काठमाडौं– नेकपा एकीकृत समाजवादीले गठबन्धनलाई नेपाली कांग्रेस र माओवादीले आफ्नो हितमा मात्रै प्रयोग गर्न खोजेको निष्कर्ष निकालेको छ।
एकीकृत समाजवादीको सचिवालय बैठकमा अध्यक्ष माधव नेपालले पेश गरेको प्रतिवेदनमा उक्त निष्कर्ष छ। गठबन्धनका सात समस्यामध्ये उक्त एउटा रहेको बताउँदै भनिएको छ, ‘गठबन्धनभित्र देखा परेका समस्यामध्ये एक गठबन्धनलाई आफ्नो हितमा मात्र प्रयोग गर्न चाहनु हो। यो प्रवृत्ति नेपाली कांग्रेस र माओवादी केन्द्रमा बढी मात्रमा देखियो।’
गठबन्धनमा देखा परेका समस्या उपशीर्षकमा अन्य ६ वटा समस्या छन्। ‘पहिलो–गठबन्धन गर्न नै नचाहने, दोस्रो–गठबन्धनमा भएको निर्णय कार्यान्वयन नगर्न, तेस्रो–गठबन्धनभित्र उपगठबन्धन गर्ने, चौथो–गठबन्धन भएका स्थानमा इमान्दारीपूर्वक भोट नहाल्ने, पाँचौँ–गठबन्धनबाहिरका दलसँग चुनावी तालमेल गर्ने र छैठौं–गठबन्धनमा रहेका दलहरूमा सहकार्यको भावना ज्यादै कम्जोर हुनुलाई समस्याका रुपमा बुँदागत उल्लेख गरिएको छ।
समग्र निर्वाचनमा भने तीनथरि समस्या देखिएको प्रतिवेदनमा उल्लेख छ, ‘पहिलो–गठबन्धनभित्रका समस्या, दोस्रो–हाम्रो आफ्नै पार्टीभित्रका समस्या र तेस्रो प्राविधिक एवं प्रशासनिक समस्या।’
पार्टीभित्र देखापरेका समस्या
एकीकृत समाजवादीभित्र मुख्यगरी तीन समस्या देखिएको प्रतिवेदनमा उल्लेख छ। ‘धेरैमा गठबन्धन भैहाल्छ भनेर आफ्नो तयारीमा राम्ररी नलाग्ने, आफूलाई केन्द्रबिन्दुमा राखेर गठबन्धन गर्न चाहने अर्थात् जहाँ सङ्गठन तुलनात्मक रूपमा बलियो छ, त्यहाँ लिन जोड गर्नुपर्नेमा त्यसो नगरी व्यक्तिलाई केन्द्रबिन्दुमा राखेर सिट लिन चाहने र तेस्रो, गठबन्धन हुँदा उम्मेदवारी दिन तँछाड–मछाड गर्ने तर गठबन्धन नहुने भएपछि भने उम्मेदवारी दिन तयारै नहुने र दिएको उम्मेदवारी पनि फिर्ता लिने’, प्रतिवदेनमा भनिएको छ।
यसैगरी एकीकृत समाजवादीका नेता–कार्यकर्ताले चुनावलाई जनतामाझ राजनीति पु¥याउने माध्यम नठानी पद प्राप्त गर्ने माध्यम मात्र ठानेको अध्यक्ष नेपालको बुझाइ छ।
पार्टीको टिकटबाट दिइएको उम्मेदवारी आफूखुसी फिर्ता लिने र आफूले उम्मेदवारी नपाएपछि पार्टी निर्णयको विरोध गर्ने तथा पार्टी नै छाडेर पनि हिँड्ने समस्या पनि देखिएको उनले प्रतिवेदनमा उल्लेख गरेका छन्।
यसैगरी आफ्नो वास्तविक शक्ति र प्रभावको आंकलन नगरी मनोगत विश्लेषणका आधारमा बढी आकांक्षा राख्ने गरेको पनि उनले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
