काठमाडौं- नेकपा एमालेका सांसद भीमबहादुर रावलले शक्ति राष्ट्रको सामरिक छातामा धकेलेर प्रधानमन्त्री शेरबहादुर देउवा नेतृत्वको गठबन्धन सरकार नेपाललाई द्वन्द्वग्रस्त राष्ट्र बनाउन लालायित भएको हो भन्दै प्रश्न गरेका छन्।
प्रतिनिधि सभाको आइतबारको बैठकमा प्रधानमन्त्री तथा मन्त्रिपरिषद् कार्यालयको खर्च कटौती गरियोस् भन्ने प्रस्ताव राख्ने क्रममा उनले यस्तो प्रश्न गरेका हुन्। ‘प्रधानमन्त्रीको अमेरिका भ्रमण र यसै सन्दर्भमा प्रधानसेनापतिको असारमा हुने अमेरिका भ्रमणका कार्यसूची के हुन्? यसबारे सदनलाई किन जानकारी नगराएको,’, उनले भने, ‘स्टेट पार्टनरसिप प्रोग्राम अर्थात् राज्य साझेदारी कार्यक्रम, सैनिक सम्झौतामा प्रधानमन्त्रीले हस्ताक्षर र सहमति जनाउनुका लागि प्रधानसेनापतिको भ्रमण हुँदैछ। अहिले अमेरिकी सेनाका जर्नेल त्यही उद्येश्यले नेपाल आएको भन्ने कुरा के हो प्रधानमन्त्रीले सदनमा आएर जवाफ दिनुपर्छ।’
सांसद रावलले अमेरिकी सेनाका एशिया प्रशान्त प्रमुख चारदिने भ्रमणका लागि नेपालमा आउनुको उद्देश्य के हो भन्दै सरकारको जवाफ माग गरेका छन्। ‘नेपाललाई अमेरिक राज्य साझेदारी कार्यक्रममा हस्ताक्षर गराएर नेपालमा भित्र्याउन प्रधानमन्त्री र उहाँको पत्नीको भूमिका रहेको भन्ने समाचार आइरहेका छन्,’उनले भने,‘साझेदारी कार्यक्रममा सहमति जनाएर एमसीसी सम्झौता अनुसार नेपाललाई अमेरिकी हिन्द प्रशान्त रणनीतिमा सहभागी बनाएर नेपालको असंलग्न, स्वतन्त्र परराष्ट्र नीतिको अन्त्य गर्न प्रधानमन्त्री लागिरहनुभएको भन्ने कुटनीतिक क्षेत्रले उठाइरहेको गम्भीर आशंका बारे प्रधानमन्त्रीको भनाइ के छ।’
उनले यस विषयमा सत्ताधारी दलकै एक सांसदले प्रधानमन्त्रीको भ्रमणबारे गम्भीर आशंका व्यक्त गर्दै रद्द गरियोस भनेकाले प्रधानमन्त्री र परराष्ट्रमन्त्रीले सदनमा आएर त्यसको जवाफ दिनुपर्ने बताए। ‘अमेरिका चीन, भारत लगायत सबै राष्ट्रसंघ नेपालको हितलाई सर्वोपरी राख्दै सार्वभौम समानताको आधारमा नेपालको स्वतन्त्र परराष्ट्र नीति अनुरुप कुटनीतिक र मैत्री सम्बन्ध अगाडी बढाउनुपर्ने उपयुक्त नीतिलाई विथोल्न किन खोजिदै छ,’उनले प्रश्न गर्दै भने।
उनले अहिले संविधान मिच्दै राष्ट्रियहित विपरित धमाधम शक्ति राष्ट्रहरुसँग सामरिक लगायतका सम्झौता हुन थालेको बताए। ‘२०५२ सालमा वर्तमान प्रधानमन्त्री शेरबहादुर देउवा पहिलोपटक प्रधानमन्त्री हुँदा देश हिंसात्मक द्वन्द्वतिर धकेलियो। देशलाई आच पुर्याउने महाकाली सन्धि भयो। अर्कोपटक प्रधानमन्त्री हुँदा देशमा प्रतिगमन भयो। अहिले संविधान मिच्दै राष्ट्रिय हित विपरित धमाधम शक्ति राष्ट्रहरुसँग सामरिक लगायतका सम्झौता हुँदैछन्। राष्ट्रिय स्वाधिनता र स्वतन्त्रता नै खतरामा पर्न थालेको छ,’उनले भने,‘उहाँ पाँच पटक प्रधानमन्त्री हुँदा त यस्तो छ। सात चोटी हुन्छु भन्दै हुनुहुन्छ। त्यो बेलासम्म त नेपाल नै के हुन्छ भन्ने आशंका गर्नुपर्ने देखिन्छ।’
नेपालको स्वतन्त्रता सार्वभौमसत्ता, स्वाधिनता, भौगोलिक अखण्डता, सीमानाको रक्षा र स्वाभिमान, आर्थिक समुन्नति र समृद्धि र नेपालीको हकहितका लागि प्रधानमन्त्री कार्यालय र मन्त्रिपरिषद्को कुनै रुची नदेखिएको रावलको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
