काठमाडौं– नेपालमा प्रयोग गरिने इरेजरमा हानिकारक रसायन (केमिकल)को मात्रा उच्च रहेको पाइएको छ।
सिसाकलमले लेखेको मेटाउन प्रयोग गर्ने इरेजरमा 'फ्थालेट्स' नामक केमिकलको प्रयोग धेरै पाइएको एक अध्ययनले देखाएको हो। विशेष गरी प्रारम्भिक तहको कक्षामा अध्ययन गर्ने बालबालिकाले सिसाकलमको प्रयोग धेरै गर्छन्।
जनस्वास्थ्य तथा वातावरण प्रवर्द्धन केन्द्रका अनुसार एसियाली देशहरूको नमूना अध्ययनका क्रममा नेपालमा प्रयोग गरिने इरेजरमा पनि फ्थालेट्स नामक केमिकलको अत्यन्तै धेरै प्रयोग भएको पाइएको हो।
एउटा इरेजरमा ०.१ प्रतिशतभन्दा धेरै फ्थालेट्स प्रयोग भएमा त्यो हानिकारक मानिन्छ। नेपालमा उत्पादन हुने ५३ वटा कम्पनीको नमूना पठाइएकोमा ४ वटा कम्पनीबाहेक सबैमा केमिकलको मात्रा धेरै रहेको पाइएको जनस्वास्थ्य तथा वातावरण प्रवर्द्धन केन्द्रका कार्यकारी निर्देशक राम चरित्र शाहले बताए। बंगलादेश लगायतका कतिपय देशमा मापदण्डभन्दा १२२ गुणसम्म बढी पाइएको उनले बताए।
आयातित इरेजरको तुलनामा नेपालमा उत्पादन गरिएका इरेजरमा केमिकलको मात्रा कम रहेको शाहको भनाइ छ।
फ्थालेट्स केमिकलको प्रभावले हर्मोन उत्पादनमा असर गर्ने भएकाले बालबालिकाको मानसिक तथा शारीरिक विकासमा समेत असर पुर्याउने गर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1753263770.jpg)
-1764146706.png)
