काठमाडौं– नेकपा एमालेका उपमहासचिव तथा सांसद प्रदीप ज्ञवालीले नेपाली सेनालाई अमेरिकाको एउटा स्टेड गार्डको समकक्षीका रुपमा नलिन सरकारको ध्यानाकर्षण गराएका छन्।
अमेरिकाले प्रस्ताव गरेको स्टेट पार्टनरसीप प्रोग्राम (एसपीपी)मा सरकारले हस्ताक्षर गर्न लागेको विषयमा विरोध जनाउँदै उनले त्यस्तो गर्न नहुने बताएका हुन्।
उनले संसदको विशेष समयमा भने, 'नेपाली सेनालाई अमेरिकाको एउटा स्टेटको गार्डको समकक्षी मान्न सकिन्छ? नेपालमा पनि प्रदेश प्रहरीको व्यवस्था छ। कुनै देशको नेशनल आर्मीले हाम्रो प्रदेश प्रहरीसँग यस्तो सम्झौता गर्छ?'
नेपाली सेनाको आफ्नै गौरवपूर्ण इतिहास रहेको उल्लेख गर्दै उनले उक्त व्यवहार गर्न नहुने बताएका छन्। नेपाली सेनाको यो हदसम्मको अपमान कसरी परिकल्पना गरियो? भन्दै उनले प्रश्न गरे।
यसैगरी उनले एसपीपीले नेपाललाई भूराजनीतिक द्वन्द्वमा धकेल्ने भएकाले आफूहरुले त्यस्तो हुन नदिने बताए। सम्झौतामा अमेरिकी सेनाले नेपालको भूभाग प्रयोग गर्ने मात्र नभइ छिमेकी देश चीनको सीमानजिक गएर अभ्यास गर्ने सम्मकका शर्त रहेकाले यो स्वीकार्य नहुने उनको भनाइ छ।
पूर्ववर्ती सरकारले छिमेक सम्बन्ध, सुरक्षा र परराष्ट्र नीतिमा पर्ने असरका विषयमा अध्ययन गरेर मात्रै रेस्पोन्स गर्ने भनेर एसपीपी सम्झौताको प्रस्ताव थन्क्याएको बताए। यस विषयमा आफूले पहिले पनि कुरा उठाएको बताउँदै संसदलाई समेत सरकारले नजरअन्दाज गरिरहेको ज्ञवालीले आरोप लगाए।
उनले परराष्ट्र नीतिमा गम्भीर विचलन देखिएको बताउँदै यसलाई रोक्न आफूहरु लाग्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771505229.png)
-1764146706.png)
