मतगणनास्थलमा भेटिएका ठेला व्यापारी भन्छन्– जसले जिते पनि ठेलागाडा खोस्न बन्द होस्

राजनीति

धनु विश्वकर्मा शनिबार, वैशाख ३१, २०७९ २०:१७

काठमाडौँ— राष्ट्रिय सभागृहमा काठमाडौँ महानगरपालिकाको मतगण्ना भैराखेको बेला गेटबाहिर बसेका समर्थकहरू परिणाम सुन्न उत्साही थिए। एमालेबाट उपमेयर पदकी उम्मेदवार दिन ढल्किँदै जाँदा सभागृहमा भित्र–बाहिर गरिरहेकी थिइन्। मेयर पदका स्वतन्त्र उम्मेदवार बालेन शाह बाहिर आएपछि भने समर्थकले चर्को नारा लगाए।

सुरक्षाकर्मीलाई सभागृहको गेटमा झुम्मिएको भिड रोक्न हम्मे परेको थियो। त्यही ठेलमठेल नजिकै दोलख चरिकोटकी दुर्गा भण्डारी नाङ्लोमा हरिया काँक्रा बेचिरहेकी थिइन्। मत परिणाम सुन्न आउनेको लर्कोले उनको व्यापार राम्रै चलेको छ।

उनलाई मत परिणामबारे भने कुनै चासो छैन। जो मेयर आए पनि आफूलाई फरक नपर्ने उनले बताइन्। तर, महानगरले फुटपाथमा व्यापार गर्ने जनतालाई दुःख दिन बन्द गर्नुपर्ने उनको माग छ। ‘अबको मेयरले हामीलाई सडकमा व्यापार गरि खान देओस्,’ उनले भनिन्।

भारत भएका र काठमाडौंमा ठेलामा फलफूल बेच्ने कमलेस शाहको गुनासो पनि उही छ। अबको मेयरले गरिबलाई गरीखान सहज बनाइदिनुपर्ने उनले बताए। आफूले काठमाडौंमा फलफूल बेच्न थालेको दुई दशक भइसकेको उनको भनाइ छ। उनी अचेल बबरमहलअगाडि सडक किनारमा फलफूल बेच्छन्। तर, मत गणनाको दिन पारेर शनिबार भने उनी प्रदर्शनी मार्ग आएका हुन्।

‘महानगर आयो कि ठेलागाडा कुदाउँदै कछुवाको गतिमा दौडिनुपर्छ। नत्र ठेलागाडा जफत गर्छ। व्यापारका सामान सबै सडकमा फालिदिन्छ,’ उनी भन्छन्। फुटपाथ व्यापारीका ठेलामा महानगर प्रहरीले ‘लात्ती हान्न’ बन्द गर्नुपर्ने उनको माग छ।

उता ओखलढुंगाको तलुवाका दिलिप खत्रीका दम्पती नै ठेलामा सोडापानी बेच्छन्। एक दशकदेखि यही व्यापार गर्दा महानगर प्रहरीसँग लुकामारी खेल्नुपर्ने उनी बताउँछन्। उनी भन्छन्, ‘महानगरले ठेलागाडा जफत गर्छ। कवाडीमा बेच्छ। जरिवाना तिराएर फिर्ता गर्दैन्। महानगरको भ्यान आयो कि चोर पुलिसजस्तै भागभाग हुन्छ।’

अब आउने जनप्रतिनिधिले सडकका व्यापारीलाई ठाउँ तोकेरै व्यापार गर्ने व्यवस्था गर्नुपर्ने उनको भनाइ छ। १० वर्षमा आफ्ना ५० भन्दा बढी ठेलागाडा महानगरले जफत गरेको उनले बताए। उनका अनुसार एउटा ठेलाको मूल्य ३० हजारसम्म पर्छ।

नवलपरासीको कावासेति घर भएकी शान्ति कँडेल मतगणनास्थलमा पानी बेचिराखेकी छिन्। उनी आफनो मतदाता नामावली भएको ठाउँमा मतदान गर्न गइनन्। महानगर कर्मथलो भएकाले आफूलाई मत परिणामप्रति चासो भएको उनी बताउँछिन्। उनी पनि सडकमा गरीखानेलाई महानगरले सहज बनाउनुपर्ने बताउँछिन्। सडकको फोहोरले पनि आफूहरूलाई समस्या भएको उनको भनाइ छ।

भृकुटीमण्डप भित्रको स्टलमा उनी कपडा व्यापार गर्छिन्। आज भने मत परिणाम सुन्न आउनेलाई उनी पानी बेच्न आएकी हुन्। उनी सिजनअनुसारको व्यापार पनि गर्छिन्।

धादिङका ७० वर्षिया अमरप्रसाद अधिकारी मतगणनास्थल नजिक बदाम, भुटेको भटमास, भुटेको चना बेचिरहेका थिए। उनले यसरी व्यापार गर्न थालेको पाँच दशक भइसकेको छ। तर, महानगरले धेरै दुःख दिने गरेको उनको पनि गुनासो छ। अबको मेयरले आफूहरुलाई भागभागको अवस्थामा नपार्न उनले माग गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।