भरतपुर– नेपाली कांग्रेसका नेता रामचन्द्र पौडेलले स्थानीय तहको निर्वाचनमा ठाउँ र आवश्यकताअनुसार तालमेल हुने बताएका छन्।
शनिबार चितवनको भरतपुरमा पत्रकारहरुसँग कुराकानी गर्दै नेता पौडेलले वडा र पालिकाका विषयमा राष्ट्रिय राजनीतिमा भर नपर्ने बताए।
'ठाउँ र आवश्यकताअनुसार तालमेल हुन्छ। तालमेलका क्रममा राष्ट्रिय आवश्यकता के हो भन्ने विषयमा ध्यान दिइन्छ,' पौडेलले भने।
पौडेलले सबै परिस्थितिको मूल्याङ्कन गरेर पठाउन भनेर पार्टीको जिल्ला, प्रदेश, क्षेत्र र पालिकाको कार्यसमितिलाई भनिएको बताए। केन्द्रको सबै निर्णय लाद्ने पक्षमा कांग्रेस नरहेको उनको भनाइ छ।
'केन्द्रबाट सबै निर्णय लादिँदैन। यस्तो नीति कांग्रेसको छैन,' पौडेलले भने।
अहिलेको राष्ट्रिय आवश्यकता परिवर्तनमाथि भएको प्रहार र प्रतिगमनको विरुद्धमा रहेको उल्लेख गर्दै उहाँले यसलाई जोगाउनु पर्ने पौडेलको भनाइ छ। गठबन्धन प्रतिगमनबाट जोगाउन र परिवर्तनको रक्षाका लागि भएको स्पष्ट पार्दै पौडेलले ७० वर्षको उपलब्धि रक्षाका लागि गठबन्धन गर्नु परेको बताए।
अहिलेको गठबन्धन कडा र नरम नभएको भन्दै उनले तालमेलको विषयमा प्रारम्भिक छलफलहरु भइरहेको बताए। नेता पौडेलले अहिले नै कस्ले कहाँ छोड्ने भन्ने विषयमा टुङ्गो नलागेको उल्लेख गर्दै छलफलबाट सबै कुराको टुङ्गो लाग्ने बताए।
फरक प्रसङ्गमा बोल्दै उनले कांग्रेसका कार्यकर्ताहरुलाई निराश हुनुपर्ने अवस्था नरहेको बताए। 'निरास हुनुपर्ने अवस्था छैन । रूखलाई छोड्ने कुरै छैन,' पौडेलले भने, 'चितवनका साथीहरु समझदार हुनुहुन्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
