काठमाडौं– नेकपा एमालेका सांसद एवम् संसद्को अन्तर्राष्ट्रिय सम्बन्ध समितिका सदस्य डा. दिपकप्रकाश भट्टले राष्ट्रिय सुरक्षा परिषद्लाई डम्पिङ साइट जस्तो बनाइएको टिप्पणी गरेका छन्।
आर्थिक वर्ष २०७९/८० को आर्थिक विनियोजन विधेयकमा परराष्ट्र मन्त्रालयको खर्च कटौतीसम्बन्धी प्रस्ताव पेस गर्दै उनले राष्ट्रिय सुरक्षा परिषद्का बारेमा कसैको ध्यान नपुगेको बताएका हुन्।
‘डाइनमिक हुनुपर्ने राष्ट्रिय सुरक्षा परिषद्को बारेमा सिंगो बजेटमा कही–कतै छोएको छैन। प्रधानमन्त्री कार्यालयदेखि रक्षामन्त्रालय, गृहमन्त्रालय, परराष्ट्र मन्त्रालय कसैले पनि चासो दिएको देखिएन,’ उनले भने, ‘त्यसलाई डम्पिङ साइट जस्तो बनाइएको छ।’
नयाँ शितयुद्धका बाछिट्टा नेपालसम्म आइपुगिरहेको भन्दै उनले आन्तरिक नीति नै अस्तव्यस्त र एकअर्को मन्त्रालयबीच सहमन्वको कमी रहेको बेलामा परराष्ट्र नीति कसरी सुध्रिन्छ भन्दै प्रश्न गरे।
‘दुईपक्षीय, क्षेत्रीय, उपक्षेत्रीय र अन्तर्राष्ट्रिय फोरममा हाम्रो उपस्थित कमजोर भइरहेको छ। जहाँ सबल छ त्यसलाई बजेट छुट्याइएको छैन। ध्यान दिइएको छैन,’ उनले भने, ‘विश्वव्याापी रुपमा एकातिर इन्डोप्यासिफिक रणनीति भनेर एउटा महाशक्ति राष्ट्र आइरहेको छ। अर्कोतिर उदयमान महाशक्ति राष्ट्रले पनि ग्लोबल हिसाबले नै सुरक्षा भन्दै अगाडि बढेको अवस्था छ।’
२५ वर्षदेखि आर्थिक कुटनीतिक भनेर भन्दै आए पनि त्यसको कुनै संरचनाले काम नगरेको उनको भनाइ छ। ‘डिफेन्स वा मिलिटरी डिप्लोमेसिका बारेमा हाम्रा मन्त्रालयमा छलफल गरिँदैन। २५ वर्षदेखि आर्थिक कुटनीतिक भनेर भनेका छौं। त्यसको कुनै संरचना काम गरिरहेको छैन,’ उनले भने, ‘सीमामा हुने घटनाका लागि त्यहाँ सशस्त्र छ। गृहमन्त्रालय, परराष्ट्र मन्त्रालय र नक्सा जारी गर्ने, नापी विभागसँग भेट हुने कुनै ठाउँ छैन। अनि कसरी आन्तरिक नीति बन्छ र त्यसलाई व्यवस्थित गर्दै जान्छौं।’
उनले सातवटा प्रदेशका मुख्यमन्त्रीसँग कुटनीतिज्ञहरूले भेटिरहेको र स्थानीय तहका प्रमुख तथा उपप्रखुम पनि विभिन्न अन्तर्राष्ट्रिय संघसंस्थाका कार्यक्रममा जाने गरेको भन्दै त्यसका लागि कुन संरचनाले समन्वय गरिरहेको छ भन्दै प्रश्न गरे।
‘सिंगो राष्ट्रिय विकासको एउटा नीतिलाई सरकारले समन्वय गरेर अगाडि बढ्दैन र आन्तरिक समन्वय हुँदैन भने यो सरकार कसरी चल्छ। आन्तरिक नीति नबनेर यसको जगमा खडा हुने परराष्ट्र नीति कसरी बन्छ?’, उनले प्रश्न गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
