुनुहन्छ? त्यो जानकारी पाऊँ’, उनले भने।
त्यस अतिरिक्त उनले विदेश गएको वा यही राजदूतसँग भेट गरिरहेको भए पनि जवाफ माग गरेका थिए। उनका अतिरिक्त एमालेका अन्य सांसद्हरुले पनि यो विषयलाई उठाएका थिए। कृष्णभक्त पोखरेलले प्रधानमन्त्री अनुपस्थित हुने कुरा संसद्प्रति अपमान भएको बताएका थिए।
नेमकिपाका सांसद् सुवालले पुनः उस्तै सवाल उठाए। ‘प्रधानमन्त्रीको विभागको विषय सूचना मन्त्रीलाई थाहा पनि हुँदैन। सत्तामा पुग्नेबित्तिकै सर्वज्ञाता हुने होइन होला। त्यसकारण विभागको जिम्मेवारी लिनुभएका प्रधानमन्त्रीसँग सचिव, कार्यालय प्रमुखको रिपोर्ट हुन्छ। हामी सांसद्हरुले उठाएको विषय प्रधानमन्त्रीलाई मात्रै थाहा हुन्छ। त्यसैले सट्टाभर्ना पठाउने व्यवस्थै ठीक छैन’, उनले भने।
सभामुखको तर्फबाट पटक–पटक प्रधानमन्त्री शेरबहादुर देउवा कार्यव्यस्तताले सदनमा आउन नपाएको जानकारी गराइएको थियो। सञ्चारमन्त्री ज्ञानेन्द्रबहादुर कार्कीले कैयौं सांसदहरु पहिलो पटक सांसद नभएकाले विगतका गतिविधि पनि स्मरण गर्न भनेका थिए।
प्रधानमन्त्री शेरबहादुर देउवा भने होटल र्याडिसनमा आयोजित एक कार्यक्रममा सहभागी हुँदैछन्। त्यहाँ नागरिकता, मताधिकार, लगानी तथा वैदेशिक रोजगारका सम्बन्धमा गैरआवासीय नेपाली संघद्वारा सेमिनार आयोजना हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788100027.jpeg)
-1786602170.png)
-1786513116.png)
