राष्ट्र बैंकले शुक्रबार आयोजना गरेको कार्यक्रममा अर्थमन्त्री शर्मा र गभर्नर (निलम्बित) महाप्रसाद अधिकारी, तस्बिर– राष्ट्र बैंक
काठमाडौं– सरकारले नेपाल राष्ट्र बैंकका गभर्नर महाप्रसाद अधिकारीलाई निलम्बन गर्ने निर्णय गरेको छ। अधिकारीलाई निलम्बन गरेर डेपुटी गभर्नर निलम ढुंगानालाई कार्यवाहक गभर्नरको अधिकार दिइएको छ।
बिहीबार बसेको मन्त्रिपरिषद्को बैठकले गभर्नर अधिकारीमाथि विभिन्न आरोपमा छानबिन अगाडि बढाउने निर्णय गरेको थियो। जसअनुसार अधिकारी निलम्बनमा परे।
अधिकारी निलम्बनमा परेको विषय शुक्रबार साँझ मात्रै सार्वजनिक भएको हो। जबकि, शुक्रबार बिहान अर्थमन्त्री जनार्दन शर्मा र गभर्नर अधिकारी एउटै मञ्चमा थिए। शुक्रबार नेपाल राष्ट्र बैंकले काठमाडौंमा आयोजना गरेको कार्यक्रममा अर्थमन्त्री पनि वक्ता थिए। राष्ट्र बैंकले आयोजना गरेको कार्यक्रममा मन्त्री शर्माले गभर्नर अधिकारीप्रति आफ्नो असन्तुष्टि पोखेका थिए।
‘राष्ट्र बैंक अर्थ मन्त्रालयको सल्लाहकार हो भन्ने सुनेको छु, हो पनि। कसैले मलाई फोन गर्छन्, यहाँ अर्थतन्त्रमा ठूलो समस्या भयो भन्छ। सेयर किन्ने पैसामा क्याप लागिइसक्यो, किन गराएको भनेर सोध्छन्। म गभर्नर साबलाई सोध्छु, के हो यो? मैले सोध्न अन्त कहाँ जाने? सल्लाहकारलाई त सोध्नु पर्यो!,’ उनले मञ्चबाट गभर्नरतिर हेर्दै भनेका थिए।
उनले कहिलेकाँही बैंकको ब्याज बढ्ने र किन बढ्यो भनेर सोध्नुपर्ने बताउँदै कहिलेकाँही कोही व्यक्ति आउने र निवेदन दिने गरको पनि बताए। निवेदन के रहेछ हेरिदिनुपर्यो भन्दा मिडियालाई सूचना चुहाएको भन्दै अर्थमन्त्री शर्माले अमेरिकाबाट आएको शंकास्पद ४० करोड रकम रोक्का प्रकरणमा सूचना लिक गराएको अप्रत्यक्ष आरोप अधिकारीमाथि लगाए।
‘ऐन कानुनले चल्ने हो, मन्त्री होस् वा कुनै संस्था होस्। मेरो बैंक खाता रोकियो भनेर आएको छ, के हो बुझिदिनुस् भन्दा ठूलो विषय बनाएर मिडियामा किन पुर्याइन्छ,’ मन्त्री शर्माको भनाइ थियो, ‘यस्तो अनुशासनले हुन्छ? एउटा सञ्चालक समितिले ३० हजार डलर चाहियो भनेर बार्गेनिङ गरेको सुनेको छु, आधिकारिक कुरा थाहा छैन।’
कतिपयलाई नेपाल श्रीलंका जस्तै बनाउने रहर जागेको बताउँदै उनले ती सपनाहरु पूरा हुन नदिने समेत बताएका थिए।
‘कतिपयलाई रहर छ नेपाललाई श्रीलंका बनाउने। तीनको सपना पूरा हुँदैन,’ अर्थमन्त्री शर्माको भनाइ थियो, ‘नेपाल र श्रीलंकाको तुलना हुन सक्दैन। हाम्रो ऋणको कुरालाई हेर्नुस्, हाम्रो उत्पादन क्षेत्रलाई हेर्नुस्, विदेशी लगानी हेर्नुस्, ऋण सहायता हेरौं। तुलना नहुने कुरामा तुलना गर्दै जनतालाई आतंकित पार्ने काम एक थरीहरुले गरिरहेका छन्, त्यो गलत छ।’
उनले अर्थतन्त्रमा समस्याहरु रहेको कुरा आफूले पनि भनिरहेको भन्दै तरिका बदल्नुपर्छ भनेको दाबीसमेत गर्न भ्याए। श्रीलंकासँग तुलना गर्दै जनतालाई आतंकित नगर्नसमेत उनले अपिल गरे। ‘यस्तो प्रचारको अन्त्य गरौं, हाम्रो अर्थतन्त्रलाई सुधार गर्ने कुराहरु के–के हुन्, त्यसमा बहस गरौं,’ उनको भनाइ थियो।
अहिले डलरको सञ्चिती साढे ६ महिनालाई पुग्ने रहेको दाबी गर्दै योभन्दा तल नझरोस् भनेर सरकार सर्तक रहेको शर्माको भनाइ थियो। यो बढ्दै जानुमा बिलासिताका सामानमा धेरै छुट दिएको तर्क उनले गरे। नेपाली उत्पादनलाई बजार दिन नसकिएका कारण समस्या भएको पनि उनले स्वीकार गरे।
‘हाम्रो स्याउहरु जुम्ला र मुगुमा कुहिएर फालिएको छ। स्याउ आयातमा प्रोत्साहित गर्यौं, हाम्रो गल्ती त्यहाँ भएको छ,’ उनले भने, ‘हाम्रा आलुहरु दुरदराजमा त्यतिकै फालिएका छन्। तिनीहरुलाई बजारमा पुर्याउने सोच बनाएनौं। त्यहाँका उत्पादनलाई बजारसँग जोड्ने नीति बनाएनौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
