काठमाडौं- सत्तारुढ गठबन्धनले आगामी स्थानीय तहको निर्वाचनमा तालमेल गर्ने औपचारिक निर्णय गरेका छन्। बिहीबार प्रधानमन्त्री निवास बालुवाटारमा बसेको बैठकले तालमेलको निर्णय गरेसँगै यो विषयले औपचारिता पाएको हो।
वैशाख ३० गते सम्पन्न हुन गइरहेको स्थानीय निर्वाचनमा पाँच दलीय गठबन्धनले तालमेल गरेर अगाडि बढ्ने निर्णय गरेको सरकारका प्रवक्ता समेत रहेका सञ्चार तथा सूचना प्रविधि मन्त्री ज्ञानेन्द्रबहादुर कार्कीले जानकारी दिए। 'पाँच दलीय गठबन्धन एक ठाउँमा उभिएर आगामी स्थानीय निर्वाचनमा खडा हुन्छ', उनले भने।
उनका अनुसार, स्थानीय तहको निर्वाचनमा पाँच दलीय गठबन्धन राष्ट्रिय सभाको चुनाव जसरी नै एक ढिक्का भएर प्रतिस्पर्धा गर्नेछन्।
दलहरुले तालमेलको स्पष्ट 'मोडालिटी' तयार गर्नुअघि देशभरको स्थिति जाँच पनि गर्ने भएका छन्। त्यसका लागि तीन तहको समिति पनि बनाउने भएका छन्।
'प्रदेश स्तरीय आफ्ना आफ्ना दलहरुका जुन प्रमुखहरु छन्, उहाँहरुको समिति बन्छ। त्यसले प्रदेश स्तरीय काम प्रारम्भ गर्छ। त्यस्तै गरेर जिल्ला स्तरमा जिल्ला स्तरीय प्रमुखहरुको समिति बन्छ। त्यो समितिले आफ्नो काम प्रारम्भ गर्छ। त्यस्तैगरि गाउँपालिकामा गाउँपालिकाका प्रमुखहरुको संयन्त्र बन्छ', मन्त्री कार्कीले भने।
ती समितिहरुले २२ गते भित्रमा आफ्नो प्रदेश, जिल्ला र गाउँपालिकामा पाँच दलको अवस्था कस्तो छ, त्यसको बारेमा केन्द्रलाई विस्तृत रुपले आफ्नो प्रतिवेदन पेस गर्नेछन्। त्यही प्रतिवेदनको आधारमा थप छलफल गरेर निष्कर्षमा पुग्ने कार्कीको भनाइ छ।
यद्यपि, महानगरपालिकाको तालमेलको विषय भने केन्द्रले नै टुंग्याउने निर्णय भएको छ। नेकपा एकीकृत समाजवादीका सम्मानित नेता झलनाथ खनालका अनुसार, अन्य तहको सन्दर्भमा भने तल्ला कमिटीबाटै निर्णय गरिने छ।
'महानगरको निर्णय माथिबाट हुन्छ। अन्य (उपमहानगरपालिका/नगरपालिका/गाउँपालिका) का लागि तलैका कमिटीहरुलाई निर्णय गर्न दिने सहमति भएको छ', नेपाल लाइभसँग कुरा गर्दै उनले भने।
सत्ता गठबन्धनका अन्य दलहरुले तालमेलको विषयलाई जोडतोडका साथ उठाइरहेको भए पनि नेपाली कांग्रेसले औपचारिक रुपमा निर्णय नगर्दा यो विषय अन्यौलमा पर्दै गएको थियो। तर, गत शुक्रबादेखि मंगलबारसम्म बसेको कांग्रेस केन्द्रीय कार्यसमिति बैठकले चुनावमा तालमेल गर्ने निर्णय गरेको थियो।
'स्थानीय निर्वाचनमा बहुसंख्यक स्थानीय तहमा नेपाली कांग्रेस विजयी हुने बलियो परिस्थिति र आधार बनेको अवस्थालाई अझै सबल र व्यापक बनाउन स्थानीय अवस्था र आवश्यकता अनुरुप गठबन्धनमा रहेका अन्य दलसँग तालमेल गर्न सक्ने नीतिगत निर्णय यो बैठक गर्दछ', कांग्रेसको निर्णयमा भनिएको छ।
कांग्रेसको निर्णय आएपछि दलहरु गठबन्धनको गृहकार्यतर्फ अगाडि बढेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772328969.png)
-1764146706.png)
-1772271039.png)
