काठमाडौं– श्रीलंकाको राजधानी कोलम्बोमा सयौं मानिसहरूले राष्ट्रपति गोटाबाया राजापाक्षेलाई राजीनामा दिन माग गर्दै जुलुस निकालेका छन्।
सरकारले सामाजिक सञ्जाल प्लेटफर्महरूमा पहुँच अवरुद्ध गरेपछि र बिग्रँदै गएको आर्थिक संकटको विरोधका प्रदर्शनहरू नियन्त्रण गर्न कर्फ्यू लगाएपछि उनीहरुले जुलुस निकालेका हुन्।
विपक्षी समगी जन बालवेगया (एसजेबी) गठबन्धनका दर्जनौं राजनीतिज्ञ र यसका समर्थकहरू आइतबार कर्फ्यूको अवज्ञा गर्दै डाउनटाउन कोलम्बोको इन्डिपेन्डेन्स स्क्वायरनजिक भेला भएका थिए। उनीरुहरुले ‘गोटा गो ब्याक होम’ भन्ने नारा लगाएका थिए।
बढ्दो मुद्रास्फीति, खाद्यान्न अभाव र विद्युत् कटौतीको विरोधमा विपक्षी गठबन्धनले पनि राजधानीको बाहिरी शहरमा र्याली निकालेको छ।
कोलम्बोको इन्डिपेन्डेन्स स्क्वायरमा प्रदर्शनकारीलाई रोक्न हतियारसहित प्रहरी र सैनिक खटाइएको थियो। विपक्षी दलका नेता सजिथ प्रेमदासाले सुरक्षा बललाई र्याली अगाडि बढाउन दिन आग्रह गरेका थिए।
‘मानिस बाँच्न सक्दैनन्, यो शान्तिपूर्ण प्रदर्शन हो,’ उनले भने,‘किन कर्फ्यू छ? राष्ट्रिय सुरक्षामा खतरा छ? सुनामी? जनताको आक्रोशबाट राजापाक्षसलाई बचाउन कर्फ्यू लगाइएको हो।’
राजापाक्षेका दाजुहरूले प्रधानमन्त्री र अर्थमन्त्रीको पद सम्हालेका छन्। श्रीलंकामा आपतकालिन अवस्था घोषणा गरेएको छ। र, शनिबार साँझ ६ बजेबाट ३६ घण्टे कर्फ्यू लागू गरिएको छ। कर्फ्यूको पालना गराउन सरकारले सडकमा सेना खटाएको छ।
विपक्षीहरुले आइतबारको तय गरिएको राष्ट्रव्यापी विरोध प्रदर्शनलाई रोक्न कर्फ्यू लगाइएको बताएका छन्। यसैबीच, टेलिकम नियामकले आइतबार फेसबुक, इन्स्टाग्राम, ट्विटर र युट्युबका साथै मेसेजिङ प्लेटफर्म ह्वाट्सएप र भाइबरमा पहुँच बन्द गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770630850.jpg)
-1764146706.png)
-1770562345.jpg)
