काठमाडौ– नेपाली कांग्रेस केन्द्रीय समिति बैठकमा सत्ता साझेदार माओवादी केन्द्रका मन्त्रीहरु हटाउने वा राख्ने बारेमा छलफल भएन।
पार्टी सभापति एवं प्रधानमन्त्री शेरबहादुर देउवाले बैठकको सुरुमै वामपन्थी गठबन्धनसँग आगामी निर्वाचनमा जाने रणनीतिबारे सुझाव दिन भनेपछि सरकारका विषयमा छलफल नभएको केन्द्रीय सदस्य तथा युवा नेता प्रदीप पौडेलले बताए।
बिहान ८ बजेदेखि प्र्रधानमन्त्री निवास बालुवाटारमा बसेको बैठकमा प्रदेश र प्रतिनिधिसभा निर्वाचनमा कसरी सहभागी हुने भन्नेबारे वरिष्ठ नेता रामचन्दै पौडेलसहित आधा दर्जन केन्द्रीय सदस्यले धारणा राखेका छन्।
देउवाले पछिल्लो विकसित घटनाक्रम र आगामी दुई तहको निर्वाचनका विषयमा ठोस धारणा निर्माण गर्दै लोकतान्त्रिक मोर्चा गठनका लागि सुझाव दिन आकस्मिक बैठक बोलाएको बताएका थिए।
सभापतिको प्रस्तावपछि वरिष्ठ नेता पौडेल, नेताहरु प्रकाशमान सिंह, कृष्ण सिटौला, पूर्णबहादुर खड्का, दिलेन्द्र बडु, महेश आचार्य, एनपी साउद, गगन थापा र चन्द्र भण्डारीले धारणा राखेका थिए।
बैठकमा थापा र आचार्यले वाम एकता हुँदैमा आत्तिनुपर्ने अवस्था नरहेको तर्फ नेतृत्वको धानाकर्षण गराए।
थापाले लोकतान्त्रिक पक्ष एकजुट हुँदै आफ्नो संगठन सुदृढ गरेर जान सक्ने अवस्था सिर्जना हुन सकेमा अरुको गठबन्धनबाट डराउनुनपर्ने तर्क राखेका थिए।
हरेक पटकको निर्वाचनमा ७० प्रतिशत मत लोकतन्त्रवादीहरुको पक्षमा खसेको र त्यसलाई आधार बनाएर पार्टी कार्यकर्तालाई सक्रिय बनाउन सकेमा तालमेलसँग आत्तिनु नपर्ने थापाले बताएका थिए।
नेता आचार्यले पनि वामपन्थीहरु एक भए भन्दैमा कांग्रेस आत्तिनुपर्ने अवस्था नरहेकोमा जोड दिएका थिए।
जारी केन्द्रीय समिति बैठकले बिहीबार कार्य सम्पादन समितिले निर्माण गरेको उम्मेदवार मापदण्डलाई अनुमोदन गर्नेछ। बिहान बसेको बैठक ४ बजेसम्मका लागि स्थगीत भएको छ।
यस्तो छ कांग्रेसमा उम्मेदवार हुन नपाउने मापदण्ड
– अघिल्लो संविधानसभा निर्वाचनमा समानुपातिकबाट सदस्य भएको।
– स्थानीय तह निर्वाचनमा भाग लिई निर्वाचित भएको।
– स्थानीय निर्वाचनमा भाग लिई पराजय भएको।
– बागी उम्मेदवार भएको तथा त्यसका सर्मथक र प्रस्तावक बसेको।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
