काठमाडौं– मधेश प्रदेशका प्रदेश प्रमुख हरिशंकर मिश्रले जेठ २२ गते प्रदेशसभामा आगामी आर्थिक वर्षका लागि प्रदेश सरकारले तयार पारेको नीति तथा कार्यक्रम प्रस्तुत गरे।
उक्त नीति तथा कार्यक्रममा प्रदेश सरकारले उद्योग, रोजगारी, पर्यटन र शिक्षालाई नै प्राथमिकता दिएको छ।
साना उद्योग स्थापनामा जोड
मधेश प्रदेशले नवप्रवर्तन र परम्परागत ज्ञानको उपयोग हुनेगरी प्रदेशमै उद्यमशीलता निर्माण गर्न आवश्यक पुँजी, प्रविधि तथा सीप हस्तान्तरणको नीति लिएको छ। साथै लगानी प्रक्रियालाई सरलीकरण, सहजीकरण र नियमन गर्न प्रादेशिक लगानी सेवा केन्द्र गठन गर्ने भएको छ।
वीरगञ्जमा उद्योग विकास स्थापना, घरेलु तथा साना उद्योगहरुको प्रवद्र्धन गर्न विभिन्न सरोकारवालाको सहयोगमा सीप तथा उद्यमशीलता विकास तालिम, सूचना प्रवाह, प्रविधि हस्तान्तरणका साथै उद्यमीहरूको लाथि सहुलियतपूर्ण ऋण प्रदान गर्न सहजीकरण गर्ने लगायतका कार्यक्रम नीति तथा कार्यक्रममा उल्लेख छन्।
धार्मिक पर्यटनको विकास
यस्तै पर्यटनलाई पनि मधेश सरकारले उच्च प्राथमिकतामा राखेको छ। ‘प्रादेशिक पर्यटन पूर्वाधार, आन्तरिक पर्यटनको आधार’ भन्ने नारालाई आधार मान्दै पर्यटन क्षेत्रको विकास र प्रवद्र्धन गर्ने नीति लिइएको छ।
दूधमती–महेन्द्रनगर करिडोरलाई धार्मिक पर्यटकिय मार्गका रुपमा विकास गर्ने, पर्सा जिल्लाको प्रशिद्ध धार्मिक स्थल भिष्वा मठलाई वीरगञ्ज महानगरपालिकासँगको सहकार्यमा धामिर्क पर्यटकिय गन्तव्यस्थलको रुपमा विकास गर्ने कार्यक्रम छन्। यीबाहेक पर्यटनसम्बन्धी गतिविधि सञ्चालन गर्न प्रदेशमा कम्तिमा तीनवटा पर्यटन कार्यालयहरू स्थापना गर्ने पनि नीति तथा कार्यक्रममा उल्लेख छ।
यस्तै भारतको केन्द्रीय सरकारले अघि बढाएको रामायण सर्किट कार्यक्रमसँग समन्वय गरी पर्यटन प्रवद्र्धनका कार्यक्रम सञ्चालन गरिने नीतिमा उल्लेख छ।
‘बेटी पढाऔं, बेटी बचाऔं’ अभियानलाई निरन्तरता
शिक्षामा निकै पछाडी रहेको मधेश सरकारले अघिल्लो कार्यकालमा जस्तै यसपटक पनि शिक्षालाई मुख्य प्राथमिकतामा राखेको छ। त्यसका लागि विद्यालयमा कानुनी र संस्थागत सुधारका साथै पूर्वाधार निर्माणमा पनि जोड दिइने नीति लिएको छ।
सामुदायिक विद्यालयहरूको शैक्षिण गुणस्तर अभिवृद्धिका लागि नतिजामा आधारित सहयोग कार्यक्रम सञ्चालन गरिनेछ। विद्यालय छाड्ने दरलाई न्यूनीकरण गर्न सरोकारवाला पक्षसँग नियमित अन्तरक्रिया गरेर कार्यक्रम अघि बढाइने बताएको छ।
मधेश प्रदेशको मुख्य पहिचानका रुपमा रहेको ‘बेटी पढाऔं, बेटी बचाऔं’ अभियानलाई अझ सशक्त रुपमा अघि बढाइने भएको छ।
आगामी वर्षको नीति तथा कार्यक्रममा उक्त अभियानअन्तर्गत कक्षा आठमा अध्ययनरत छात्राहरुलाई साइकल अनुदान दिने र कक्षा १२ मा अध्ययनरत छात्रालाई एक थान ल्यापटप उपलब्ध गराइने लगायतका कार्यक्रमम मधेश सरकारको नीति तथा कार्यक्रममा समावेश छन्।
रोजगारीका लागि ‘गरिखाने अभियान’
यस्तै रोजगारीलार्ई पनि मधेश सरकारले प्राथमिकतामा राखेको छ। मधेश प्रदेशमा रहेका जनसांख्यिक लाभांशको उपयोग गरी स्वदेश तथा विदेशमासमेत रोजगारीको अवसर सिर्जना गर्न प्राविधिक ज्ञान प्रदान गर्ने नीति सरकारले लिएको छ।
रोजगारको अवसरबाट वञ्चित युवालाई नवीन उद्यममार्फत रोजगार प्रदान गर्न सीप, स्रोत र साधन उपलब्ध गराउने ‘गरिखाने अभियान’ सञ्चालन गर्ने कार्यक्रम नीति तथा कार्यक्रममा प्राथमिकताका साथ उल्लेख छ।
यस्तै अति विपन्न र बेरोजगार नागरिकलाई ‘जीवन निर्वाह खर्च’ रखम प्रदान गर्ने कार्यक्रम पनि समावेश गरिएको छ। मधेश प्रदेशले प्रदेशमै लगानीको माध्यमबाट पुँजी तथा बौद्धिक सम्पत्तिको उत्पादनमुलक क्षेत्रमा प्रयोग गरी स्वरोजगारका अवसर सिर्जना गर्ने नीति लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
