काठमाडौं— ललितपुर महानगरपालिका प्रमुखमा नेपाली कांग्रेसका चिरिबाबु महर्जन पुनः निर्वाचित भएका छन्। उपप्रमुखमा भने नेकपा एमालेकी मन्जली शाक्य बज्राचार्यले जितेकी छन्।
जम्मा २९ वडा रहेको ललितपुर महानगरपालिकामा प्रमुख, उपप्रमुख, वडाध्यक्ष, खुला सदस्य, महिला सदस्य र दलित महिला सदस्यसहित १४७ पदका लागि निर्वाचन भएको थियो। तर, १० वटा वडामा भने दलित महिला सदस्यमा उम्मेदवारी नै परेन। जसअनुसार १३७ पदमा सदस्य निर्वाचित भए। जहाँ पाँच दलसहित एक स्वतन्त्रले जित निकालेका छन्।
नगरप्रमुखसहित वडाध्यक्ष र सदस्य गरी नेपाली कांग्रेस ५६ पदमा विजयी भएको छ। यता, नेकपा एमालेले पनि उपप्रमुखसहित ५६ पदमै जित निकालेको छ। नेकपा माओवादी केन्द्रले १२ जितेकोमा नेकपा एकीकृत समाजवादीले ९, राप्रपाले २ र स्वतन्त्रले दुई सदस्य जितेका छन्।
जम्मा १३७ सदस्य रहेको ललितपुरको महानगरपालिकाको नगरकार्यपालिका भने ३९ सदस्यीय हुनेछ। जसअनुसार नगर कार्यपालिकामा प्रमुख, उपप्रमुख, प्रत्येक वडाका वडाध्यक्ष, नगरसभाबाट निर्वाचित ५ जना महिला सदस्य र ३ जना दलित वा अल्पसंख्यक समुदायबाट रहने छन्।
महिला सदस्यहरू नगरसभा (निर्वाचित जनप्रतिनिधिहरू) बाटै चयन हुनुपर्ने भए पनि दलित वा अल्पसंख्यकको हकमा भने नगरसभा सदस्य वा सम्बन्धित नगरपालिकाभित्रको मतदाता भए पुग्छ।
ललितपुर महानगरको नगरसभामा कुनै दलको एकल बहुमत छैन। एमाले र कांग्रेस बराबर छन्। तर, नगरकार्यपालिका निर्माणका लागि भने कांग्रेसले गठबन्धन दलसँग साझेदारी गरे उसको बहुमत पुग्ने देखिन्छ। चुनावदेखि गठबन्धन भएका कारण ललितपुरको नगरकार्यपालिकामा एमालेले अन्य दलसँग सहकार्य गर्दै बहुमत जुटाउने सम्भावना कम देखिन्छ।
नगरकार्यपालिकामा स्थानीय तहको कार्यकारिणी अधिकार निहित हुन्छ। नगर कार्यपालिकाबाट बजेट तथा कानुनहरु पारित भएपछि मात्रै कार्यान्वयनमा आउने गर्छन्। नगरसभामा निर्वाचित जनप्रतिनिधिहरूको कूल संख्याको बहुमत–अल्पमतको अंकगणितको आधारमा नगर प्रमुखले अगाडि सारेका कार्यक्रमहरू अघि बढ्न सक्ने अवस्था रहन्छ।
नेपाली कांग्रेसले ११ वटा वडामा वडाध्यक्ष जितेको छ। कांग्रेसले जितेका वडाहरु ४, ६, ७, ८, ९, १०, ११, १४, १६, २० र २८ हुन्।
त्यस्तै, नेकपा एमालेले पनि वडा नम्बर ५, १२, १५, १७, १८, १९, २२, २३, २४, २५ र २९ गरी ११ वडा जितेको छ। नेकपा माओवादी केन्द्रले २१, २६ र २७ गरी तीन वडामा जितेको छ।
यस्तै, नेकपा एकीकृत समाजवादीले वडा १ र १३ मा जितेको छ। खुला सदस्यमा भने कांग्रेसले २७, एमालेले २१, नेकपा माओवादी केन्द्रले ५, नेकपा एकीकृत समाजवादीले ४ र राष्ट्रिय प्रजातन्त्र पार्टीले १ सदस्य जितेको छ।
यस्तै, महिला सदस्यमा नेपाली कांग्रेसले ११, नेकपा एमालेले १२, नेकपा माओवादी केन्द्रले ४, नेकपा एकीकृत समाजवादीले १ र राप्रपाले सदस्य जितेको छ। दलित महिला सदस्यमा नेपाली कांग्रेसले ६, नेकपा एमालेले ११, एकीकृत समाजवादीले २ सदस्यमा जितेको छ। १० वटा वडामा भने दलित महिला सदस्यमा उम्मेदवारी नै परेन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
