काठमाडौं- नेपाली कांग्रेसले वैशाख ३० मा सम्पन्न स्थानीय तह निर्वाचनको परिणामलाई मूल्यांकनका लागि बनाएको उपसमितिले आफ्नो प्रतिवेदन तयार गर्दै पहिलो पार्टी निर्माण हुनुमा गठबन्धनप्रति सकारात्मक धारणा राखेको छ।
नेता प्रदिप पौडेलसहितको टोलीले महामन्त्री पूर्णबहादुर खड्कालाई प्रतिवेदन बुझाएको छ। उक्त प्रतिवेदनमा निर्वाचनमा उम्मेदवार बनाउँदा आन्तरिक सर्वेक्षण गरेर बनाउनुपर्ने लगायत २२ बुँदे सुझाव समेटिएको छ।
प्रतिवेदनमा एकल रुपमा, गठबन्धन, कम मतान्तर र कति जिल्लामा जित हात पार्न नसकिएको बारे उल्लेख गरिएको छ।
सुझावहरुमा जनताको आवश्यकतासँग जोडिएका मुद्दा निर्माण गर्न सक्नुपर्ने, मतपत्र भद्दा भएको हुनाले बदर मतको संख्या उल्लेख्य बढेको जसलाई कम गरी पार्टीको सदर मत बृद्धि गर्न मतदाता शिक्षालाई प्रभावकारी बनाउने सुझाव दिइएको छ।
‘मतदाता शिक्षाका लागि नेपाली कांग्रेसले आफ्ना क्रियाशील सदस्यहरू तथा पार्टीका प्रशिक्षित कार्यकर्तालाई घर टोलमै पठाएर मतदाता सुसुचित गर्नुपर्ने’ प्रतिवेदनमा भनिएको छ ‘गठबन्धनको नयाँ अवस्थामा मतदाताको सोही अनुसारको मनोविज्ञान निर्माण गर्न मतदान गर्ने विधिका बारेमा सुसुचित गर्न गठबन्धनमा आवद्ध सबै दलको सम्पुर्ण सामर्थ्य प्रयोग गर्ने।’
नेपाली कांग्रेसले समयक्रममा फेरिइरहने मतदाताको मनोविज्ञान बुझ्ने, नयाँ मतदातालाई आकर्षित गर्ने र उनीहरू लक्षित कार्यक्रम बनाउने विषयलाई प्राथमिकतामा राख्नुपर्ने सुझावमा भनिएको छ। समकालिन विमर्शहरूमा आफूलाई अद्यावधिक गर्दै प्रजातान्त्रिक विचारधारा भएका व्यक्तिहरूसँग निरन्तर समन्वय, संवाद र छलफल गरी निर्वाचनको नतिजा नेपाली कांग्रेसको पक्षमा पार्न पहल गर्नुपर्ने सुझावमा उल्लेख छ।
नयाँ र आकर्षक चुनावी प्रचार विधीको रणनीति तयार गर्दा प्राविधिक ज्ञान भएका र डिजिटल दुनियासँग सापेक्ष हुँदै आम मानिसमा पुग्न नेपाली कांग्रेसले गरेका राम्रा कामहरूलाई व्यवस्थित रूपमा लोक भाका र अन्य विभिन्न भाषामा कर्णप्रिय गीतहरू बनाएर, डकुमेन्ट्री र भिडियो कन्टेन्टका रूपमा तयार गर्ने र त्यसलाई लाखौंको संख्यामा रहेका पार्टी कार्यकर्तामार्फत प्रचार गर्नुपर्ने सुझावमा उल्लेख छ।
कांग्रेस कुल ७५२ स्थानमध्ये प्रमुख पदमा ३२९ स्थानमा विजय (१८८ अध्यक्ष र १४१ प्रमुख) भएको छ। कांग्रेसले कुल स्थानको करिव ४४% प्रमुख जित्दा उपप्रमुख भने ४०% जित हात पारेको छ। कार्यकारी पदमा १५०४ मध्ये ६२९ स्थानमा नेपाली कांग्रेसको उपस्थिति, जुन जम्मा स्थानको करिव ४२% हुन आउने प्रतिवेदनमा उल्लेख छ।
हालसम्म निर्वाचन भएको ७६३३ वडा अध्यक्ष मध्ये २६६५वडा अध्यक्ष, २६०६ महिला सदस्य, २५५१ दलित महिला सदस्य र ५३०७ खुल्ला सदस्य विजय प्राप्त गरेको प्रतिवेदनमा उल्लेख छ। वडा अध्यक्षमा कुल संख्याको करिव ३९% विजयी भएको प्रतिवेदनमा उल्लेख छ।
नेपाली कांग्रेसका वडा अध्यक्षका उमेदवारले पाएको मत ३८,८३,१३८ छ । जुन नेकपा एमालेका वडा अध्यक्षका उमेद्वारले पाएको भन्दा १,७५,०७६ मतले बढी भएको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
