काठमाडौं– नेकपा एमालेका सांसद प्रदीप ज्ञवालीले प्रधानमन्त्रीको आसन्न अमेरिका भ्रमणका बारेमा सदनलाई जानकारी गराउन माग गरेका छन्।
आइतबारको प्रतिनिधि सभा बैठकमा विशेष समय लिएर बोल्दै ज्ञवालीले भ्रमण राजकीय हो वा के हो जानकारी दिनुपर्ने माग गरेका हुन्।
‘सत्ता गठबन्धनका एक प्रमुख सचेतकले प्रधानमन्त्रीको भ्रमण रद्द गरियोस् भनेर कुरा उठाउनुभयो,’ उनले भने, ‘यसलाई कसरी बुझ्ने गठबन्धनभित्रको विवाद हो वा भ्रमणमा केही महत्त्वपूर्ण छलफल र सम्झौता हुँदैछ।’
उनले सत्तापक्षकै एक घटकका प्रमुख सचेतकले उठाएको विषयमा प्रधानमन्त्री आफैं सदनमा उपस्थित भएर जानकारी दिनुपर्ने बताए।
‘प्रतिपक्ष त बेखबर नै छ। प्रतिपक्षीलाई जानकारी दिने, छलफल गर्ने लगायतका बारेमा जानकारी छैन। अमेरिकाको भ्रमण के हो भन्ने विषयमा हामीलाई जानकारी नै छैन। त्यहाँ केही समझदारी हुँदै छन् कि के हो,’ उनले भने, ‘बाहिर आइरहेका जस्तो कुरा हो भने प्रधानमन्त्री आएर सदनमा जानकारी दिनुपर्छ।’
उनले आर्थिक वर्ष २०७९/८० को नीति तथा कार्यक्रमको ७७ नम्बर बुँदामा राखिएको विषय र अहिले बाहिर आइरहेका कुराले आशंका उत्पन्न भएको बताए। ‘आसन्न भ्रमणका विषयमा भ्रमणको समग्र चाँजोपाँजोमा अमेरिकाको विदेशमन्त्रालय र नेपालको परराष्ट्र मन्त्रालयले तयारी गरेको देखिएन,’ पूर्वपरराष्ट्र मन्त्री समेत रहेका ज्ञवालीले भने, ‘त्यहाँको डिफेन्स र अन्य निकाय र नेपालमा रक्षा मन्त्रालय वा सेनाले गरिरहेको कुरा के हो प्रष्ट हुनुपर्छ।’ उनले भ्रमण प्रधानमन्त्रीको हैसियतले हुँदै छ कि रक्षामन्त्रीको हैसियतले हुँदैछ सदनलाई जानकारी हुनुपर्ने बताए।
‘सदनलाई अविलम्ब जानकारी गराइयोस्। नेपालमा कुनै पनि खालका तालिमका नाममा वा सेमिनारका नाममा विदेशी सैनिकका कुनै गतिविधि हुनु हुँदैन। बाहिर आएका हल्लाले गम्भीर कुरा उठाइरहेका छन्,’ उनले भने, ‘बाहिर चर्चा चल्नुले केही गम्भीर कुरा छ। नेपाललाई कुनै पनि अर्थमा भूराजनीतिक द्वन्द्वको थलो बनाइनु हुँदैन। हामीले थाहा पाउनुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766385589.png)
-1766381844.png)
-1764146706.png)
-1763721444.png)
