काठमाडौं-स्थानीय तह निर्वाचन २०६९ पछि बसेको एमालेको पहिलो सचिवालय बैठकले जनमत तलमाथि नभएको निष्कर्ष निकालेको छ। प्राविधिक रुपमा परिणाममा कमी आएको समीक्षा एमालेकाे छ।
बैठकपछि पत्रकारसँग कुरा गर्दै एमाले उपमहासचिव प्रदीप ज्ञवालीले भने, '२०७४ सालपछि एमालेको जनमत बढेको छ। यसपल्ट पनि त्यसमा तलमाथि भएन तर परिणाममा केही कमी आएको हो। पपुलर जनमतमा पालिका प्रमुख, उपप्रमुख वा वडाध्यक्षले पाएको मतको पनि तुलना गर्याैं। हरेक हिसाबले ३४ प्रतिशत पपुलर मतसहित एमाले प्रमुख शक्तिका रुपमा स्थापित छ।'
बैठकमा निर्वाचनको समीक्षा गर्दैगर्दा स्वस्थ, मर्यादित र निष्पक्ष नभएको कुरा उठेको उनले बताए। 'जे गरेर पनि जित्नुपर्छ भनेर राज्यको दुरुपयोग भयो। केहीको ज्यान गयो। केही ठाउँमा लोकतन्त्रलाई खिसिट्युरी गर्ने काम भयो, स्वतन्त्र अभिमत प्रकट गर्ने वातावरण भएन,' उनले भने।
परिणामलाई एमालेले दुई दृष्टिबाट हेरको बताउँदै उनले एकातिर सत्ता गठबन्धनको उक्त हर्कतका बीचमा पनि एमाले एक प्रमुख शक्ति बनेको बताए। अर्कोतिर आन्तरिक पनि पराजयकाे कारक रहेको पाइएको बैठकको निष्कर्ष छ। आन्तरिक कारणमा समयमै उम्मेदवार चयन गर्न नसकेको, आकांक्षीको व्यवस्थापन सही नसकेको, सिंगो पार्टी पंक्ति निर्वाचनमा परिचालन गर्ने कुशलता देखाउन नसकिएको र केही ठाउँमा घात र अन्तर्घात पनि भएको एमालेको ठहर छ।
पार्टीले गत निर्वाचनको वडा तहसम्म समीक्षा गर्दै आगामी निर्वाचनको तयारी गर्नुपर्ने निर्णय गरेकाे छ। अन्तर्घातका मामलामा प्रमाणित भए सम्बन्धित कमिटीले कारबाही गर्ने तर असमझदारी र अन्तर्घात भने छुट्याउनुपर्ने एमाले बैठकको निष्कर्ष छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
