काठमाडौं- २०७४ सालको निर्वाचनमा असन्तुष्ट हुँदै दायर गरेका उम्मेदवारहरुको मुद्दा संवैधानिक इजलासले पेसीमा राखेको छ।
प्रधानन्यायाधीश समेत पाँच न्यायाधीश संलग्न हुने संवैधानिक इजलासमा नयाँ निर्वाचनकोको मिति तोकिने छलफल सुरु भएको समयमा पेसीमा राखेर सुनुवाइ गर्न लागिएको हो।
बुधबार विजयकुमार गच्छादार, प्रदिप पौडेल, दिपक खड्का लगायत ४ जनाको मुद्दा पेसीमा रहेको छ। त्यस्तै निर्वाचन क्षेत्रका नाममा विनियोजन हुने पैसा समानुपातिक वितरण हुनुपर्ने, आदिबासी र मुस्लिम समुदायको प्रतिनिधित्व हुन नसकेको र प्रेमबहादुर सिंहले निर्वाचन आयोगविरुद्ध दायर गरेको निवेदन पनि सुनुवाइको पेसीमा रहेको छ।
२०७४ को प्रतिनिधि सभा निर्वाचनमा पौडेलले प्रदेश सभामा थोरै मतले पराजित भएका थिए। तनहुँ क्षेत्र नं. २ को प्रदेशसभा (क) मा पुन: मतदान गर्नु पर्ने माग गर्दै कांग्रेसका नेता पौडेलले दायर गरेको रिटमा सर्वोच्च अदालतले २०७४ पुस ७ गते कारण देखाउ आदेश जारी गरेको थियो।
तत्कालीन प्रधानन्यायाधीश गोपाल पराजुली र न्यायाधीशहरु दीपकराज जोशी, ओमप्रकाश मिश्र, चालेन्द्रशम्शेर जबरा र दीपककुमार कार्कीको संवैधानिक इजलासले कारण देखाउ आदेश जारी गरेको थियो।
पौडेल वाम गठबन्धनकी उम्मेदवार आशा कोइरालासँग ५ मत अन्तरले पराजित भएका थिए। तर, ४२ मत फर्जी भेटिएको भन्दै पौडेलले पुनः मतदान हुनु पर्ने माग गरेका थिए।
यस्तै, संखुवासभाका कांग्रेस उम्मेदवार दिपक खड्काको रिट पनि पेसीमा रहेको छ। त्यस्तै विजय गच्छादारविरुद्ध भगवती चौधरीले दायर गरेको रिट पनि पेसीमा रहेको छ।
सुनसरी निर्वाचन क्षेत्र नम्बर–३ बाट पराजित एमाले उम्मेदवार चौधरीले सर्वोच्च अदालतमा मुद्दा दायर गर्दै पुन: मतदान गराउन माग गरेकी थिइन्। उक्त निर्वाचन क्षेत्रमा गच्छदार ३८ हजार नौ सय ७२ मतसहित विजयी भएका थिए भने चौधरीले ३८ हजार ६ सय ५१ मत पाएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
